অৰুণাচল প্ৰদেশৰ নামনি সোৱণশিৰিৰ ৰঙানদী জলবিদ্যুৎ প্ৰকল্পৰ পানী নীপকোৱে ১ ফেব্ৰুৱাৰিৰ পৰা এৰিবলৈ সাজু হৈছে। ১ ফেব্ৰুৱাৰিৰ পৰা ৩০ এপ্ৰিললৈ ৰঙানদী জলবিদ্যুৎ প্ৰকল্পটো মেৰামতিৰ বাবে নীপকো কৰ্তৃপক্ষই তিনি মাহলৈ সাময়িকভাৱে উৎপাদন বন্ধ কৰি দিয়াৰ পৰিপ্ৰেক্ষিতত এই পানী মুকলি কৰি দিব।
অৰুণাচল প্ৰদেশৰ শক্তি মন্ত্ৰী টামিঅ’ টাগাই এখন সংবাদমেলযোগে জানিবলৈ দিয়ে যে ৰঙানদী জলবিদ্যুৎ প্ৰকল্পৰটো বন্ধ কৰি দিয়াটো ইয়াৰ জৰুৰী মেৰামতিৰ বাবে অপৰিহাৰ্য। তেওঁ এই সংকটপূৰ্ণ তিনিমাহ কাল ৰাইজক সহযোগিতা আগবঢ়াবলৈ আহ্বান জনায়।
আনহাতে, অৰুণাচলৰ নামনি অংশৰ লগতে উত্তৰ অসমত পুনৰ নীপকোৱে এৰি দিয়া বান্ধৰ পানীয়ে মহাপ্ৰলয় সৃষ্টি কৰাৰ আশংকা বৃদ্ধি পাইছে। কিয়নো ৰঙানদীৰ এৰি দিয়া পানীয়ে প্ৰতিবছৰেই উত্তৰ অসমত সৃষ্টি কৰি অহা মহাপ্ৰলয়ৰ প্ৰতি লক্ষ্য ৰাখি উত্তৰপৰীয়া ৰাইজ শংকিত হৈ আছে।
উল্লেখযোগ্য যে যোৱা ২৫ জানুৱাৰিত ৰঙানদী বান্ধটো মেৰামতিৰ বাবে পহিলা ফেব্ৰুৱাৰিৰ পৰা তিনি মাহলৈ উৎপাদন বন্ধ কৰি দিয়া সন্দৰ্ভত নীপকো কৰ্তৃপক্ষই জাননী জাৰি কৰিছিল।
উক্ত জাননীখনত মেৰামতিৰ সময়ছোৱাত ঘৰচীয়া জীৱ-জন্তুৰ লগতে নৈপৰীয়া ৰাইজক ৰঙানদী আৰু ডিক্ৰঙৰ পাৰলৈ নাযাবলৈ নীপকো কৰ্তৃপক্ষই সতৰ্ক কৰি দিছিল। তদুপৰি, সেই সময়ছোৱাত কিবা দুৰ্ঘটনা হ’লে নীপকো কৰ্তৃপক্ষ দায়ী নহয় বুলিও জাননীখনত স্পষ্ট কৰি দিছিল।
আনহাতে, বিগত ২০১৭ চনৰ জুলাইত ৰঙানদী প্ৰকল্পৰ পানী হঠাতে এৰি দিয়াৰ ফলত এটা বান্ধ ভাঙি ১১ জনকৈ লোকৰ মৃত্যু হোৱাৰ লগতে লখিমপুৰত মহাপ্ৰলয়ৰ সৃষ্টি কৰিছিল।
