উত্তৰ-পূবৰ সকলো ৰাজ্যতে এন আৰ চি ৰূপায়ণৰ দাবীৰে ৰাজনাথ সিঙক সাক্ষাৎ নেছ’ৰ
উত্তৰ-পূবৰ সকলো ৰাজ্যতে এন আৰ চি ৰূপায়ণ কৰাৰ লগতে নাগৰিকত্ব সংশোধনী বিধেয়ক গৃহীত নকৰিবলৈ কেন্দীয় চৰকাৰক দাবী জনাই উত্তৰ-পূব ছাত্ৰ সন্থা চমুকৈ নেছ’ৱে।
১০ ছেপ্তেম্বৰত নেছ’ৰ উপদেষ্টা সমুজ্জ্বল কুমাৰ ভট্টাচাৰ্যৰ নেতৃত্বত যোৱা এটা ১৫ জনীয়া প্ৰতিনিধি দলে নতুন দিল্লীত কেন্দ্ৰীয় গৃহ মন্ত্ৰী ৰাজনাথ সিঙৰ লগতে গৃহ ৰাজ্য মন্ত্ৰী কিৰেণ ৰিজিজুক পৃথকে পৃথকে লগ ধৰি তেওঁলোকৰ আঠদফীয়া দাবী চনদ প্ৰদান কৰে।
আছুৰ সভাপতি দিপাংকৰ নাথে নৰ্থ-ইষ্ট নাওক কয়, ‘আমি অবৈধ বাংলাদেশীৰ প্ৰব্ৰজনৰ সমস্যা সমাধানৰ উদ্দেশ্যে উত্তৰ-পূবৰ সকলো ৰাজ্যতে এন আৰি চি ৰূপায়ণৰ লগতে অঞ্চলটোৰ ৮টা জলন্ত সমস্যা উত্থাপন কৰোঁ।‘
উত্তৰ-পূবৰ ৰাজ্যকেইখনৰ ৮টা ভিন্ন ছাত্ৰ সংগঠনৰ প্ৰতিনিধিয়ে প্ৰদান কৰা স্মাৰক-পত্ৰত উত্তৰ-পূবৰ বাবে পৃথক সময় মণ্ডল নিৰ্দ্ধাৰণ কৰা, ব্ৰহ্মপুত্ৰৰ লগতে শেহতিয়াকে হোৱা ছিয়াং নৈৰ প্ৰদুৰ্শনৰ বিষয়টো উত্থাপন কৰা, উত্তৰ-পূবৰ বান সমস্যাক ৰাষ্ট্ৰীয় সমস্যা হিচাপে ঘোষণা কৰাৰ লগতে সীমান্তৰ পৰা হৈ থকা প্ৰব্ৰজন ৰোধ কৰাৰ ক্ষেত্ৰত কঠোৰ ব্যৱস্থা গ্ৰহণ কৰাৰ দাবী তোলে।