GMCH ত পুনৰ বাৰ উন্মোচিত হৈছে ক’ৰ’না ৰোগীৰ প্ৰতি অৱহেলা কৰাৰ প্ৰতিচ্ছবি।
চিকিঁৎসালয়ৰ কৰ্তৃপক্ষৰ বিৰুদ্ধে NRHMৰ অধীনত কৰ্মৰত আশাকৰ্মীৰ জীয়ৰীয়ে আনিছে এই গুৰুতৰ অভিযোগ।
সবিতা দে নামৰ ক’ৰ’না আক্ৰান্ত আশাকৰ্মীৰ জিয়ৰী সুপ্ৰিয়া দেই সংবাদ মাধ্যমৰ আগত কৰা অভিযোগ অনুসৰি তেওঁৰ মাতৃক গৃহৰ পৰা ১০৮ সেৱাৰ কৰ্মচাৰীয়ে GMCH ৰ গেটৰ সন্মুখত অকলে এৰি থৈ গুচি যায়।
“মোৰ মাক লৈ গৈ ১০৮ য়ে গুৱাহাটী চিকিৎসা মহাবিদ্যালয়ৰ গেটৰ সন্মুখত এৰি গৈছিল৷ চিকিৎসাললৈ নিয়াৰ পিছতো তেওঁ প্ৰথমে কোনো উন্নত চিকিৎসা পোৱা নাই।” সুপ্ৰিয়াই সংবাদ মাধ্যমৰ আগত এনেদৰে কয়।
ইপিনে দেওবাৰে ৮ বজাত মাকৰ ক’ৰ’না পজিটিভ অহা বুলি উল্লেখ কৰি সুপ্ৰিয়াই লগতে কয়, “মোৰ মাৰ ২৩ জুনত স্বাৱ টেষ্ট কৰিছিল৷ ঘৰতে কোৱাৰেন্টাইন হৈ থকা মোৰ মাক দেওবাৰে স্বাস্থ্য বিভাগৰ পৰা ফোন কৰি কৈছিল যে আমি পিছদিনা লৈ যাম।”
“ৰিপৰ্ট কেনেকৈ পাম বুলি তেওঁলোকক প্ৰশ্ন কৰাত ক’লে ১০৮ ৰ মানুহে লৈ আহিব ৰিপ’ৰ্টটো৷ কিন্তু ১০৮ সেৱাৰ মানুহে মোক ৰিপ’ৰ্টটো নেদেখালে। ইমান বিচাৰিলো কিন্তু একো সঁহাৰি নজনালে।” সুপ্ৰিয়াই এইদৰে কয়।
তাৎপৰ্য্যপূৰ্ন ভাবে এঘন্টাৰ পিছত ৰিপ’ৰ্ট দিম বুলি কৈ দুদিন পাৰ হৈ যোৱা পিচতো বাতৰি লিখা পৰ্যন্ত পৰিয়ালৰ হাতত নপৰিল ৰিপ’ৰ্ট।
নিয়ম অনুসৰি ক’ৰ’নাত আক্ৰান্ত হ’লে ৰিজাল্টৰ প্ৰতিবেদন পৰিয়ালৰ লোকে দিনটোৰ ভিতৰতে লাভ কৰিব লাগে।
কিন্তু অতি ৰহস্যজনক ভাবে সুস্থ হৈ উঠাৰ পাছতহে স্বাস্থ্য বিভাগে প্ৰতিবেদন দিয়া হ’ব বুলি জনালে সুপ্ৰিয়া দেক।
অৱশ্যে প্ৰায় দুঘন্টা পিছত কোভিড কক্ষত ভৰ্তি কৰা হয় সবিতাক।
ইপিনে এই ঘটনা সম্পৰ্কত গুৱাহাটী চিকিৎসা মহাবিদ্যালয়ৰ অধীক্ষক অভিজিৎশৰ্মাৰ লগত যোগাযোগ কৰা হয় যদিও প্ৰতিক্ৰিয়া প্ৰকাশৰ পৰা বিৰত থাকে।
GMCHত সংঘটিত হোৱা এয়াই প্ৰথম ঘটনা নহয়। পূৰ্বেও ৰোগীক অৱহেলা কৰা ঘটনা পোহৰলৈ আহিছিল।
ঘটনা মহামাৰী সময়ত জনসাধাৰণৰ সুৰক্ষা বাবে দিনে ৰাতিয়ে কাম কৰি অহা এই গৰাকী আশাকৰ্মী ক্ষেত্ৰত হোৱা এনে ধৰনৰ ঘটনা সংঘটিত হোৱাৰ ফলত পৰিয়ালৰ লগতে আন সতীৰ্থ আশাকৰ্মীয়ে দুখ প্ৰকাশ কৰিছে৷