দেওবাৰে টি-টুৱেণ্টি ক্ৰিকেটৰ ইতিহাসত এক নতুন অধ্যায়ৰ সূচনা কৰি নেপালে চীনৰ বিৰুদ্ধে ৩১৩ ৰানৰ বিশাল স্ক’ৰ থিয় কৰাবলৈ সক্ষম হয়। এই মেচখনত নেপালৰ তাৰকা বেটছমেন কুশল ভুৰটেলে চীনৰ বলাৰ চেন ঝুৱেৰ এক অভাৰত ক্ৰমাগতভাৱে ছটা ছিক্সাৰ কোবাই সমগ্ৰ ক্ৰীড়ামহলত তীব্ৰ চাঞ্চল্যৰ সৃষ্টি কৰিছে। এই বিৰল প্ৰদৰ্শনেৰে তেওঁ ভাৰতীয় কিংবদন্তি যুৱৰাজ সিঙৰ অভিলেখ স্পৰ্শ কৰাৰ লগতে নেপালক ২২১ ৰানৰ এক বৃহৎ জয়লাভত অৰিহণা যোগায়।
মেচখনৰ আৰম্ভণিতে নেপালে এটা উইকেট সোনকালে হেৰুৱাইছিল যদিও ইয়াৰ কোনো চাপ দলটোৰ ওপৰত পৰিবলৈ নিদিলে কুশল ভুৰটেলে। আৰম্ভণিৰে পৰা আক্ৰমণাত্মক ক্ৰিকেট খেলি তেওঁ মাত্ৰ ৪৩ টা বলত ৫ টা বাউণ্ডেৰী আৰু ১৬ টা বিশাল ছিক্সাৰেৰে ১২৯ ৰানৰ এক বিধ্বংসী ইনিংছ উপহাৰ দিয়ে। তেওঁৰ লগতে ৰোহিত পৌডেলে ২১ বলত ৬৯ ৰান আৰু কুশল মল্লাই ৪৭ বলত ৮৫ ৰানৰ গুৰুত্বপূৰ্ণ বৰঙণি আগবঢ়ায়, যাৰ ফলত নেপালে নিৰ্ধাৰিত অভাৰত ৬ উইকেটৰ বিনিময়ত ৩১৩ ৰান সংগ্ৰহ কৰে।
কুশল ভুৰটেলে চীনৰ বলাৰ চেন ঝুৱেৰ অভাৰটোত এই ইতিহাস ৰচনা কৰে। উক্ত অভাৰটোত বলাৰজনে এটা ৱাইড বল দিয়াৰ ফলত মুঠ ৩৭ ৰান সংগ্ৰহ হয়, যিটো ক্ৰিকেট ইতিহাসত এক অভাৰত দ্বিতীয় সৰ্বোচ্চ ৰান হিচাপে পৰিগণিত হৈছে। আন্তঃৰাষ্ট্ৰীয় টি-টুৱেণ্টি ক্ৰিকেটত এক অভাৰত ছটা ছিক্সাৰ কোবোৱা পঞ্চমগৰাকী বেটছমেন হিচাপে পৰিগণিত হ’ল কুশল ভুৰটেল। ইয়াৰ পূৰ্বে ২০০৭ চনত ভাৰতৰ যুৱৰাজ সিঙে ইংলেণ্ডৰ বিৰুদ্ধে প্ৰথমবাৰৰ বাবে এই বিৰল কৃতিত্ব অৰ্জন কৰিছিল। পৰৱৰ্তী সময়ত ৱেষ্ট ইণ্ডিজৰ কায়ৰণ প’লাৰ্ড, নেপালৰ দীপেন্দ্ৰ সিং ঐৰী আৰু জিব্ৰাল্টাৰৰ মনন বছিৰে এই অভিলেখ গঢ়িবলৈ সক্ষম হৈছিল।
এই ঐতিহাসিক মেচখনত নেপালে চীনক ২২১ ৰানৰ বৃহৎ ব্যৱধানত পৰাস্ত কৰে। উল্লেখযোগ্য যে, ক্ৰিকেট ইতিহাসত টি-টুৱেণ্টি ফৰ্মেটত দুবাৰকৈ তিনিশৰ অধিক ৰান সংগ্ৰহ কৰা বিশ্বৰ একমাত্ৰ দল হিচাপে নেপালে পৰিচয় লাভ কৰিছে। ইয়াৰ পূৰ্বে ২০২৩ চনৰ ছেপ্টেম্বৰ মাহত মংগোলিয়াৰ বিৰুদ্ধে নেপালে ৩১৪ ৰান সংগ্ৰহ কৰিছিল। বৰ্তমানলৈকে বিশ্বৰ মাত্ৰ চাৰিটা দলেহে টি-টুৱেণ্টি ক্ৰিকেটত ৩০০ ৰানৰ সীমা অতিক্ৰম কৰিবলৈ সক্ষম হৈছে। এই অভিলেখসমূহে ক্ৰমাগতভাৱে টি-টুৱেণ্টি ক্ৰিকেট যে বেটছমেনসকলৰ আধিপত্যৰ খেললৈ ৰূপান্তৰিত হৈছে, তাকেই পুনৰবাৰ প্ৰমাণ কৰিছে।
