তিনিদিনীয়া ভ্ৰমণ সূচীলৈ আজি ভাৰতৰ ৰাজধানী দিল্লীত উপস্থিত হৈছে নেপালৰ বৈদেশিক পৰিক্ৰমা মন্ত্ৰী প্ৰদীপ কুমাৰ গ্যাৱালী।
এই ভ্ৰমণ সূচীত নেপালৰ বৈদেশিক মন্ত্ৰী গৰাকীয়ে ভাৰত-নেপাল যুটীয়া আয়ুক্তৰ বৈঠকত অংশগ্ৰহণ কৰিব।
এই বৈঠকৰ সময়ত নেপালৰ বৈদেশিক মন্ত্ৰী গৰাকীয়ে ভাৰতৰ বৈদেশিক পৰিক্ৰমা মন্ত্ৰী এছ জয়শংকৰৰ সৈতে কোভিডৰ প্ৰস্তুতিকে সামৰি সীমান্ত কেন্দ্ৰীক বিষয় আৰু দ্বিপাক্ষিক সম্পৰ্কত আলোচনাত অংশগ্ৰহণ কৰিব।
আনহাতে, এই বৈঠকত নেপাল-ভাৰতৰ দ্বিপাক্ষিক বিষয়, বাণিজ্য, শক্তি, আন্তঃগাথনি, সংযোগ ব্যৱস্থা, কৃষি, পৰ্যটন, সংস্কৃতি আদি প্ৰসংগতো আলোচনা কৰা হ’ব।
নেপালৰ বৈদেশিক মন্ত্ৰী গৰাকীৰ সৈতে নেপালৰ বৈদেশিক সচিৱ ভাৰত ৰাজ পুৱেল আৰু স্বাস্থ্য আৰু জনসংখ্যা মন্ত্ৰী লক্ষ্মী আৰয়ালো ভাৰতত উপস্থিত হৈছে।
ভাৰত আৰু নেপালৰ মাজত বিগত সময়ত দ্বিপাক্ষিক সম্পৰ্কৰ অৱনতি ঘটাৰ সময়তে নেপালৰ বৈদেশিক মন্ত্ৰীৰ এই ভাৰত ভ্ৰমণ সূচীয়ে যথেষ্ট তাৎপৰ্য্য বহন কৰিছে।
