জনপ্ৰিয় শিল্পী জুবিন গাৰ্গ আমাৰ মাজৰ পৰা কায়িকভাৱে আঁতৰি যোৱাক আজি ছমাহ সম্পূৰ্ণ হ’ল। শিল্পীগৰাকীৰ মৃত্যুৰ ৰহস্যক লৈ এতিয়াও ন্যায়ৰ অপেক্ষাত আছে তেওঁৰ পৰিয়ালৰ লগতে সমগ্ৰ অসমবাসী। বিষয়টো বৰ্তমান আদালতৰ বিচাৰাধীন হৈ থকাৰ সময়তে আজি জুবিনক্ষেত্ৰত ভাগৱত পাঠ আৰু নাম-প্ৰসংগৰ জৰিয়তে তেওঁক স্মৰণ কৰা হৈছে। অৱশ্যে এই পবিত্ৰ দিনটোৰ সমান্তৰালকৈ জুবিনক্ষেত্ৰৰ বৰ্তমানৰ অৱস্থাক লৈ সামাজিক মাধ্যমত তীব্ৰ প্ৰতিক্ৰিয়াৰ সৃষ্টি হৈছে।
শেহতীয়াকৈ হোৱা মূষলধাৰ বৰষুণৰ ফলত জুবিনক্ষেত্ৰৰ অৱস্থা অতি শোচনীয় হৈ পৰিছে। চৰকাৰৰ তৰফৰ পৰা দিয়া তম্বুসমূহ উৱলি যোৱাত জুবিনক্ষেত্ৰত পানী পৰিবলৈ ধৰিছিল, যাৰ ফলত অনুৰাগীয়ে দিয়া বহু উপহাৰ নষ্ট হোৱাৰ উপক্ৰম হৈছিল। পৰৱৰ্তী সময়ত জুবিনৰ পৰিয়াল আৰু ফেন ক্লাবে মিলি কোনোমতে সেই স্থানত ত্ৰিপাল আঁৰি সকাহ দিয়াৰ ব্যৱস্থা কৰে। এই বিষয়টোৱে এতিয়া সামাজিক মাধ্যমত চৰ্চা লাভ কৰিছে।
এই ঘটনাক লৈ আৱেগিক হৈ পৰিছে শিল্পীগৰাকীৰ ভগ্নী পামী বৰঠাকুৰ। তেওঁ সামাজিক মাধ্যমত এটা দীঘলীয়া পোষ্ট দি চৰকাৰী ব্যৱস্থাক কঠোৰ সমালোচনা কৰিছে। পামী বৰঠাকুৰে লিখিছে যে জুবিনে কোনো চৰকাৰী বঁটা-বাহনৰ বাবে কেতিয়াও হেঁপাহ কৰা নাছিল, তেওঁ বিচাৰিছিল কেৱল মানুহৰ মৰম। তেওঁ সদায় জনতাৰ বিপদত থিয় হৈছিল আৰু অসমীয়াক এটা সাংস্কৃতিক ডোলেৰে বান্ধিছিল। ইমানখিনি কৰাৰ বিনিময়ত আজি জুবিনক্ষেত্ৰখন ৰক্ষা কৰিবলৈ পৰিয়ালৰ লোকে ত্ৰিপাল আঁৰিবলগীয়া হোৱাটো ব্যৱস্থাটোৰ চূড়ান্ত অৱহেলা আৰু বিফলতা বুলি তেওঁ উল্লেখ কৰিছে। সত্যৰ পৰা আমি এতিয়াও বহু দূৰত থকা বুলি আক্ষেপ কৰি তেওঁ জুবিনৰ প্ৰতি থকা অনাদৰৰ বিৰুদ্ধে এইদৰে ক্ষোভ প্ৰকাশ কৰে।
