পুনৰ চৰ্চাত ঔৰংজেব। অৱশ্যে এইবাৰ কোনো ৰাজপাট আৰোহনৰ বাবে নহয়, চৰ্চালৈ আহিছে সামাজিক মাধ্যমৰ এক প্ৰফাইলত স্থান লাভ কৰিহে। ঔৰংজেবৰ বাবেই এতিয়া আইনী ৰোষতো পৰিছে এগৰাকী যুৱক। এই ঘটনা ঘটিছে মুম্বাইত।
দেওবাৰে মোগল সম্ৰাট ঔৰংজেবৰ ছবি হোৱাটছএপ প্ৰফাইল পিকচাৰ হিচাপে ব্যৱহাৰ কৰাৰ অভিযোগত নৱী মুম্বাই আৰক্ষীয়ে এফআইআৰ ৰুজু কৰে এগৰাকী যুৱকৰ বিৰুদ্ধে।
অভিযুক্ত যুৱকগৰাকী এক মোবাইল সেৱা প্ৰদানকাৰীৰ এটা আউটলেটত কৰ্মৰত। আৰক্ষীয়ে প্ৰথমে যুৱকগৰাকীক আটক কৰাৰ পিছত অৱশ্যে তেওঁক যাবলৈ দিয়া হয় আৰু জাননী জাৰি কৰা হয়।
এগৰাকী আৰক্ষী বিষয়াই উল্লেখ কৰা মতে, যুৱকগৰাকীয়ে ঔৰংজেবৰ ছবি প্ৰফাইল পিকচাৰ হিচাপে দিয়াৰ পিছত এক হিন্দু সংগঠনে ইয়াৰ স্ক্ৰীণশ্বটটো আৰক্ষীক দাখিল কৰে আৰু সংগঠনটোৰ অভিযোগৰ ভিত্তিত ভাৰতীয় দণ্ডবিধিৰ ধাৰা ২৯৮ আৰু ১৫৩-এ ৰ অধীনত গোচৰ ৰুজু কৰে।
লক্ষণীয়ভাৱে শেহতীয়াকৈ মহাৰাষ্ট্ৰৰ বিভিন্ন চহৰত ঔৰংজেবৰ ছবি ব্যৱহাৰ কৰাক লৈ সাম্প্ৰদায়িক উত্তেজনাময় পৰিস্থিতিৰ উদ্ভৱ হৈছে। যাৰ পৰিণতিত এতিয়া পুনৰ চৰ্চাৰ বিষয় হৈ পৰিছে ঔৰংজেব।
