য়ুনিক’ড কনছৰ্টিয়ামত অসমীয়া লিপিৰ স্বকীয় স্থানৰ বিষয়টোক নতুন গতিৰে আগুৱাই নিবলৈ পুনৰ টঙালি বান্ধিছে অসম চৰকাৰ আৰু অসম সাহিত্য সভা। আজি অসম সাহিত্য সভাৰ গুৱাহাটীৰ কাৰ্য্যালয়ত একাধিক বিষয়ত দিয়া এখন সংবাদমেলত এই কথা জনাইছে অসম সাহিত্য সভাৰ সভাপতি ড০ পৰমানন্দ ৰাজবংশীয়ে।
অসম সাহিত্য সভাৰ সভাপতিজনে জনোৱামতে, অসমীয়া লিপি সন্দৰ্ভত আন্তৰ্জাতিক মানক সংস্থাৰ পৰা ভাৰতীয় মানক সংস্থালৈ অহা প্ৰস্তাৱৰ ওপৰত যোৱা ১০ মে’ত ভাৰতীয় মানক সংস্থাৰ এখন সভা অনুষ্ঠিত হৈ যায়।
পৰমানন্দ ৰাজবংশীয়ে লগতে জানিবলৈ দি কয়, “অসমীয়া ভাষাৰ স্থিতি সন্দৰ্ভত অসমীয়াসকলে কৰি থকা দাবী যাতে পূৰ্ণ পৰ্য্যায়ত সফল ৰূপায়ণ কৰিব পৰা যায়, তাৰ কাৰণে এই সভাত আলোচনা কৰা হয়”।
“আন্তৰ্জাতিক মানক সংস্থাৰ প্ৰস্তাৱটো সন্দৰ্ভত বি আই এছে এখন কমিটী গঠন কৰিছে”, ৰাজবংশীয়ে কয়।
তেওঁ জনোৱামতে, অসমীয়া লিপিৰ স্বীকৃতিক পুনৰ সবল যুক্তি-তথ্যৰে দাঙি ধৰিবলৈ বিভিন্ন দিশ সামৰি এই কমিটীয়ে প্ৰতিবেদন দিব। আৰু সেয়া ৩ মাহৰ ভিতৰত দিব।
নতুনকৈ গঠিত কমিটীখনত অসম চৰকাৰৰ প্ৰতিনিধি, অসম সাহিত্য সভাৰ প্ৰতিনিধি আৰু অসমৰ এই সম্পৰ্কীয় বিশেষজ্ঞক অন্তৰ্ভুক্ত কৰা হৈছে।
ৰাজবংশীয়ে জনোৱা মতে, কমিটীখনত আছে অসম চৰকাৰৰ দুজন প্ৰতিনিধি এমট্ৰনৰ পৰিচালন সঞ্চালক এম কে যাদৱ আৰু মাধুৰিমা বৰুৱা; অসম সাহিত্য সভা আৰু ড০ দিলীপ কুমাৰ কলিতা, ডাঃ সত্যকাম ফুকন, ড০ ভাস্কৰজ্যোতি গোস্বামী।
এই কমিটীয়ে দিয়া প্ৰতিবেদন লৈ পুনৰ আন্তৰ্জাতিক মানক সংস্থাৰ ওচৰলৈ যাব ভাৰতীয় মানক সংস্থা, জনালে সাহিত্য সভাৰ সভাপতিজনে।
“এই প্ৰক্ৰিয়াৰেহে অসমীয়া ভাষাই (লিপি?) য়ুনিক’ডত স্থান লাভৰ পথ প্ৰশস্ত হ’ব।”
মন কৰিব লগীয়া কথাটো হ’ল সাহিত্য সভাৰ সভাপতিগৰাকীয়ে “লিপি”ৰ ঠাইত বাৰে বাৰে “ভাষা” “ভাষা” কৰি সংবাদমেলত নিজৰ অজ্ঞতা বাৰে বাৰে প্ৰকাশ কৰিছিল।
“১৯৯৩ চনতেই বি আই এছে য়ুনিক’ডতে বাংলা ক’ডতে অসমীয়া ভাষাক অন্তৰ্ভুক্ত কৰিছিল। সেইটো কামৰ কাৰণে যোৱা দহ বছৰ ধৰি আমি এই বিষয়টোত লাগি আছো। এতিয়া এটা পদক্ষেপ আকৌ আগ বাঢ়িছে। আমি বি আই এছক কৈছো যে আমাক এটা স্বকীয় পৰিচয় লাগে অসমীয়া লিপি বুলি”, যোৱা বছৰৰ জুন মাহত অসমীয়া লিপিৰ স্বীকৃতিৰ দাবী লৈ আন্তঃৰাষ্ট্ৰীয় মানক ব্যুৰো (আই এছ অ’)ৰ লণ্ডনৰ বৈঠকলৈ প্ৰতিনিধি হিচাপে যোৱা ড০ পৰমানন্দ ৰাজবংশীয়ে কয়।
