কোভিডৰ আতংকই পুনৰ ভাৰতবাসীক ত্ৰাসিত কাৰাৰ সময়তে কোভিডৰ অতি সংক্ৰামক প্ৰজাতি অমিক্ৰনৰ এক নতুন উপ-প্ৰজাতিয়ে নতুন ভয়ৰ জন্ম দিছে।
শেহতীয়া তথ্য অনুসৰি দেশৰ ১০ খন ৰাজ্যত কোভিডৰ অমিক্ৰন প্ৰজাতিৰ নতুন উপ-প্ৰজাতি বিধ ধৰা পৰিছে।
ইজৰাইলৰ টেল হাচোমাৰৰ শ্বেবা চিকিৎসা কেন্দ্ৰৰ কেন্দ্ৰীয় ভাইৰোলজি লেবৰেটৰীৰ গৱেষক ডাঃ শ্যে ফ্লেছনেকৈছে যে ভাৰতত কৰোনাভাইৰাছৰ অতি সংক্ৰামক অমিক্ৰন বংশৰ এটা নতুন উপ-প্ৰকাৰ ধৰা পৰিছে।
এই নতুন উপ-প্ৰকাৰ বিধৰ নাম হৈছে বিএ.২.৭৫- ।বিশেষজ্ঞগৰাকীৰ মতে নতুন অমিক্ৰন উপ-প্ৰকাৰবিধে ইতিমধ্যে দেশৰ খনৰাজ্যত কেইবাজনো লোকক আক্ৰান্ত কৰিছে। ভাৰতত এতিয়ালৈকে ৬৯ গৰাকী লোক এই উপ-প্ৰকাৰৰ দ্বাৰা সংক্ৰমিত হৈছে। অৱশ্যে ভাৰত চৰকাৰে এই তথ্য নিশ্চিত কৰা নাই।
গৱেষকগৰাকীয়ে প্ৰকাশ কৰা অনুসৰি বিভিন্ন ৰাজ্যত নতুন প্ৰজাতি বিধত সংক্ৰমিত লোকৰ সংখ্যা হৈছে এনেধৰণৰ হাৰিয়ানা (৬),দিল্লী (১), হিমাচল প্ৰদেশ (৩), জম্মু (১), কৰ্ণাটক (১০), মধ্য প্ৰদেশ (৫), মহাৰাষ্ট্ৰ (২৭), তেলেংগানা (২), উত্তৰ প্ৰদেশ (১), আৰু পশ্চিম বংগ (১৩)।
ডাঃ শ্যে ফ্লেছনে কয় যে জাপান (১), জাৰ্মানী (২), ব্ৰিটেইন (৬), কানাডা (২), আমেৰিকা (২), অষ্ট্ৰেলিয়া (১), আৰু নিউজিলেণ্ড (২)তো এই নতুন ভাইৰাছৰ সংক্ৰমণ ধৰা পৰিছে।
আমেৰিকাৰ ফ্ৰেড হাচ গৱেষণা প্ৰতিষ্ঠানত বিএ.২.৭৫ উপ-প্ৰজাতিটো প্ৰথমে ধৰা পৰিছিল বুলিও তেওঁ প্ৰকাশ কৰে।
সময় আৰু পৰিবেশৰ সলনিৰ লগে লগে ক’ভিডেও ইয়াৰ ৰূপ সলাই পেলাইছে।অলপতে ৰাছিয়াত ক’ভিডৰ নতুন প্ৰজাতি অমিক্ৰনৰ এক বিশেষ প্ৰজাতি চিনাক্ত কৰিবলৈ সক্ষম হৈছে ৰাষ্ট্ৰীয় উপভোক্তা স্বাস্থ্য নিৰীক্ষণ সংস্থাই ।বিশ্বৰ পৰা এতিয়াও কোভিডৰ আতংক দূৰ হোৱা নাই।
সময় বাগৰাৰ লগে লগে বিশ্বৰ বিভিন্ন প্ৰান্তত ক’ৰ’না ভাইৰাছে ইয়াৰ ৰূপ তথা চৰিত্ৰৰ সলনি ঘটাই গৈছে।
ডেল্টা, অমিক্ৰন আদি প্ৰজাতিৰ পিছত কোভিডৰ নতুন প্ৰজাতি এক্স ইৰ উপস্থিতি ধৰা পৰিছে।
অমিক্ৰনতকৈ ১০ গুণে বেছি সংক্ৰামক এক্স ই প্ৰজাতি বিধকলৈ সেয়ে বিশ্ব স্বাস্থ্য সংস্থাই বিশ্বৰ প্ৰতি খন দেশকে সতৰ্ক কৰি দিছে।
বিশ্ব স্বাস্থ্য সংস্থাৰ মতে, নতুন প্ৰজাতি এক্স ই অমিক্ৰনৰ উপ-প্ৰকাৰ বি.এ.২-তকৈ কমেও দহ গুণ অধিক সংক্ৰামক। এতিয়ালৈকে, বি.এ.2 প্ৰজাতিক কোভিডৰ আটাইতকৈ সংক্ৰামক প্ৰজাতি হিচাপে চিনাক্ত কৰা হৈছে।
কোভিডৰ বি.এ.২ উপ-প্ৰজাতিয়ে আমেৰিকা যুক্তৰাষ্ট্ৰত ত্ৰাসৰ সৃষ্টি কৰিছিল।
এই এক্স ই প্ৰজাতিটো প্ৰকৃততে কি? বিশ্ব স্বাস্থ্য সংস্থাৰ মতে অমিক্ৰন, বি.এ.১ আৰু বি.এ.২-ৰ সংমিশ্ৰণতে এক্স ই প্ৰজাতিটোৰ সৃষ্টি হৈছে।
এই প্ৰজাতিটো প্ৰথমবাৰৰ বাবে ১৯ জানুৱাৰীত ব্ৰিটেইনত চিনাক্ত কৰা হৈছিল। এতিয়ালৈকে বিশ্বত ৬০০ গৰাকী লোক কোভিডৰ নতুন প্ৰজাতি এক্স ইত আক্ৰান্ত হোৱাৰ তথ্য পোৱা গৈছে।
দক্ষিণ-পূব এছিয়া, ইউৰোপ আৰু আমেৰিকাৰ বহু দেশত মাৰাত্মক ভাইৰাছবিধ বিয়পি পৰাৰ আশংকা কৰা হৈছে।
ভাৰতত অৱশ্যে এতিয়ালৈকে কোভিডৰ এক্স ই প্ৰজাতি ধৰা পৰা নাই। ফ্ৰান্স, ডেনমাৰ্ক আৰু বেলজিয়ামত এই প্ৰজাতিটোৱে পুনৰ নতুন আতংকৰ সৃষ্টি কৰাৰ আশংকা কৰা হৈছে।
