শিৱসাগৰ নগৰৰ ঐতিসাহিক ধাই আলিৰ উপ-পথ সেন্দূৰী আলি আজি আনুষ্ঠানিকভাৱে উদ্ধোধন কৰে শিৱসাগৰ জিলাৰ আৰক্ষী অধীক্ষক সুবোধ সোণোৱালে। ১০. ৮৫ লাখ টকা ব্যয় সাপেক্ষে শিৱসাগৰ পৌৰসভাই এই পথটো নিৰ্মাণ কৰিছে।
বিশিষ্ট সমাজকৰ্মী আনোৱাৰ হুছেইনে আঁত ধৰা অনুষ্ঠানটোত আৰক্ষী অধীক্ষক সুবোধ সোনোৱালে কয় যে ৰাইজৰ অভাৱ আৰু সমস্যাৰ কথা চিন্তা কৰি পৌৰসভাই নগৰৰ প্ৰায় বিলাক পথ নিৰ্মাণৰ কথা চিন্তা কৰিছে। পৌৰসভাৰ এনে জনমূখী পদক্ষেপক ৰাইজে শলাগ লোৱা উচিত তেওঁ বুলিও মন্তব্য কৰে।
অনুষ্ঠানটোত বিশিষ্ট আতিথি হিচাপে উপস্থিত থাকি পৌৰনেত্ৰী মৃদুস্মিতা সিংহই কয় যে কেৱল সেন্দূৰী আলিয়েই নহয়, নগৰৰ অৰ্ধ শতাধিক পথ-উপপথ ফেবাৰ ব্লকৰ জৰিয়তে নিৰ্মাণৰ আঁচনি লোৱা হৈছে। নগৰ উন্নয়ণৰ বাবে লাভ কৰা ধনেৰে পৌৰসভাই নগৰখনৰ গৰিষ্ঠ সংখ্যক পথ নিৰ্মাণ কৰি আছে বুলিও তেওঁ সদৰী কৰে।
অনুষ্ঠানত উজনি অসম মুছলিম কল্যান পৰিষদৰ উপ-সভাপতি মণিৰুল ইছলাম বড়াই কয় যে সেন্দূৰী আলিৰ আগৰ অংশটো বেদখলৰ গ্ৰাসত পৰি ঠেক হৈ পৰিছে। এনে উপ-পথত জৰুৰী কালীন এম্বুলেঞ্চ আৰু অগ্নি নিৰ্বাপক গাড়ী যাব পৰাকৈ পথসমূহ ১০/ ১২ ফুট বহল হ’ব লাগে। প্ৰয়োজন হ’লে প্ৰশাসনে এনে অঞ্চলত মাটি অধিগ্ৰহণ কৰি বা বেদখলমুক্ত কৰি পথসমূহ বহলকৈ বনোৱাৰ ব্যৱস্থা কৰিব লাগে বুলি পৰামৰ্শ আগবঢ়ায়।
আজিৰ উক্ত উদ্ধোধনী অনুষ্ঠানত শিৱসাগৰ পৈৰসভাৰ উপ-পৌৰপতি আজাদ আলম, জেঙনিকটীয়া মছজিদ পৰিচালনা সমিতিৰ সভাপতি আলহাজ ৰয়েল আলি, সমবায় বিভাগৰ পঞ্জীয়ক মলেন আহমেদ, শিক্ষয়ত্ৰী এলিজ বেগমৰ লগতে কেইবাগৰাকী গণ্যমান্য ব্যক্তি উপস্থিত থাকে।