কেন্দ্ৰ চৰকাৰেৰে শান্তি আলোচনাত বহাৰ উদ্দেশ্যে বড়ো বিদ্ৰোহী গোট এনডিএফবি (এছ)ৰ সকলো নেতা আৰু কেডাৰে ম্যানমাৰৰ পৰা আহি ভাৰতত প্ৰৱেশ কৰাৰ খবৰ আহিছে।
‘শনিবাৰে পুৱা NDFB(S)ৰ গোটেই ৫০গৰাকী সদস্যই ম্যানমাৰৰ পৰা গুচি আহে। ভাৰতীয় সেনাই নেতা আৰু কেডাৰসকলক আন্তঃৰাষ্ট্ৰীয় সীমান্তৰ পৰা সুৰক্ষা দি সেনাৰ এক গোপন শিবিৰলৈ লৈ আহে।‘ News18ৰ আগত নাম গোপনে ৰখা সংগঠনটোৰ এজন শীৰ্ষ নেতাই কয়।
জানিব পৰা মতে NDFB(S)ৰ অধ্যক্ষ বি চাইৰাগ্ৰাই পৰিয়ালসহ তেওঁৰ দেহৰক্ষীৰ সৈতে সীমা পাৰ হৈ মণিপুৰৰ তামুত প্ৰৱেশ কৰাৰ বিপৰীতে সংগঠনটোৰ স্ব-ঘোষিত সম্পাদক বি ফেৰেংগাকে ধৰি আন আন নেতা আৰু কেডাৰসকলে নাগালেণ্ডৰ লংলে হৈ ভাৰতত প্ৰৱেশ কৰে।
অৱশ্যে এই পৰ্যন্ত অসম আৰক্ষীয়ে এই সম্পৰ্কে কোনো মন্তব্য কৰা নাই। এক সূত্ৰৰ মতে গৃহ মন্ত্ৰ্যয়ালয়ে প্ৰত্যক্ষভাৱে ইয়াৰ নিৰীক্ষণ কৰি আছে। সূত্ৰটোৰ মতে সংগঠনটোৰ শীৰ্ষ নেতাসকলক আলোচনাৰ বাবে দিল্লীলৈ লৈ যোৱা হ’ব।
উল্লেখযোগ্য যে ২০১৯ চনৰ মাৰ্চত NDFB(S)ৰ স্ব-ঘোষিত বৈদেশিক সম্পাদক নে এছেৰা ইভাঞ্জেলে তেওঁৰ দেহৰক্ষীৰ সৈতে নিৰাপত্তাৰক্ষীৰ ওচৰত আত্মসমৰ্পন কৰিছিল।
ইফালে NDFB(S) গোটে শান্তি আলোচনাৰ বাবে ভাৰতলৈ ঘুৰি অহাৰ খবৰ সংবাদ মাধ্যমত প্ৰকাশ পোৱাৰ পিছতে বড়ো ছাত্ৰ সন্থা (ABSU) আৰু ৰাজ্যৰ সমাজ কল্যাণ মন্ত্ৰী প্ৰমীলা ৰাণী ব্ৰহ্মই ইয়াক আদৰণি জনাইছে।
ABSUৰ সাধাৰণ সম্পাদক লৰেঞ্চ ইশ্বলাৰিয়ে সাংবাদিকৰ আগত NDFB(S)ৰ সহস্ত্ৰ গোটক মূলসূঁতিলৈ অনাৰ বাবে ভাৰত চৰকাৰে গ্ৰহণ কৰা ভূমিকাক আদৰণি জনাই বড়োসকলৰ দীৰ্ঘদিনিয়া ৰাজনৈতিক সমস্যাক সমাধান কৰিবলৈ আহ্বান জনায়।
আনহাতে সমাজ কল্যাণ মন্ত্ৰী তথা BPFৰ নেত্ৰী প্ৰমীলা ৰাণী ব্ৰহ্ময়ো ভাৰত চৰকাৰৰ সৈতে আলোচনাৰ বাবে বিদ্ৰোহী গোটটোৱে দেখুৱা আগ্ৰহক আদৰণি জনাই কয় যে এইক্ষেত্ৰত BTCৰ প্ৰধান হাগ্ৰামা মহিলাৰীৰ ভূমিকা আছে।
তেওঁ আলফা(স্বা) আৰু কাৰ্বি বিদ্ৰোহী গোট KLOকো শান্তি আলোচনালৈ আগবাঢ়ি আহিবলৈ আহ্বান জনায়।
