কলিয়াবৰত ‘অসম বিজ্ঞান প্ৰযুক্তি আৰু পৰিৱেশ পৰিষদ’ৰ সহযোগত আৰু ‘আৰ্থ-সামাজিক সজাগতা আৰু ‘পৰিৱেশ সুৰক্ষা সমাজ’ৰ ব্যৱস্থাপনাত ছাত্ৰ-ছাত্ৰীৰ মাজত ২৫ এপ্ৰিলৰ পৰা তিনিদিনীয়াকৈ অনুষ্ঠিত ‘ৰাষ্ট্ৰীয় প্ৰকৃতি শিৱিৰ কাৰ্য্যসূচী’ৰ আজি সমাপ্তি ঘটে।
কলিয়াবৰ মহকুমাৰ বিভিন্ন বিদ্যালয়ৰ ছাত্ৰ-ছাত্ৰী আৰু শিক্ষক-শিক্ষয়িত্ৰীয়ে অংশগ্ৰহণ কৰা তথা কলিয়াবৰ উচ্চতৰ মাধ্যমিক বিদ্যালয়ৰ অধ্যক্ষ ভূপেন শৰ্মাই উদ্বোধন কৰা এই শিৱিৰত সমল ব্যক্তি হিচাপে অংশগ্ৰহণ কৰে ৰাষ্ট্ৰীয় শিশু বিজ্ঞান সমাৰোহৰ ৰাষ্ট্ৰীয় সমিতিৰ সদস্য জয়ন্ত কুমাৰ শৰ্মাই।
উক্ত প্ৰকৃতি শিৱিৰটোত অংশগ্ৰহণকাৰীসকলক স্থানীয় বনাঞ্চলসমূহৰ লগত পৰিচয় কৰি দিয়াৰ ব্যৱস্থা কৰাই দিয়া হয় বুলি শিৱিৰ সমন্বয়ক ভবেন বৰুৱাই নৰ্থ ইষ্ট নাওক জনায়।
কাৰ্যসূচীৰ দ্বিতীয় দিনা ছাত্ৰ-ছাত্ৰীসকলক কলিয়াবৰৰ মিছা উচ্চ মাধ্যমিক বিদ্যালয়ৰ পৰা খাচীয়া পোঞ্জিলৈ লৈ যোৱা হয় য’ত তেওঁলোকক প্ৰাকৃতিক সম্পদৰ ওপৰত বিভিন্ন ধৰণৰ জ্ঞান দিয়াৰ লগতে পানীৰ সংৰক্ষণ, গতিবেগ আৰু পানীৰ গভীৰতা জোখিবলৈ শিকোৱা হয়।
আজি অন্তিম দিনৰ কাৰ্যসূচীত তেজপুৰ বিশ্ববিদ্যালয়ৰ ভীম প্ৰসাদ শৰ্মা, উপাসনা দাস, ৰাষ্ট্ৰীয় শিশু বিজ্ঞান সমিতিৰ সম্পাদক কিশোৰ দাস আৰু সদস্য জয়ন্ত কুমাৰ শৰ্মা আৰু উপস্থিত থাকে।
