শান্তি চুক্তিৰ আলোচনা চলি থকাৰ মাজতে ইৰান আৰু আমেৰিকাৰ মাজত সংঘাত তীব্রতৰ হৈ পৰিছে। ইৰানৰ ইছলামিক ৰিভলিউশ্যনাৰী গাৰ্ড কৰ্পছে অৰ্থাৎ আইআৰজিচিয়ে আমেৰিকাৰ আন এটা ড্ৰোন ভূপতিত কৰিছে। দেওবাৰে ইৰানৰ সেনাই এই তথ্য ৰাজহুৱা কৰিছে। সেনাই জনোৱা অনুসৰি তেওঁলোকে আমেৰিকাৰ এটা এমকিউ-১ ড্ৰোন মাৰি তললৈ নমাইছে। ইৰানে এক চৰকাৰী বিবৃতিত কৈছে যে শত্ৰুতামূলক অভিযান চলোৱাৰ উদ্দেশ্যেৰে ড্ৰোনটো ইৰানৰ সাগৰীয় সীমাত প্ৰৱেশ কৰিছিল। কিন্তু তেওঁলোকে লগে লগে ড্ৰোনটো চিনাক্ত কৰে আৰু বায়ু প্ৰতিৰক্ষা মিছাইল ব্যৱহাৰ কৰি ইয়াক ধ্বংস কৰে।
ইয়াৰ পূৰ্বে যোৱা মঙলবাৰেও ইৰানৰ সেনাই আমেৰিকাৰ একেধৰণৰ এটা ড্ৰোন মাৰি পেলাইছিল বুলি জনাইছিল। ইৰানৰ সেনাই স্পষ্ট কৰি দিছে যে আমেৰিকাই যিকোনো ধৰণৰ যুদ্ধবিৰতি উলংঘা কৰিলে তাৰ উচিত প্ৰত্যুত্তৰ দিয়াৰ অধিকাৰ তেওঁলোকৰ আছে। স্থানীয় সংবাদ মাধ্যমৰ ৰিপৰ্ট অনুসৰি ইৰানৰ আকাশসীমাত প্ৰৱেশ কৰা এখন আমেৰিকান যুঁজাৰু বিমানৰ ওপৰতেও ইৰানী সেনাই গুলীবৰ্ষণ কৰিছিল। আমেৰিকাই ইৰানৰ ওপৰত নতুনকৈ আত্মৰক্ষামূলক আক্ৰমণ চলোৱাৰ কথা ঘোষণা কৰাৰ পাছতে এই ঘটনা সংঘটিত হৈছিল।
আমেৰিকাৰ চেন্ট্ৰেল কমাণ্ডে অৰ্থাৎ চেন্টকম-এ যোৱা সোমবাৰে দক্ষিণ ইৰানত তীব্ৰ আক্ৰমণ চলাইছিল। আমেৰিকাৰ সেনাই দক্ষিণ ইৰানৰ মিছাইল উৎক্ষেপণ কেন্দ্ৰ আৰু সাগৰত মাইন পাৰি থকা নাওসমূহৰ ওপৰত এই আক্ৰমণ কৰে। আমেৰিকাৰ সেনাৰ মুখপাত্ৰ টিম হকিঞ্চে এক বিবৃতিত জনাইছে যে নিজৰ জোৱানসকলক ইৰানী সেনাৰ ভাবুকিৰ পৰা সুৰক্ষিত কৰিবলৈ তেওঁলোকে এই আত্মৰক্ষামূলক আক্ৰমণ চলাইছিল। ইয়াৰ পাছত বৃহস্পতিবাৰেও আমেৰিকাই ইৰানৰ এটা সামৰিক ঘাটিত নিশাটোৰ ভিতৰতে আক্ৰমণ কৰে। ৱাছিংটনে দাবী কৰিছে যে এই সামৰিক ঘাটিটোৱে অঞ্চলটোত থকা আমেৰিকান সেনা আৰু ব্যৱসায়িক জাহাজসমূহৰ বাবে বিপদৰ সৃষ্টি কৰিছিল।
এই ধাৰাবাহিক আক্ৰমণৰ পাছত আমেৰিকাৰ বিষয়াসকলে ইয়াক সম্পূৰ্ণৰূপে প্ৰতিৰক্ষামূলক বুলি অভিহিত কৰিছে। তেওঁলোকে জোৰ দি কৈছে যে আমেৰিকা আৰু ইৰানৰ মাজৰ যুদ্ধবিৰতি এতিয়াও বাহাল আছে বুলি ধৰি লোৱা হৈছে। ইফালে ইৰানৰ সংবাদ সংস্থা ফাল্ছে জনোৱা অনুসৰি হৰমুজ প্ৰণালীত অৱস্থিত ইৰানৰ বন্দৰ চহৰ বন্দৰ আব্বাছৰ পূব দিশত বৃহস্পতিবাৰে নিশা প্ৰায় ডেৰ বজাত তিনিটাকৈ ডাঙৰ বিস্ফোৰণৰ শব্দ শুনা গৈছিল।
