ডিব্ৰুগড় জিলাৰ চুতীয়া ছাত্ৰ সন্থাই অহা ১৩ ছেপ্তেম্বৰত জিলাখনত নেটৱৰ্ক বাছ বন্ধ ঘোষণা কৰিছে। অহা ১১ ছেপ্তেম্বৰত গুৱাহাটীত হ’ব লগা সংগঠনটোৰ প্ৰতিষ্ঠা দিৱসলৈ কোম্পানিটোৱে ২খন বাছ যোগান ধৰিব বুলি আশ্বাস দি কথা নৰখা বুলি অভিযোগ তুলি নেটৱৰ্কৰ বিৰুদ্ধে এই ব্যৱস্থা লৈছে সংগঠনটোৱে।
নেটৱৰ্কৰ অধীনত তিনিচুকীয়া, ডিব্ৰুগড় আৰু গুৱাহাটীৰ মাজত দৈনিক প্ৰায় ২০-২৫খন বাছ চলাচল কৰে।
নৰ্থ ইষ্ট নাও-ৰ সৈতে হোৱা কথা বতৰাত সংগঠনটোৰ জিলা সভাপতি জিতু শইকীয়াই কয়, ‘গুৱাহাটী আৰু ডিব্ৰুগড়, তিনিচুকীয়াৰ মাজত চলাচল কৰা নেটৱৰ্ক ট্ৰেভেলছৰ বাছসমূহ আমি বন্ধ কৰিছো। গুৱাহাটীত অহা ১১ ছেপ্তেম্বৰত হ’ব লগা আমাৰ প্ৰতিষ্ঠা দিৱসৰ কাৰ্য্যসূচীৰ বাবে কোম্পানিটোৰ মালিকে ২খন বাছ যোগান ধৰাৰ প্ৰতিশ্ৰুতি দিছিল, কিন্তু এতিয়া মালিকজনে কইছে যে তেওঁ আমাক বাছ দিব নোৱাৰে।’
বাছ যদি দিবই নোৱাৰে তেন্তে আমাক প্ৰতিশ্ৰুতি দিছিল কেলেই বুলি শইকীয়াই প্ৰশ্ন উত্থাপন কৰিছে।
সভাপতিগৰাকীয়ে কয়, ‘আমি নেটৱৰ্কৰ মালিকক লৈ ভীষণ অসন্তুষ্ট কাৰণ প্ৰতিশ্ৰুতি দিয়াৰ পিছত তেওঁ আমাৰ মানুহৰ কাৰণে বাছ যোগান ধৰা নাই।’
