এগৰাকী কৰ্মদক্ষ আৰক্ষী বিষয়া হিচাপে এক পৰিচিত নাম আনন্দ মিশ্ৰ। ধুবুৰীৰ পৰা বদলি হৈ কালি সন্ধিয়া নগাঁও জিলাৰ আৰক্ষী অধীক্ষক হিচাপে যোগদান কৰে আইপিএছ বিষয়া আনন্দ মিশ্ৰই। যোগদান কৰাৰ পিছদিনাই অধিক সক্ৰিয় ৰূপত দেখা পোৱা গ’ল নতুন আৰক্ষী অধীক্ষক গৰাকীক।
আৰক্ষী অধীক্ষক মিশ্ৰই আজি দুপৰীয়া নগাঁও চহৰৰ মাজমজিয়াৰ লক্ষীনগৰ চাৰিআলিৰ মহাবীৰ ট্ৰেভেলচত উপস্থিত হয়। এই মহাবীৰ ট্ৰেভেলচতে প্ৰায় এমাহ ধৰি আৱদ্ধ হৈ আছে কেৰেলাৰ প্ৰায় ৫৭ খনকৈ বাচৰ লগতে সেই ৰাজ্যখনৰ এশৰো অধিক লোক।
ৰাজ্য চৰকাৰে কোভিডৰ ভয়াৱহতাৰ বাবে জাৰি কৰা নতুন এছঅ’পিৰ বাবে এই বাচসমূহ যাত্ৰী লৈ যাব নোৱাৰা হ’ল।
স্থানীয় লোকসকলে কেৰেলাৰ সেই বাচসমূহৰ লগতে কেৰেলাৰ বাচৰ কৰ্মচাৰীসকলক পঠিয়াবৰ বাবে নগাঁও জিলা প্ৰশাসনৰ ওচৰত আপত্তি জনাই আহিছিল। ইয়াৰোপৰি কেৰেলাৰ এই লোকসকলে নিজেও ঘূৰি যাব বিছাৰিছিল তেওঁলোকৰ গৃহ ৰাজ্যলৈ।
ইতিমধ্যে কেৰেলা চৰকাৰৰ সৈতেও যোগাযোগ কৰিছে নগাঁৱত আৱদ্ধ এইসকল লোকে। নতুন আৰক্ষী অধীক্ষক আনন্দ মিশ্ৰই এই লোকসকলক লগ কৰি শীঘ্ৰেই এইলোকসকলক গৃহ ৰাজ্যলৈ পঠিওৱাৰ ব্যৱস্থা কৰাৰ আশ্বাস প্ৰদান কৰে।
ইয়াৰ উপৰিও সেই স্থানতে সাংবাদিকৰ আগত নগাঁৱত চলি থকা ড্ৰাগছৰ ৰমৰমীয়া বেহা শীঘ্ৰেই বন্ধ হ’ব বুলিও কথা দিয়ে আৰক্ষী অধীক্ষক গৰাকীয়ে। প্ৰয়োজনত কাষৰীয়া জিলাসমূহৰ আৰক্ষীকো একগোট কৰি নিজে নেতৃত্ব লৈ হ’লেও ড্ৰাগছ বন্ধ কৰাৰ বিৰুদ্ধে আৰক্ষী অধীক্ষক গৰাকীয়ে অভিযান চলাব বুলিও দৃঢ়তাৰে কয়।
নগাঁৱত চলি থকা গৰু চিণ্ডিকেট বন্ধ কৰাৰ বাবেও ব্যৱস্থা গ্ৰহন কৰিব বুলিও তেওঁ দৃঢ়তাৰে কয়। সৎ আৰু নিষ্ঠাৱান আৰক্ষী বিষয়া হিচাপে খ্যাতি থকা আইপিএছ বিষয়া আনন্দ মিশ্ৰই নগাঁও জিলাৰ আৰক্ষী অধীক্ষক হিচাপে যোগদান কৰাত নগঞা ৰাইজ উৎফুল্লিত হৈ পৰা পৰিলক্ষিত হৈছে।
