সদৌ কোচ-ৰাজবংশী ছাত্ৰ সন্থা চমুকৈ আক্ৰাছুৰ পুৰেন ৰায় নেতৃত্বাধীন গোটৰ বঙাইগাঁও জিলা সমিতিখন পুনৰ গঠন কৰা হয় ৷
বঙাইগাঁও জিলাৰ অন্তৰ্গত ১৭ খন আঞ্চলিক সমিতিৰ প্ৰতিনিধিৰ উপস্থিতিত এই জিলা সমিতিখন গঠন কৰা বুলি বুধবাৰে বৃহত্তৰ বঙাইগাঁও প্ৰেছ ক্লাবত আয়োজিত এখন সংবাদমেলত সংগঠনটোৰ জিলা নেতৃবৃন্দই প্ৰকাশ কৰে ৷
সংগঠনটোৰ কেন্দ্ৰীয় সমিতিৰ নেতৃবৃন্দৰ উপস্থিতিত আৰু ভাৰপ্ৰাপ্ত সাধাৰণ সম্পাদক শুনধৰ ৰায়ৰ সভাপতিত্বত অনুষ্ঠিত হোৱা এখন প্ৰতিনিধি সভাযোগে ধনঞ্জয় কুমাৰ দেৱক সভাপতি , ৰবীন বৰ্মনক কাৰ্যকৰী সভাপতি , নন্দেশ্বৰ ৰায় আৰু দিগন্ত কুমাৰ সিংহক যুটীয়া সম্পাদক হিচাপেলৈ ৪১ জনীয়া আক্ৰাছুৰ বঙাইগাঁও জিলা সমিতিখন গঠন কৰা হয় ৷
ইপিনে সভাপতি দিব্যজ্যোতি পাঠক আৰু সাধাৰণ সম্পাদক বিকাশ বৰ্মনৰ নেতৃত্বত চলি থকা আক্ৰাছুৰ এই গোটৰ বঙাইগাঁও জিলা সমিতি খনক অবৈধ বুলি ঘোষণা কৰা কৰে সংবাদমেল যোগে ৷
নৱগঠিত জিলা সমিতিৰ সভাপতি ধনঞ্জয় কুমাৰ দেৱ, কাৰ্যকৰী সভাপতি ৰবীন বৰ্মন, যুটীয়া সম্পাদকদ্বয় নন্দেশ্বৰ ৰায় আৰু দিগন্ত কুমাৰ সিংহ, উপ সভাপতি বৰুণ ৰায়, সহকাৰী সম্পাদক পংকজ ৰায়, প্ৰচাৰ সম্পাদক দেব্ৰত বৰ্মন আদি উপস্থিত থকা সংবাদমেলত জিলা নেতৃত্বই উল্লেখ কৰা মতে যোৱা যোৱা ২৫ অক্টোৱৰত জিলা সমিতিখনৰ প্ৰতি অনাস্থা প্ৰস্তাৱ গ্ৰহণ কৰি ২৭ অক্টোৱৰত কেন্দ্ৰীয় সমিতিৰ কাৰ্যনিৰ্বাহক সভাত উত্থাপন কৰিছিল ৷
তাৰ পিছত ৩ নৱেম্বৰত অনুষ্ঠিত হোৱা জিলা সমিতিৰ কাৰ্যনিৰ্বাহক সভাত বঙাইগাঁও জিলাৰ অধীনৰ আক্ৰাছুৰ ২০ খন আঞ্চলিক সমিতিৰ ১৯ খন আঞ্চলিক সমিতিয়েই এই জিলা সমিতিৰ বিৰুদ্ধে অনাস্থা প্ৰস্তাৱ উত্থাপন কৰাত জিলা সমিতিখন ভংগ কৰি দিয়া হয় ৷
উক্ত সভাতে ৯ নবেম্বৰত জিলা সমিতিখন নতুনকৈ গঠন কৰাৰ বাবেও প্ৰস্তাৱ গৃহীত কৰা হৈছিল ৷
কেন্দ্ৰীয় নেতৃবৃন্দৰ উপস্থিতিত অনুষ্ঠিত হোৱা উক্ত সভাত অনাস্থা যোগে ভংগ কৰা সমিতি খনৰ সভাপতি দিব্যজ্যোতি পাঠক আৰু সাধাৰণ সম্পাদক বিকাশ বৰ্মনো উপস্থিত থকা বুলি কয় ৷
তথাপি ভংগ কৰা তথা অপসাৰিত হোৱা দিব্যজ্যোতি পাঠক আৰু বিকাশ বৰ্মনে নিজকে বৰ্তমানেও সভাপতি আৰু সাধাৰণ সম্পাদকৰ পৰিচয় দিয়াটো অতি লজ্জাজনক বুলিও মন্তব্য কৰে সংবাদ মেলত ৷
ইপিনে সংগঠনটোৰ একেটা গোটৰ সমান্তৰালভাৱে দুই জিলা সমিতিয়েই নিজকে বৈধ বুলি পৰিচয় দিয়াত জনগোষ্ঠীটোৰ মাজত এক বিভ্ৰান্তিৰ সৃষ্টি কৰিছে ৷
