বৰ্তমান সময়ত জন্ম নিয়ন্ত্ৰণৰ ক্ষেত্ৰত বেছিভাগ দায়িত্ব কেৱল মহিলাৰ ওপৰতহে পৰে। পুৰুষৰ বাবে বিকল্প হিচাপে কেৱল কণ্ডম বা অস্ত্ৰোপচাৰৰ দৰে সীমিত ব্যৱস্থাহে আছে। কিন্তু শেহতীয়াকৈ বিজ্ঞানীসকলে এক নতুন গৱেষণাৰ জৰিয়তে পুৰুষৰ বাবে এক নতুন আশাৰ বতৰা কঢ়িয়াই আনিছে। তেওঁলোকে এনে এটা উপায় বিচাৰি উলিয়াইছে যাৰ জৰিয়তে শৰীৰৰ কোনো স্থায়ী ক্ষতি নকৰাকৈ পুৰুষৰ শুক্ৰাণু উৎপাদন সাময়িকভাৱে বন্ধ কৰি ৰাখিব পৰা যাব।
আমেৰিকাৰ একাংশ গৱেষকে কৰা এই অধ্যয়নটো প্ৰচিডিংছ অৱ দ্য নেচনেল একাডেমী অৱ চাইন্সেছ নামৰ আলোচনীত প্ৰকাশ পাইছে। বিজ্ঞানীসকলে মিয়‘ছিছ নামৰ এবিধ বিশেষ প্ৰাকৃতিক প্ৰক্ৰিয়াক লক্ষ্য কৰি এই পৰীক্ষা চলাইছিল। শুক্ৰাণু সৃষ্টিৰ বাবে এই প্ৰক্ৰিয়াটো শৰীৰত অতি দৰকাৰী। ইয়াত তেওঁলোকে জে কিউ ওৱান নামৰ এবিধ বিশেষ যৌগ ব্যৱহাৰ কৰিছিল যিয়ে শুক্ৰাণু উৎপাদন প্ৰক্ৰিয়াটো কিছু সময়ৰ বাবে বিঘ্নিত কৰি দিয়ে। আটাইতকৈ ভাল খবৰটো হ’ল যে এই ঔষধ খোৱা বন্ধ কৰিলেই মানুহজনৰ শুক্ৰাণু উৎপাদন আৰু প্ৰজনন ক্ষমতা পুনৰ আগৰ দৰে স্বাভাৱিক অৱস্থালৈ ঘূৰি আহে।
এই নতুন আৱিষ্কাৰটো বহুত দিশৰ পৰা অতি গুৰুত্বপূৰ্ণ বুলি গণ্য কৰা হৈছে। এই ঔষধবিধ হৰম‘নৰ ওপৰত নিৰ্ভৰশীল নহয়, অৰ্থাৎ ই পুৰুষৰ টেষ্টষ্টেৰন বা আন হৰম’নত কোনো প্ৰভাৱ নেপেলায়। ইয়াৰ ফলত পাৰ্শ্বক্ৰিয়াৰ ভয় বহুত কম থাকে। অৱশ্যে গৱেষকসকলে জানিবলৈ দিছে যে ইয়াৰ পৰা স্নায়ুতন্ত্ৰত কিছু প্ৰভাৱ পৰাৰ দৰে সৰু-সুৰা পাৰ্শ্বক্ৰিয়া হ’ব পাৰে। তথাপিও এই গৱেষণাই ভৱিষ্যতে পুৰুষৰ বাবে আৰু অধিক নিৰাপদ জন্ম নিয়ন্ত্ৰণৰ ঔষধ প্ৰস্তুত কৰাৰ ভেটি স্থাপন কৰিছে। ইয়াৰ সমান্তৰালভাৱে বৰ্তমান সময়ত শুক্ৰাণুৰ প্ৰটিনত বাধা দিয়া আন কিছুমান ঔষধৰো পৰীক্ষা চলি আছে।
বিশেষজ্ঞসকলৰ মতে, যদি পুৰুষৰ বাবে এনেকুৱা জন্ম নিয়ন্ত্ৰণৰ ঔষধ বজাৰত উপলব্ধ হয়, তেন্তে পৰিয়াল পৰিকল্পনাৰ ক্ষেত্ৰত মহিলাসকলৰ ওপৰত থকা বোজা বহুখিনি কমি যাব। ইয়াৰ ফলত প্ৰজননৰ সিদ্ধান্ত লোৱাত পুৰুষ আৰু মহিলা দুয়োৱে মিলি সমান দায়িত্ব ল’ব পাৰিব। যদিও এই ঔষধ সম্পূৰ্ণৰূপে বজাৰলৈ আহিবলৈ আৰু কিছু সময় লাগিব আৰু ইয়াৰ দীৰ্ঘম্যাদী সুৰক্ষাৰ প্ৰমাণ বিচৰা হ’ব, তথাপিও এই গৱেষণাই চিকিৎসা বিজ্ঞানত এক ডাঙৰ পৰিৱৰ্তন আনিছে। হয়তো সেই দিনটো আৰু বেছি দূৰত নহয় যেতিয়া পুৰুষৰ বাবেও নিৰাপদ আৰু সহজতে খাব পৰা জন্ম নিয়ন্ত্ৰণৰ বড়ি বজাৰত পোৱা যাব।
