বিহাৰ বিধান সভাৰ নিৰ্বাচনকে ধৰি দেশৰ ১২ খন ৰাজ্যত এতিয়া উপ-নিৰ্বাচনৰ বতাহ বলিছে।
কিন্তু কোভিড প্ৰটোকলৰ বাবে সেই ৰাজ্য সমূহত কোনো এটা ৰাজনৈতিক দলেই অনুষ্ঠিত কৰিব পৰা নাই ৰাজনৈতিক সমাৱেশ।
ইয়াৰ মাজতে কেন্দ্ৰই আজি আনলক ৫.০ৰ কেতবোৰ নিয়ম শিথিল কৰি নিৰ্বাচন অনুষ্ঠিত হ’বলগীয়া ৰাজ্যসমূহৰ বাবে এক নতুন নিৰ্দেশনা জাৰি কৰে।
নতুন নিৰ্দেশনা অনুসৰি নিৰ্বাচন অনুষ্ঠিত হ’বলগীয়া ৰাজ্যসমূহত এতিয়াৰে পৰা ৰাজনৈতিক সমাৱেশ অনুষ্ঠিত কৰিব পৰা যাব।
উল্লেখ্য ৩০ ছেপ্তেম্বৰত কেন্দ্ৰই জাৰি কৰা আনলক ৫.০ৰ নিৰ্দেশনাত কৈছিল যে ১৫ অক্টোৱৰ পৰ্যন্ত কোনো ৰাজনৈতিক সমাৱেশ অনুষ্ঠিত কৰিব পৰা নাযাব।
ফলত ২৮,অক্টোৱৰ,৩ আৰু ৭ নৱেম্বৰত তিনিটা পৰ্যায়ত অনুষ্ঠিত হ’বলগীয়া বিহাৰ বিধান সভাৰ প্ৰাৰ্থীসকল চিন্তাত পৰিছিল।
বিহাৰ বিধান সভাৰ উপৰি আন ১১ খন ৰাজ্য ক্ৰমে মধ্যপ্ৰদেশ,তেলেংগানা,ঝাৰখণ্ড,ছট্টিশগড়,মণিপুৰ,হাৰিয়ানা,নাগালেণ্ড,ওড়িশা,উত্তৰ প্ৰদেশ,গুজৰাট,কৰ্ণাটকত উপ-নিৰ্বাচন অনুষ্ঠিত কৰা হ’ব।
কেন্দ্ৰীয় চৰকাৰৰ পূৰ্বৰ নিৰ্দেশনা অনুসৰি নিৰ্বাচনৰ বাবে সাজু হোৱা কোনো এখন ৰাজ্যতে কোনো নিৰ্বাচনী সমাৱেশ আয়োজন কৰিব পৰা নগৈছিল যদিও কেন্দ্ৰ নতুন নিৰ্দেশনাই সেই সকলো বাধা আঁতৰালে।
অৱশ্যে কোভিডৰ আন প্ৰটোকল সমূহ মানিহে ৰাজনৈতিক সমাৱেশ অনুষ্ঠিত কৰিব লাগিব আৰু কণ্টেনমেণ্ট জ’নত কোনো সভাৰ আয়োজন কৰিব পৰা নাযাব।
