ভাৰপ্ৰাপ্ত আৰক্ষী সঞ্চালক হিচাপে আজি দায়িত্ব গ্ৰহণ কৰিয়ে মুখ্য মন্ত্ৰীৰ প্ৰশংসাত পঞ্চমুখ হৈ পৰে আৰক্ষী বিষয়া ভাস্কৰজ্যোতি মহন্ত।
কেৱল প্ৰশংসাত পঞ্চমুখেই নহয়, মুখ্য মন্ত্ৰী সোণোৱালৰ বক্তব্য শৈলী আৰু সুৰৰ অবিকল প্ৰতিধ্বনি দেখা যায় আৰক্ষী বিষয়াজনৰ বক্তব্যত। আৰক্ষী সঞ্চালক প্ৰধান হিচাপে ভাস্কৰজ্যোতি মহন্তই আজি উলুবাৰীস্থিত অসম আৰক্ষীৰ মুখ্য কাৰ্য্যালয়ত প্ৰথমখন সংবাদমেল সম্বোধন কৰে।
“অসমৰ মাননীয় মুখ্য মন্ত্ৰী সৰ্বানন্দ সোণোৱাল ডাঙৰীয়াই বিচক্ষণ নেতৃত্বৰে যি ৰ’ডমেপ বান্ধি দিছে, সেই ৰ’ডমেপ মতে আগ বাঢ়ি ৰাইজৰ সেৱা কৰিবলৈ বিচাৰিম”, মহন্তৰ মন্তব্য।
তেৱোঁ মুখ্য মন্ত্ৰী সৰ্বানন্দ সোণোৱালৰ দৰে দুৰ্নীতিৰ বিৰুদ্ধে শূন্য সহনশীলতাৰ নীতি গ্ৰহণ কৰিব বুলি সংকল্প প্ৰকাশ কৰে।
“দুৰ্নীতিৰ বিৰুদ্ধে আৰক্ষীয়ে যি ব্যৱস্থা লৈ আহিছে, এইক্ষেত্ৰত মুখ্য মন্ত্ৰীৰ দুৰ্নীতিৰ বিৰুদ্ধে যি শূন্য সহনশীলতাৰ নীতিৰ অনুকৰণত আমিও আমাৰ অৱদান আগ বঢ়াই যাম”, ১৯৮৮ বেচ্চৰ আই পি এছ বিষয়াজনৰ মন্তব্য।
অপৰাধ আৰু উগ্ৰপন্থাৰ প্ৰতি কঠোৰ মনোভাব প্ৰদৰ্শন কৰি মহন্তই কয়, “কোনো অপৰাধ সহ্য কৰা নহ’ব। অসমত উগ্ৰপন্থাজনিত বহুতো ঘটনা দশক ধৰি চলি আহিছে। উগ্ৰপন্থাৰ লগত একেবাৰে শূন্য সহনশীলতাৰ নীতি গ্ৰহণ কৰা হ’ব। উগ্ৰপন্থাৰ কোনো ননচেন্স সহ্য কৰা নহ’ব। এইক্ষেত্ৰত অসম পুলিচক দৃঢ়ভাৱে আগ বঢ়াই লৈ যাবলৈ বদ্ধপৰিকৰ”।
“কিছুদিন ধৰি ইছলামিক মৌলবাদী গা কৰি উঠাৰ কথা শুনা গৈছে। যিদৰে অসম পুলিচে অতীততো এনেধৰণৰ সমস্যা অতি দৃঢ়ভাৱে মোকাবিলা কৰি মষিমূৰ কৰিবলৈ সক্ষম হৈছে, এতিয়াও এই সমস্যা আহিলে পূৰ্ণ বিশ্বাসেৰে মোকাবিলা কৰিম”, মহন্তই কয়।
ইপিনে, ড্ৰাগছৰ বিৰুদ্ধে অসম আৰক্ষীৰ অভিযান অব্যাহত থাকিব বুলি জানিবলৈ দি তেওঁ কয়, “ড্ৰাগছৰ ব্যৱহাৰৰ ক্ষেত্ৰত আমি অসমক কেতিয়াও দ্বিতীয় পঞ্জাৱ হ’বলৈ নিদিওঁ।”
তেওঁ সংবাদ মাধ্যমৰ সহযোগিতা বিচাৰি কয়, “সমাজত সংবাদ মাধ্যমৰ যথেষ্ট গুৰুত্ব আছে। বৰ্তমান অসমৰ পৰিৱেশত আৰক্ষী আৰু সংবাদ মাধ্যমে যদি ভাতৃত্বপূৰ্ণ আৰু সৌহাৰ্দ্যপূৰ্ণভাৱে একেলগে আগ বাঢ়ে, তেতিয়া সমাজৰ উন্নয়ন হ’ব।”
উল্লেখ কৰিব পাৰি যে কয়লা আৰু চুপাৰি ছিণ্ডিকেইটকে ধৰি বহু ধৰণৰ বৃহৎ বৃহৎ ছিণ্ডিকেইটে ৰাজ্য তোলপাৰ লগাই থকা সত্ত্বেও ৰাজনৈতিক পৃষ্ঠপোষকতালৈ ভয় কৰি আৰক্ষী প্ৰায়ে নিৰ্বিকাৰ হৈ থাকিব লগীয়া হৈছে। কয়লা ছিণ্ডিকেইটত জড়িত থকা বিজেপিৰ নেতাৰ নামৰ সৈতে প্ৰদূষণ নিয়ন্ত্ৰণ ব’ৰ্ড, COAL INDIA LIMITED, DIRECTORATE OF GEOLOGY & MINNING-কে ধৰি বিভিন্ন বিভাগে মাৰ্ঘেৰিটা থানাত এজাহাৰ দিয়াৰ পাছতো আৰক্ষীয়ে কয়লা ছিণ্ডিকেটৰ বিৰুদ্ধে কোনো ব্যৱস্থা গ্ৰহণ কৰা নাই।
ভাস্কৰজ্যোতি মহন্তই ৰাজ্যৰ কয়লা ছিণ্ডিকেইটৰ বিৰুদ্ধে কি ব্যৱস্থা লয় চাবলগীয়া হ’ব।