জনপ্ৰিয়তা! দ্বিতীয়টো কাৰ্যকালৰ বাবে শপত ল’লে নিউজিলেণ্ডৰ প্ৰধান মন্ত্ৰী জেছিণ্ডা আৰডাৰ্নে
একেৰাহে দ্বিতীয়টো কাৰ্যকালৰ বাবে চৰকাৰ গঠন কৰিলে নিউজিলেণ্ডৰ জনপ্ৰিয় প্ৰধান মন্ত্ৰী জেছিণ্ডা আৰডাৰ্নে। শুকুৰবাৰে তেওঁ শপতগ্ৰহণ কৰে।
জেছিণ্ডাৰ লগতে তেওঁৰ মন্ত্ৰীসভাৰ আন নতুন সদস্যসকলেও শপত লয়। শুকুৰবাৰে দেশখনৰ ৰাজধানী ৱেলিংটনৰ গৱৰ্ণমেন্ট হাউছত এই শপত গ্ৰহণ অনুষ্ঠানৰ আয়োজন কৰা হৈছিল।
শপত গ্ৰহণ অনুষ্ঠানত প্ৰধান মন্ত্ৰী জেছিণ্ডা আৰডাৰ্নে কয়,’’নতুন মন্ত্ৰীসভাক সোঁৱাৰাই দিছো আমি বহু ডাঙৰ দায়িত্ব লৈ আমাৰ কাম কৰি যাব লাগিব। বহু প্ৰত্যাহ্বানমূলক পৰিস্থিতি আহিব যিবোৰ আমি সন্মিলিতভাৱে মোকাবিলা কৰিব লাগিব।‘’
মন্ত্ৰীসভা গঠনৰ পূৰ্বেই জেছিণ্ডাই এখন অভূতপূৰ্ব বৈচিত্ৰপূৰ্ণ মন্ত্ৰীসভা গঠন কৰিব বুলি জানিবলৈ দিছিল।
জেছিণ্ডাৰ কেবিনেট মহিলা, আদিবাসী তথা সমকামী সকলোকে লৈ গঠিত হৈছে। তেওঁৰ মন্ত্ৰীসভাত উপ প্ৰধান মন্ত্ৰীৰ দায়িত্ব লাভ কৰিছে সমকামী গ্ৰেন্ট ৰবাৰ্টছনে।
সেইদৰে বৈদেশিক পৰিক্ৰমা বিভাগৰ দায়িত্ব দিয়া হৈছে মাউৰি সম্প্ৰদায়ৰ নেতা নানায়া মাহুতাক।
কৰ’না প্ৰতিৰোধৰ ক্ষেত্ৰত অসাধাৰণ সাফল্য লাভ পাছত যোৱা মাহত অনুষ্ঠিত সাধাৰণ নিৰ্বাচনত জেছিণ্ডা আৰডাৰ্ন ব্যাপক ভোটত বিজয়ী হয়।