ৰাষ্ট্ৰীয় শিক্ষা গৱেষণা আৰু প্ৰশিক্ষণ পৰিষদ (এনটিইআৰটি) আৰু দিল্লী আৰক্ষীৰ ক্ৰাইম ব্ৰাঞ্চৰ যৌথ অভিযানত উদ্ধাৰ হৈছে বৃহৎ পৰিমাণৰ নকল পাঠ্যপুথি। শুকুৰবাৰে উত্তৰ প্ৰদেশৰ গাজিয়াবাদৰ এটা ছপাশালৰ পৰা প্ৰায় ৩২ হাজাৰ নকল এনচিইআৰটিৰ পাঠ্যপুথি জব্দ কৰা হয়। এই অভিযানৰ জৰিয়তে বৃহৎ পৰিসৰৰ পাইৰেটেড কিতাপৰ চক্ৰৰ সন্ধান পোৱা গৈছে বুলি জানিব পৰা গৈছে।
আৰক্ষীৰ সূত্ৰৰ মতে, গোপন তথ্যৰ ভিত্তিত অপৰাধ শাখাই গাজিয়াবাদৰ লনী অঞ্চলৰ জাৱলী গাঁৱৰ এটা ছপাখানাত অভিযান চলায়। বিভিন্ন শ্ৰেণী আৰু বিষয়ৰ বাবে ছপা কৰা প্ৰায় ৩২ হাজাৰ নকল এনচিইআৰটি কিতাপ তাত উদ্ধাৰ হয়। ইয়াৰ লগতে জব্দ কৰা হৈছে দুটা ছপা মেচিন, এলুমিনিয়াম প্লেট, কাগজৰ ৰোল আৰু ছপাৰ চিয়াঁহী। তাতেই চলি আছিল বৃহৎ অবৈধ ছপাৰ কাম।
পূৰ্বৰ এটা গোচৰৰ ভিত্তিত এই অভিযান চলাইছিল। ২০২৫ চনৰ ১১ নৱেম্বৰত দিল্লী আৰক্ষীৰ ক্ৰাইম ব্ৰাঞ্চত ৰুজু হৈছিল এই গোচৰ। ভাৰতীয় দণ্ডবিধি আৰু কপিৰাইট আইন, ১৯৫৭ৰ অধীনত এই গোচৰ ৰুজু কৰা হৈছিল।
অভিযানৰ সময়ত এনচিইআৰটিৰ প্ৰকাশন বিভাগৰ বিষয়াসকলো উপস্থিত থাকে। কোনবোৰ কিতাপ নকল সেইটো চিনাক্ত কৰাত তেওঁলোকে আৰক্ষীক সহায় কৰিছিল।এনচিইআৰটিয়ে কয় যে অনুমতি অবিহনে তেওঁলোকৰ পাঠ্যপুথি ছপা, বিক্ৰী বা বিতৰণ কৰাটো আইনী অপৰাধ।
সংস্থাটোৰ মতে, এনে অবৈধ ছপাশালে কেৱল কপিৰাইট আইন উলংঘা কৰাই নহয়, ছাত্ৰ-ছাত্ৰীৰ ক্ষতিও কৰে। কাৰণ ভুৱা কিতাপত প্ৰায়ে ভুল তথ্য থাকে আৰু কাগজ আৰু ছপাৰ মানদণ্ডও বেয়া। সেয়েহে এনচিইআৰটিয়ে অভিভাৱক আৰু ছাত্ৰ-ছাত্ৰীক কেৱল অনুমোদিত বিক্ৰেতাৰ পৰাহে কিতাপ ক্ৰয় কৰিবলৈ পৰামৰ্শ দিছে।
ইপিনে, ৰাজ্যসভাত দাখিল কৰা তথ্য অনুসৰি এনচিইআৰটিত কৰ্মচাৰীৰ অভাৱ এটা ডাঙৰ সমস্যা হৈ পৰিছে। মুঠ ২৮৪৪টা অনুমোদিত পদৰ ভিতৰত মাত্ৰ ১২১৯টা পদহে পূৰণ হয়। ফলত গ্ৰুপ এ, বি, আৰু চি মিলি প্ৰায় ১৬২৫ টা পদ এতিয়া খালী হৈ পৰি আছে।
