অৱশেষত নিউজিলেণ্ডল বাবে আহি পৰিল বেয়া খবৰটো। ছেমি ফাইনেল খেলখনত মেট হেনৰী আঘাতপ্ৰাপ্ত হোৱাৰ বাবে ভাৰতৰ বিৰুদ্ধে চেম্পিয়নছ ট্ৰফীৰ ফাইনেলত তেওঁক দেখা পোৱা যাব নে নাই সেই লৈ সন্দেহৰ সৃষ্টি হৈছিল। ভবা হৈছিল যে এই পেচাৰজন মেচৰ আগতে ফিট নহ’বও পাৰে। সেই ভয় সঁচালৈ পৰিণত হ’ল। ফাইনেলৰ কমেও এঘণ্টা আগতে মেট হেনৰীয়ে খেলপথাৰ এৰি যোৱাৰ ধৰণত কিৱি অনুৰাগীসকল স্তম্ভিত হৈ পৰিছে।
তাৰ পাছত আহিল ডাঙৰ খবৰটো। ডুবাইত ভাৰতৰ বিৰুদ্ধে মেট হেনৰীয়ে ফাইনেলত খেলা নাই। এঘণ্টা পূৰ্বে মেট হেনৰীক ৱাৰ্মআপৰ সময়ত চকুলো টুকি খেলপথাৰৰ পৰা ওলাই অহা দেখা গৈছিল। সম্প্ৰচাৰক জিঅ’ হটষ্টাৰৰ ক্ৰিকেট বিশেষজ্ঞ আম্বাতি ৰায়ুডুৱেও কয় যে কিৱি পেচাৰগৰাকীয়ে ফাইনেলত খেলা দেখ নাযাব।
ইয়াৰ পিছত স্কাই স্প’ৰ্টছে মেট হেনৰীৰ অনুপস্থিতিৰ খবৰ নিশ্চিত কৰে। নাছেৰ হুছেইন আৰু মাইক আথাৰটনে কয় যে আজি পুৱা হেনৰীয়ে ফিটনেছ টেষ্টত ব্যৰ্থ হয়।
দক্ষিণ আফ্ৰিকাৰ বিৰুদ্ধে ছেমি ফাইনেল মেচত হাইনৰিখ ক্লাচেনৰ পৰা কেচ লোৱাৰ সময়তে মেট হেনৰীয়ে সোঁ কান্ধত আঘাত পায়। লগে লগে খেলপথাৰ এৰিব লগা হ’ল। তেতিয়াৰ পৰাই তেওঁ হয়তো ফাইনেলত খেলিব নোৱাৰিব বুলিও চৰ্চা চলিছিল।
উল্লেখ্য যে, চলিত ছিজনত এতিয়ালৈকে সৰ্বাধিক উইকেট দখল কৰিছে মেট হেনৰীয়ে। ভাৰতৰ বিৰুদ্ধে গ্ৰুপ পৰ্যায়ৰ খেলখনত ৪২ ৰানত ৫টা উইকেট দখল কৰাৰ কৃতিত্ব তেওঁৰ আছিল। আনকি ২০২৩ চনৰ পাছত এদিনীয়া ফৰ্মেটত তেওঁৰ সৰ্বাধিক উইকেট আছে। বৰ্তমান তেওঁৰ ৬৫ খন মেচত ১৩৬ টা উইকেট আছে। ফাইনেলত যদি নিউজিলেণ্ডে সঠিক পেচাৰ নাপায় তেন্তে তেওঁলোক যথেষ্ট পিছ পৰি থাকিব বুলি বিশেষজ্ঞসকলে কয়।
