১২৬ জনীয়া অসম বিধানসভাৰ ১০২খন আসন লাভ কৰি দুই তৃতীয়াংশ সংখ্যগৰিষ্ঠতা অতিক্ৰম কৰি ৰাজ্যৰ ভিতৰতে অন্যতম শক্তিশালী প্ৰদৰ্শন আগবঢ়াই অসমত একেৰাহে তৃতীয়বাৰৰ বাবে ক্ষমতালৈ ঘূৰি আহিছে নেশ্যনেল ডেম’ক্ৰেটিক এলায়েন্স (এনডিএ)।
ভাৰতীয় জনতা পাৰ্টিয়ে প্ৰতিদ্বন্দ্বিতা কৰা ৯০খন আসনৰ ভিতৰত ৮২খন আসনত জয়ী হৈ প্ৰথমবাৰৰ বাবে নিজাববীয়াকৈ সংখ্যাগৰিষ্ঠতা লাভ কৰি প্ৰধান শক্তি হিচাপে আত্মপ্ৰকাশ কৰে। ইয়াৰ মিত্ৰ দল অসম গণ পৰিষদ আৰু বড়োলেণ্ড পিপলছ ফ্ৰণ্টে ১০খনকৈ আসন লাভ কৰি মিত্ৰজোঁটৰ শক্তি সুদৃঢ় কৰি তুলিছে।
এই ফলাফল ২০১৬ আৰু ২০২১ দুয়োটা নিৰ্বাচনতে ৬০খন আসন লাভ কৰা বিজেপিৰ বাবে এক উল্লেখযোগ্য সফলতা। শেহতীয়া ফলাফলে অঞ্চলসমূহৰ মাজত ইয়াৰ সমৰ্থন ভিত্তিৰ ব্যাপকতাকে তুলি ধৰিছে।
ভাৰতীয় জাতীয় কংগ্ৰেছৰ নেতৃত্বত বিৰোধীয়ে যোৱা কিছু বছৰত এক দুৰ্বল প্ৰদৰ্শন দাঙি ধৰি আহিছে। ৯৯খন আসনত প্ৰতিদ্বন্দ্বিতা কৰি দলটোৱে মাত্ৰ ১৯খন আসনত জয়ী হ’বলৈ সক্ষম হয়। ইয়াৰ মিত্ৰ দলৰ ফলাফলো অত্যন্ত হতাশাজনক। অল ইণ্ডিয়া ইউনাইটেড ডেম’ক্ৰেটিক ফ্ৰণ্ট আৰু ৰাইজৰ দলে দুখনকৈ আসন লাভ কৰাৰ বিপৰীতে সৰ্বভাৰতীয় তৃণমূল কংগ্ৰেছে এখন আসন লাভ কৰে। অসম জাতীয় পৰিষদ, চি পি আই (এম) আৰু এ পি এইচ এল চিকে ধৰি অন্যান্য মিত্ৰজোঁটৰ অংশীদাৰসকলে কোনো আসন লাভ কৰিব নোৱাৰিলে।
কংগ্ৰেছ প্ৰাৰ্থী বিদিশা নেওগক ৮৯,৪৩৪ ভোটত পৰাস্ত কৰি একেৰাহে ষষ্ঠবাৰৰ বাবে জালুকবাৰী সমষ্টি নিজৰ হাতত ৰাখিলে মুখ্যমন্ত্ৰী হিমন্ত বিশ্ব শৰ্মাই। কংগ্ৰেছৰ বাবে এক গুৰুত্বপূৰ্ণ বিপৰ্যয় হিচাপে বিবেচিত ৰাজ্যিক সভাপতি গৌৰৱ গগৈয়ে যোৰহাটৰ আসনখন বিজেপিৰ হিতেন্দ্ৰনাথ গোস্বামীৰ হাতত ২৩,১৮১টা ভোটত পৰাস্ত হয়।
অজন্তা নেওগ, ৰানোজ পেগু, পীযুশ হাজৰিকা, অশোক সিংঘালকে ধৰি কেইবাগৰাকীও বিজেপিৰ জ্যেষ্ঠ নেতা-মন্ত্ৰীয়ে নিজৰ আসনবোৰ অক্ষুণ্ণ ৰাখিছে। তামুলপুৰৰ পৰা বিধানসভাৰ অধ্যক্ষ বিশ্বজিৎ দৈমাৰীয়ে ইউ পি পি এলৰ নেতা প্ৰমোদ বড়োক পৰাস্ত কৰি জয়লাভ কৰে। বিজেপিৰ একাধিক বৰ্তমানৰ বিধায়কে সমষ্টিসমূহৰ মাজত পুনৰ বিজয় নিশ্চিত কৰি দলটোৰ স্থিতি আৰু অধিক শক্তিশালী কৰি তুলিছে।
বিজেপি মিত্ৰদলৰ ভিতৰত অগপ নেতা অতুল বৰা আৰু কেশৱ মহন্তই ক্ৰমে বোকাখাত আৰু কলিয়াবৰ ধৰি ৰখাৰ বিপৰীতে চৰণ বড়ো আৰু সেউলী মহিলাৰীকে ধৰি বিপিএফৰ প্ৰাৰ্থীয়ে বড়োলেণ্ড অঞ্চলৰ গুৰুত্বপূৰ্ণ সমষ্টিসমূহ ধৰি ৰাখিছে।
কংগ্ৰেছৰ বিজয়ীসকলৰ ভিতৰত ৱাজেদ আলী চৌধুৰী, জাকিৰ হুছেইন ছিকদাৰ আৰু ৰেকিবুদ্দিন আহমেদ আদি আছে যদিও দলটোৰ সামগ্ৰিক সংখ্যা সীমিত হৈ ৰৈছে। বিন্নকান্দিৰ পৰা এআইইউডিএফৰ মুৰব্বী বদৰুদ্দিন আজমলে জয়লাভ কৰাৰ বিপৰীতে ৰাইজৰ দলৰ নেতা অখিল গগৈয়ে শিৱসাগৰ ধৰি ৰাখিছে।
বিৰোধী দলৰ নেতা দেৱব্ৰত শইকীয়া আৰু অসম জাতীয় পৰিষদৰ সভাপতি লুৰিণজ্যোতি গগৈকে ধৰি বিৰোধী দলৰ কেইবাগৰাকীও বিশিষ্ট নেতাই জয়ৰ মুখ নেদেখিলে।
এইবাৰ মহিলাৰ প্ৰতিনিধিত্ব কম হৈয়েই থাকিল, ৫৯ গৰাকী মহিলা প্ৰাৰ্থীৰ ভিতৰত মাত্ৰ ছয়গৰাকীহে নিৰ্বাচিত হয়। বিজয়ী চাৰিগৰাকী বিজেপিৰ আৰু অগপ, বিপিএফ আৰু কংগ্ৰেছৰ পৰা এজনকৈ বিজয়ী হৈছে।
যোৱা ৯ এপ্ৰিলত ৰাজ্যৰ ১২৬টা সমষ্টিৰ আটাইকেইটা সমষ্টিৰ বাবে এটা পৰ্যায়ত ভোটগ্ৰহণ অনুষ্ঠিত হৈছিল, য’ত ৭২২ জন প্ৰাৰ্থীয়ে প্ৰতিদ্বন্দ্বিতা কৰিছিল। এই ফলাফলে এন ডি এৰ বাবে নিৰ্ণায়ক জনাদেশৰ ইংগিত দিয়াৰ লগতে ৰাজ্যখনত বিৰোধীৰ স্থিতি হ্ৰাস পোৱাক লৈ উদ্বেগ প্ৰকাশ পাইছে।
