অসমৰ বিত্ত মন্ত্ৰী হিমন্ত বিশ্ব শৰ্মাই মঙলবাৰে কৈছে যে সংসদৰ পৰৱৰ্তী অধিৱেশনত নাগৰিকত্ব বিধেয়ক পুনৰ উত্থাপন কৰা হ’ব, কিন্তু তাত কিছু সংশোধন সংযোজিত হ’ব।
ভাৰতৰ গৃ্হ মন্ত্ৰী অমিত শ্বাহে এই কথা জনোৱা বুলি শৰ্মাই প্ৰকাশ কৰিছে।
পূৰ্বে উত্তৰ-পূবত ব্যাপক প্ৰতিবাদৰ সন্মুখীন হোৱা বিধেয়কখনৰ নতুন ৰূপে, মন্ত্ৰীজনৰ মতে, অঞ্চলটোৰ লোকসকলৰ “চিন্তা” দূৰ কৰিব।
“আমি নাগৰিকত্ব বিধেয়কৰ এক নতুন খচৰা দাখিল কৰিবলৈ আগবাঢ়িছো যিটো উত্তৰ-পূবৰ লোকৰ বাবে গ্ৰহণযোগ্য হ’ব। মই ভাবো বিধেয়কখনে সংস্কৃতি আৰু ভাষা প্ৰভাৱিত কৰিব বুলি উত্তৰ-পূবৰ লোকসকলে কৰা চিন্তাক নতুন বিধেয়কখনে সন্তুষ্ট কৰিব,” মঙলবাৰে গুৱাহাটীত আয়োজিত এক সংবাদ মেলৰ পিছত সাংবাদিকক মন্ত্ৰীজনে কয়।
উত্তৰ-পূবত সংবিধানৰ ৩৭১নং অনুচ্ছেদ, ষষ্ঠ অনুসূচী আৰু জনজাতীয় সংস্কৃতি, ভাষা আৰু নৃগোষ্ঠীয় সুৰক্ষাদায়ী আইনসমূহক নতুন বিধেয়কখনে খাৰিজ নকৰে, তেওঁ কয়।
উত্তৰ-পূবৰ কিছু ৰাজ্যত থকা ইনাৰ লাইন পাৰ্মিট ব্যৱস্থাৰ ওপৰতো বিধেয়কখনে প্ৰভাৱ নেপেলায়, শৰ্মাই কয়।
কিন্তু, অসমৰ ক্ষেত্ৰত তেওঁ ইনাৰ লাইন পাৰ্মিট নিবিচাৰো বুলি মন্তব্য কৰে।
“ই অসমৰ অৰ্থনীতিত প্ৰভাৱ পেলাব। কিন্তু উত্তৰ-পূবৰ অন্য ৰাজ্যই ইনাৰ লাইন পাৰ্মিট দাবী কৰি আছে। কেন্দ্ৰীয় চৰকাৰে ইয়াৰ ভাল আৰু বেয়া প্ৰভাৱসমূহ চাই এইটো মানি ল’ব,” শৰ্মাই কয়।
তেওঁ লগতে জনাই যে বিধেয়কখনক লৈ বিজেপি দলে সংশ্লিষ্ট ৰাইজৰ লগত আলোচনাৰ এটা প্ৰক্ৰিয়া আৰম্ভ কৰিব।
“প্ৰক্ৰিয়াটো ইতিমধ্যে আৰম্ভ হৈছে আৰু বিধেয়কখন সন্দৰ্ভত ৰাইজ আৰু সংগঠনসমূহৰ লগত কথা পাতিবলৈ বিজেপিৰ বহুকেইজন শীৰ্ষ নেতা নৱেম্বৰৰ পূৰ্বেই অসমলৈ আহিব,” শৰ্মাই জনায়।
গৃহ মন্ত্ৰী শ্বাহে কৈছে যে তাৰ (বিধেয়ক উত্থাপনৰ পূৰ্বে) আগতে আলোচনাৰ প্ৰক্ৰিয়া এটা হ’ব, শৰ্মাই কয়।
গুৱাহাটীত শেহতীয়াকৈ অনুষ্ঠিত নেদাৰ সন্মিলনত অমিত শ্বাহে উত্তৰ-পূবৰ সহযোগী দলৰ নেতাসকলক এই প্ৰতিশ্ৰুতি আগবঢ়োৱা বুলি পূৰ্বে বাতৰি প্ৰকাশ হৈছে।
আনহাতে, শৰ্মাই লগতে কয় যে বিধেয়ক আৰু এন আৰ চি দুয়োটা সুকীয়া বিষয়।
“এন আৰ চিৰ লগত কেবৰ কোনো সম্পৰ্ক নাই। দুয়োটাই নিজৰ ৰাস্তা নিজেই ল’ব। এন আৰ চি উচ্চতম ন্যায়ালয়ৰ অধীনত, কেব সংসদৰ অধীনত হ’ব। দুইটাই বেলেগ বেলেগ ইছু,” শৰ্মাই কয়।
প্ৰকাশিত এন আৰ চিক লৈ বিজেপি দল সুখী নহয় বুলি পুনৰ দোহাৰি তেওঁ কয় যে চৰকাৰে পঞ্জীখন পুনৰীক্ষণৰ বাবে উচ্চতম ন্যায়ালয়ত আবেদন জনাব।
তেওঁ কয় যে বিজেপিয়ে আনকি এন আৰ চি প্ৰক্ৰিয়াটোৱে নতুনকৈ হোৱাটো বিচাৰিছে।
“বিজেপি দলে বিচাৰো নতুন এন আৰ চি হ’ব লাগে, দেখা যাব কি হয়,” শৰ্মাই কয়।
