ভাৰতৰ জি এছ টি ব্যৱস্থাৰ গাঁথনি সন্দৰ্ভত বিভিন্ন মহলত প্ৰায়ে প্ৰশ্ন উত্থাপন হয়। বিভিন্ন সামগ্ৰীৰ জি এছ টি হাৰক লৈ অসন্তুষ্টিও সৃষ্টি হৈছে। একেদৰে ছ’চিয়েল মিডিয়াত এটা পোষ্টে পুনৰবাৰ জি এছ টিৰ হাৰৰ বিষয়টো চৰ্চালৈ আনিছে।
শেহতীয়াকৈ ৰাজেশ্বৰী আয়াৰ নামৰ এগৰাকীয়ে এক্স হেণ্ডলে জি এছ টিৰ সৈতে জড়িত এটা পোষ্ট কৰিছিল। সেই পোষ্টটোৰ বিষয়বস্তু হ’ল, হীৰাৰ ওপৰত জি এছ টি ১.৫%। BMW I-series গাড়ীত GST হৈছে ৫%। অথচ ঔষধৰ ওপৰত ৫%ৰ পৰা ১৮%লৈ জি এছ টি। স্বাস্থ্য বীমাৰ ওপৰত জি এছ টি ১৮%। ইয়াৰ পিছত পোষ্টটোত স্বাস্থ্য বীমা কৰমুক্ত কৰাৰ দাবী জনোৱা হৈছে।
এই পোষ্টটো চোৱাৰ পিছত নেটিজেনসকলে জি এছ টি হাৰৰ বিষয়ে আলোচনাত নামি পৰিছে। এই সন্দৰ্ভত তেওঁলোকে নিজৰ নিজৰ মতামত প্ৰকাশ কৰিছে। একাংশই ক্ষোভ প্ৰকাশ কৰি এই সন্দৰ্ভত নিজৰ হতাশা লুকুৱাই ৰখা নাই।
হীৰা, বিলাসী গাড়ীৰ দৰে বিলাসী সামগ্ৰীৰ ওপৰত কিয় কম হাৰত জি এছ টি আৰোপ কৰা হৈছে সেই লৈ প্ৰশ্ন উত্থাপন হৈছে। ঔষধ আৰু স্বাস্থ্য বীমাৰ দৰে অত্যাৱশ্যকীয় সামগ্ৰীৰ ওপৰত জি এছ টিৰ হাৰ কিয় বেছি সেই প্ৰশ্নও উত্থাপন কৰিছে নেটিজেনৰ এক বৃহৎ অংশই।
স্বাস্থ্য বীমাৰ ওপৰত জি এছ টিৰ হাৰক লৈ ক্ষোভৰ বিষয়টো নতুন নহয়। এই সন্দৰ্ভত বিগত সময়ত দেশৰ ভিতৰতে কেইবাটাও প্ৰশ্ন উত্থাপন হৈছে। কেইবাটাও ৰাজনৈতিক দলে এই বিষয়টোৰ বিৰোধিতা কৰি পৰিৱৰ্তনৰ দাবী জনাইছে।
চৰকাৰী স্বাস্থ্য ব্যৱস্থাৰ অপৰ্যাপ্ততাৰ বাবে সাধাৰণ জনতাই ব্যক্তিগত স্বাস্থ্য ব্যৱস্থাৰ আশ্ৰয় ল’বলৈ বাধ্য হৈছে। কিন্তু ব্যক্তিগত চিকিৎসালয় আৰু নাৰ্চিং হোমত চিকিৎসা লাভ কৰাটো বহু মধ্যবিত্ত লোকৰ সামৰ্থ্যৰ বাহিৰত। এনে পৰিস্থিতিত স্বাস্থ্য বীমাৰ গুৰুত্ব বাঢ়িছে। কিন্তু অধিক কৰৰ বাবে স্বাস্থ্য বীমাৰ ব্যয় বৃদ্ধিক লৈ পুনৰ ক্ষোভ প্ৰকাশ কৰিছে নেটিজেনৰ এটা অংশই।
