ন্যায় ব্যৱস্থাক লৈ বিতৰ্কিত পাঠ্যক্ৰম প্ৰকাশ কৰি দেশজুৰি তীব্ৰ প্ৰতিক্ৰিয়াৰ সৃষ্টি কৰা এনচিইআৰটিয়ে অৱশেষত বিতৰ্কিত কিতাপখন প্ৰত্যাহাৰ কৰিছে। অহা ১১ মাৰ্চত উচ্চতম ন্যায়ালয়ত অনুষ্ঠিত হ’বলগীয়া শুনানিৰ এদিন পূৰ্বে মঙলবাৰে সামাজিক মাধ্যমযোগে এক বিবৃতি প্ৰকাশ কৰি অষ্টম শ্ৰেণীৰ সমাজ বিজ্ঞানৰ পাঠ্যপুথিখনত থকা ভুলৰ বাবে প্ৰতিষ্ঠানটোৱে ক্ষমা বিচাৰে।
সামাজিক মাধ্যম ‘এক্স’ যোগে এক আনুষ্ঠানিক বিবৃতি প্ৰকাশ কৰি এনচিইআৰটিয়ে জনায় যে শেহতীয়াকৈ প্ৰকাশিত অষ্টম শ্ৰেণীৰ সমাজ বিজ্ঞানৰ নতুন পাঠ্যপুথি “Exploring Society: India and Beyond”ৰ এটা নিৰ্দিষ্ট অধ্যায়ত গুৰুতৰ ত্ৰুটি ৰৈ গৈছিল। ‘সমাজত ন্যায়ালয়ৰ ভূমিকা’ শীৰ্ষক এই অধ্যায়টোত থকা ভুলৰ বাবে প্ৰতিষ্ঠানটোৰ নিৰ্দেশকসহ সকলো সদস্যই নিঃচৰ্ত ক্ষমা বিচাৰিছে। বিবৃতিটোত স্পষ্টকৈ উল্লেখ কৰা হৈছে যে উক্ত কিতাপখন ইতিমধ্যে সম্পূৰ্ণৰূপে বাতিল কৰা হৈছে আৰু বৰ্তমান ক’তো উপলব্ধ নহয়। এই সন্দৰ্ভত সৃষ্টি হোৱা অসুবিধাৰ বাবে ক্ষমাপ্ৰাৰ্থনা কৰি পৰিষদখনে কয়, “দেশত শৈক্ষিক পৰিৱেশ সুস্থ কৰি ৰখাৰ স্বাৰ্থত এনচিইআৰটি শুদ্ধ, দায়িত্বসম্পন্ন আৰু সংবেদনশীল হৈ থকাৰ পণত অটল আছে আৰু থাকিব।”
উল্লেখ্য যে, কেন্দ্ৰীয় পাঠ্যপুথিখনৰ উক্ত অধ্যায়টোত ন্যায় ব্যৱস্থাত চলি থকা দুৰ্নীতি আৰু আদালতত দীৰ্ঘদিন ধৰি নিষ্পত্তি নোহোৱাকৈ পৰি ৰোৱা গোচৰসমূহৰ বিষয়ে মুকলিকৈ উল্লেখ কৰা হৈছিল। এই বিষয়টো পোহৰলৈ অহাৰ লগে লগে দেশৰ ন্যায়পালিকাই ইয়াৰ তীব্ৰ বিৰোধিতা কৰে আৰু সমগ্ৰ দেশজুৰি চৰ্চাৰ সৃষ্টি হয়। পৰিস্থিতিৰ গুৰুত্ব উপলব্ধি কৰি উচ্চতম ন্যায়ালয়ে নিজাববীয়াকৈ (suo motu) গোচৰ ৰুজু কৰি পাঠ্যপুথিখনৰ প্ৰকাশ আৰু বিক্ৰীৰ ওপৰত তৎকালীন নিষেধাজ্ঞা জাৰি কৰিছিল। পৰৱৰ্তী সময়ত পৰিস্থিতি নিয়ন্ত্ৰণলৈ আনিবলৈ এনচিইআৰটিয়ে বিতৰণ কৰা সকলো কিতাপ ঘূৰাই দিবলৈ নিৰ্দেশনা জাৰি কৰিবলৈ বাধ্য হৈছিল।
এই সমগ্ৰ বিতৰ্কক লৈ উচ্চতম ন্যায়ালয়ে তীব্ৰ অসন্তুষ্টি ব্যক্ত কৰি কঠোৰ স্থিতি গ্ৰহণ কৰিছিল। যোৱা ২৬ ফেব্ৰুৱাৰীত এই গোচৰৰ শুনানি গ্ৰহণ কৰি ন্যায়ালয়ে এনচিইআৰটিৰ নিৰ্দেশক আৰু কেন্দ্ৰীয় বিদ্যালয় শিক্ষা বিভাগৰ সচিবলৈ কাৰণ দৰ্শোৱাৰ জাননীও জাৰি কৰিছিল।
