ভাৰতীয় ক্ৰীড়াত স্বচ্ছতা, জবাবদিহিতা আৰু ন্যায়পৰায়ণতা অনাৰ লক্ষ্যৰে আজি লোকসভাত ৰাষ্ট্ৰীয় ক্ৰীড়া শাসন বিধেয়ক ২০২৫ উত্থাপন কৰিব। এই বিধেয়কখনে ভাৰতৰ ক্ৰিকেট নিয়ন্ত্ৰণ ব’ৰ্ডক চৰকাৰী তত্বাৱধানত ৰখাৰ লগতে অন্যান্য ৰাষ্ট্ৰীয় ক্ৰীড়া ফেডাৰেচনৰ দৰে বাৰ্ষিক স্বীকৃতি বিচাৰিব লাগিব।
বিধেয়কখনৰ মূল বৈশিষ্ট্যসমূহৰ ভিতৰত আছে- খেলুৱৈৰ কল্যাণ আৰু নৈতিক মানদণ্ডৰ প্ৰসাৰ, এন এছ এফৰ বাবে স্পষ্ট শাসন নীতি স্থাপন কৰা, বিবাদ নিষ্পত্তিৰ বাবে ৰাষ্ট্ৰীয় ক্ৰীড়া ন্যায়াধিকৰণ গঠন কৰা, যিয়ে নিয়মীয়া আদালতৰ মামলাৰ ঠাই ল’ব, উন্নত ব্যৱস্থাপনাৰ বাবে প্ৰশাসনিক সংস্কাৰ ৰূপায়ণ আদি।
বিধেয়কখন গৃহীত হোৱাৰ পিছত বিচিচিআইয়ে প্ৰস্তাৱিত ৰাষ্ট্ৰীয় ক্ৰীড়া ব’ৰ্ডৰ পৰা বাৰ্ষিক অনুমোদনৰ বাবে আবেদন কৰিব লাগিব। দল নিৰ্বাচন আৰু আচৰণ বিধি সম্পৰ্কীয় সকলো বিবাদ কেন্দ্ৰীয় ন্যায়াধিকৰণে নিষ্পত্তি কৰিব। ছেপ্টেম্বৰ মাহত অনুষ্ঠিত হ’বলগীয়া নিৰ্বাচনৰ পিছত বিচিচিআইৰ কাম-কাজ অব্যাহত ৰাখিবলৈ নতুন নীতি-নিয়ম মানি চলিব লাগিব।
উল্লেখ্য যে এই বিধেয়কখনে ভাৰতীয় ক্ৰীড়াৰ দহটা মূল সমস্যাকো সম্বোধন কৰিছে। ইয়াৰ ভিতৰত সংঘৰ ভিতৰত আভ্যন্তৰীণ বিবাদ, এক ঐক্যবদ্ধ আচৰণ বিধিৰ অভাৱ, স্বতন্ত্ৰ বিবাদ নিষ্পত্তিৰ অভাৱ, খেলুৱৈৰ বাবে অপৰ্যাপ্ত সুৰক্ষা, লিংগ ভাৰসাম্যহীনতা আৰু নেতৃত্বত মহিলাৰ প্ৰতিনিধিৰ অভাৱ আদি।
বিশ্বৰ মানদণ্ডৰ সৈতে সংগতি ৰাখি এই বিধেয়কখনত আন্তঃৰাষ্ট্ৰীয় অলিম্পিক সমিতি (আই অ’ চি), ফিফা আৰু ন্যায়াধীশ লোধা সমিতিৰ পৰামৰ্শ সন্নিবিষ্ট কৰা হৈছে, য’ত বি চি চি আইৰ বিষয়ববীয়াৰ বয়সৰ সীমা ৭০ বছৰ নিৰ্ধাৰণ কৰা হৈছে।
এই বিধেয়কখনৰ জৰিয়তে ৭০ বছৰ বয়সৰ পূৰ্বে নিৰ্বাচিত হোৱা বিষয়ববীয়াসকলে বয়সৰ সীমা অতিক্ৰম কৰিলেও কাৰ্যকাল সম্পূৰ্ণ কৰিব পাৰিব। ইয়াৰ উপৰিও সভাপতি, সম্পাদক আৰু কোষাধ্যক্ষৰ দৰে মূল ভূমিকাসমূহৰ বাবে চাৰি বছৰৰ কাৰ্যকালৰ সীমা নিৰ্ধাৰণ কৰা হৈছে, সৰ্বাধিক তিনিটা কাৰ্যকাল আৰু কাৰ্যকালৰ মাজত বাধ্যতামূলক কুলিং অফ পিৰিয়ড নিৰ্ধাৰিত কৰিছে।
ইয়াৰ সমান্তৰালভাবে চৰকাৰে বিশ্ব এণ্টি ডপিং সংস্থা (ৱাডা)ৰ মানদণ্ড অনুসৰি ৰাষ্ট্ৰীয় এণ্টি ড’পিং (সংশোধনী) বিল, ২০২৫ উত্থাপন কৰিব। ইয়াৰ দ্বাৰা এণ্টি ড’পিং ডিচিপ্লিনেৰী পেনেল (এডিডিপি) আৰু আপীল পেনেল (এডিএপি)ৰ স্বাধীনতা নিশ্চিত হ’ব।
ইয়াৰ উপৰিও মন্ত্ৰালয়ে স্পষ্টভাবে কয় যে চৰকাৰে দৈনন্দিন কাম-কাজত হস্তক্ষেপ নকৰে বৰঞ্চ ক্ৰীড়া সংঘসমূহত জবাবদিহিতা নিশ্চিত কৰিবলৈ নূন্যতম শাসন মানদণ্ড আৰোপ কৰিব। ন্যায়পৰায়ণতাক প্ৰসাৰিত কৰি, খেলুৱৈসকলক সুৰক্ষা প্ৰদান কৰি আৰু বিবাদ নিষ্পত্তি সুশৃংখলিত কৰি ভাৰতীয় ক্ৰীড়াক ৰূপান্তৰিত কৰাৰ লক্ষ্যৰে এই বিধেয়কসমূহ সদনত উত্থাপন কৰা হৈছে বুলি সদৰী কৰিছে।
