আমেৰিকাৰ ৰাজনীতিত ইতিহাস ৰচিলে এগৰাকী ভাৰতীয় মূলৰ ব্যক্তিয়ে। নিউয়ৰ্কত প্ৰথম বাৰৰ বাবে মেয়ৰ হিচাপে নিৰ্বাচিত হ’ল এগৰাকী মুছলমান তথা ভাৰতীয় বংশোদ্ভৱৰ এগৰাকী ব্যক্তি জোহৰান মামদানী। মেয়ৰ হিচাপে নিৰ্বাচিত হোৱাৰ পিছত তেওঁ সোমবাৰে প্ৰদান কৰা বিজয় ভাষণে এতিয়া সমগ্ৰ বিশ্বতেই খলকনি তুলিছে। বিজয় ভাষণত আমেৰিকাৰ ট্ৰাম্পৰ স্বেচ্ছাচাৰী শাসনক তীব্ৰ সমালোচনা কৰে জোহৰান মামদানীয়ে।
মামদানীয়ে বিজয় ভাষণত কয় যে আজি সন্ধিয়া আমাৰ চহৰখনত সূৰ্য অস্ত গৈছে কিন্তু মই এটা নতুন দিনৰ পোহৰ দেখিবলৈ পাইছো। বন্ধু সকল, আমি ইতিহাস ৰচনা কৰি দেখুৱালো। কামবোৰ সম্পূৰ্ণ নোহোৱালৈকে অসম্ভৱ যেনেই লাগে। কিন্তু অসম্ভৱ কামটো আমি কৰিলো। ভাষণৰ সময়ত তেওঁ জৱাহৰলাল নেহৰুৱে দেশ স্বাধীন হোৱাৰ পিছত প্ৰদান কৰা “ট্ৰিষ্ট উইথ ডেষ্টিনি” শীৰ্ষক ভাষণটো কথা স্মৰণ কৰে।
তেওঁ কয়, ‘‘আপোনালোকৰ সন্মুখত থিয় হৈ মোৰ জৱাহৰলাল নেহৰুৰ কথা মনলৈ আহিছে। এনে লাগিছে যেন বহুত দিন ধৰি দমন আৰু শোষণৰ বলি হৈ থকা জাতি এটাৰ আত্মাই নিজৰ ভাষা বিচাৰি পাইছে। আজি ৰাতি আমি পুৰণিৰ দিন এৰি নতুন দিনত প্ৰৱেশ কৰিবলৈ ওলাইছো। তেওঁ কয়, “মই আপোনালোকৰ ডেম’ক্ৰেটিক দলৰ প্ৰাৰ্থী। অতি সোনকালে নিউয়ৰ্ক চহৰৰ মেয়ৰ হ’ম।”
ভাষণত তেওঁ কয় যে নিউয়ৰ্কৰ প্ৰতিজন নাগৰিকৰ সহায় আৰু আঠ মাহ জোৰা এক অভিযানৰ অন্তত আমি জয় লাভ কৰিছোঁ। হাৰ্লেমৰ পৰা বে ৰিজলৈকে, জেকচন হাইটছৰ পৰা প’ৰ্ট ৰিচমণ্ডলৈকে আমি জয়ী হৈছো। আমি এই কাৰণেই জয়ী হৈছোঁ কাৰণ নিউয়ৰ্কৰ লোকসকলে এখন উন্নত চহৰৰ বাবে থিয় হৈছে। যি চহৰত পৰিশ্ৰমৰ পৰি_শ্ৰমৰ (পৰিশ্ৰমৰ বিনিময়) এক সুস্থিৰ জীৱন হ’ব। য’ত কেৱল ঋণ পৰিশোধ কৰিবলৈকে কাৰখানাৰ মজিয়াত বা কেবৰ চকাৰ পিছফালে আঠ ঘন্টা পৰিশ্ৰম কৰিব নালাগে। যাতে এই পৰিশ্ৰমৰ পৰা পোৱা মূল্য ঘৰৰ লাইটবোৰ জ্বলাই ৰখাবলৈ আৰু নিজৰ সন্তানক স্কুললৈ পঠিয়াবলৈ যথেষ্ট হয়।
তেওঁ লগতে কয়, “বন্ধু সকল আমি এটা ৰাজনৈতিক পৰিয়ালক উফৰাই পেলাইছোঁ। মই এণ্ড্ৰু কুওমোৰ ব্যক্তিগত জীৱনৰ বাবে শুভকামনা জনাইছোঁ। কিন্তু আজি সন্ধিয়াটোৱেই হওক তেওঁৰ নাম উচ্চাৰণ কৰাৰ অন্তিম সময়।”
তেওঁ লগতে কয়, ‘‘মই আজি ইয়াত থিয় দিছোঁ আৰু মোৰ পৰিচয় লুকুৱাই ৰাখিবলৈ অস্বীকাৰ কৰিছোঁ। মই মুছলমান। মই এজন গণতান্ত্ৰিক সমাজবাদী। এইবোৰৰ কোনো এটাৰ বাবে ক্ষমা খুজিব নিবিচাৰোঁ।
জোহৰানে প্ৰতিশ্ৰুতি দি কয়, “আমি ভাড়া ঘৰৰ মালিকসকলক জবাবদিহি কৰিম। এই চহৰৰ এই ড’নাল্ড ট্ৰাম্পসকলে ভাড়াতীয়াসকলৰ পৰা অধিক ধন আদায় কৰি আৰামদায়ক জীৱন যাপন কৰিছে। আমি দুৰ্নীতিৰ সংস্কৃতিৰ অন্ত পেলাম। কৰ ফাঁকি দিয়া কোটিপতিসকলৰ বিৰুদ্ধেও আমি ব্যৱস্থা গ্ৰহণ কৰিম।”
শেষত তেওঁ ট্ৰাম্পক উদ্দেশ্যি কয়, “ড’নাল্ড ট্ৰাম্প, যিহেতু মই জানো যে আপুনি চাই আছে, গতিকে আপোনাৰ বাবে মোৰ হাতত চাৰিটা শব্দ আছে: Turn the volume up!”
