গােলাঘাট জিলা গ্রন্থাগাৰ সংস্থাৰ উদ্যোগত বোকাখাতৰ জে ডি এচ জি মহাবিদ্যালয়ৰ কেন্দ্রীয় গ্রন্থাগাৰ আৰু আভ্যন্তৰীণ মান নিশ্চিত কৰণ কোষৰ সহযােগত মহাবিদ্যালয়খনত দিনজোৰা কাৰ্যসূচীৰে ভাৰতৰ গ্ৰন্থাগাৰ বিজ্ঞানৰ পিতৃস্বৰূপ পদ্মশ্রী ড° এচ আৰ ৰংগানাথনৰ ১২৭ সংখ্যক জন্মদিন ১২ আগষ্টত গ্রন্থাগাৰিক দিৱস হিচাপে উদযাপন কৰা হয়।
অনুষ্ঠানৰ আৰম্ভনিতে ড°এচ আৰ ৰংগনাথনৰ প্রতিকৃতিত বন্তি প্রজ্বলন কৰে সংস্থাৰ কাৰ্যকৰী সভাপতি কমাৰগাঁও মহাবিদ্যালয়ৰ জ্যেষ্ঠ গ্রন্থাগাৰিক জিতেন্দ্ৰ বৰাই।
বোকাখাতৰ শংকৰদেৱ শিশু নিকেতনৰ ছাত্ৰীসকলে পৰিবেশন কৰা সৰস্বতী বন্দনাৰে কার্যসূচীৰ শুভাৰম্ভ হোৱা অনুষ্ঠানত
বোকাখাতৰ বিশিষ্ট শিক্ষাবিদ, সাহিত্যিক, জ্যেষ্ঠ সাংবাদিক তথা অসমৰ গ্রন্থাগাৰ আন্দোলনৰ প্রবীণ কর্মী ভবেশ শইকীয়া দেৱক গােলাঘাট জিলা গ্রন্থাগাৰ সংস্থাৰ তৰফৰ পৰা বিশেষভাৱে সম্বৰ্ধনা জনােৱা হয় ।
সম্বৰ্ধনা গ্ৰহন কৰি দিয়া ভাষণ প্রসংগত ভবেশ শইকীয়ই ষাঠীৰ দশকত প্রয়াত কুমুদেশৰ বৰঠাকুৰৰ নেতৃত্বত বৃহত্তৰ বােকাখাত অঞ্চলৰ গাঁৱে-ভুঞে গ্রন্থাগাৰ প্রতিষ্ঠা কৰি জ্ঞানৰ পােহৰ বিলােৱাৰ কথা ব্যক্ত কৰে।
ভৱেশ শইকীয়াৰ নেতৃত্বত তাহানিতে অসম পুথিভঁৰাল সংঘৰ চতুৰ্থ ৰাজ্যিক অধিৱেশন বােকাখাত অনুষ্ঠিত কৰাৰ কথাও উল্লেখ কৰে। তেওঁ সেই সময়ৰ সতীর্থ প্রয়াত তিলক বৰা, গােলাঘাটৰ প্রয়াত অযােধ্যা প্রসাদ গােস্বামীৰ কথাও উল্লেখ কৰে।
সভাত গোলাঘাট জিলা গ্রন্থাগাৰ সংস্থাৰ কার্যনিবাহক সদস্য সঞ্জয় কুমাৰ হাজৰিকা স্বচ্ছ ভাৰত অভিযান মিশ্যনৰ উত্তৰ-পূবৰ ব্ৰেণ্ড এম্বেছেদৰ হিচাপে নির্বাচিত হােৱাত সংস্থাৰ তৰফৰ পৰা সম্বর্ধনা জনােৱা হয়।
দিৱসৰ লগত সংগতি ৰাখি জে.ডি.এছ.জি. মহাবিদ্যালয় পৰিচালনা সমিতিৰ সভাপতি শ্ৰীযুত অখিল বৰুৱাদেৱৰ সঞ্চালনাত “গ্রন্থ, গ্রন্থাগাৰ আৰু পঢ়ুৱৈ সমাজ” শীর্ষক এখনি আলােচনা চক্র অনুষ্ঠিত হয়।
