বিবাহৰ পাছত কোনো দম্পতিয়ে সন্তানৰ মুখ নেদেখিলে সাধাৰণতে নাৰীগৰাকীকে দোষ জাপি দিয়া হয় যদিও পুৰুষৰ শৰীৰতো অক্ষমতাৰ কাৰণ থাকে। পুৰুষৰ শৰীৰত দেখা দিয়া অক্ষমতাই হৈছে পুৰুষ বন্ধ্যাত্ব।
আধুনিক চিকিৎসাৰ সহায় লৈও বহুতেই সফল হ’ব পৰা নাই বা ভৱিষ্যতেও কোনো সম্ভাৱনা নাই এনে ঘটনাও দেখা যায়।
পুৰুষ বন্ধ্যাত্ব নতুন কথা নহয় আৰু সন্তানহীনতাৰ ক্ষেত্ৰত পুৰুষ বা নাৰী দুয়োগৰাকীয়েই যে বন্ধ্যাত্বৰ চিকাৰ হ’ব পাৰে সেয়া চিকিৎসা বিজ্ঞানে প্ৰমান কৰিছে।
শেহতীয়াকৈ পুৰুষৰ বন্ধ্যাত্বকলৈ নতুন দিশৰ সন্ধান লাভ কৰিছে ট’লেডো বিশ্ববিদ্যালয়ৰ গৱেষকসকলে। তেওঁলোকে শুক্ৰাণুৰ নতুন গতিবিধি পৰীক্ষা কৰি পুৰুষৰ বন্ধ্যাত্বৰ সম্পৰ্কত গুৰুত্বপূৰ্ণ তথ্য লাভ কৰিছে।
প্ৰসিদ্ধ নেচাৰ পত্ৰিকাত প্ৰকাশ পোৱা তেওঁলোকৰ গৱেষণা পত্ৰত প্ৰকাশ পাইছে যে শুক্ৰাণুৰ মূৰ আৰু নেজৰ সংযোগস্থল বা ছেন্ট্ৰ’লটিৰ গতি কৃত্ৰিমভাৱে বৃদ্ধি কৰি নেজৰ গতি বৃদ্ধি কৰিব পাৰি।
গৱেষকসকলৰ দাবী শুক্ৰাণু বা স্পাৰ্মৰ ছেন্ট্ৰ’লটি প্ৰধানকৈ স্থিৰ প্ৰকৃতিৰ। তাত গতি অনাটো এক ডাঙৰ আৱিষ্কাৰ। যদি এইটো নিয়মিতভাৱে লৰচৰ কৰে তেতিয়াহ’লে শুক্ৰাণুৰ গতি বৃদ্ধি পাব আৰু ইয়াৰ সক্ৰিয়তাও বাঢ়িব।
সেইদৰেই দ্ৰুত গতিসম্পন্ন শুক্ৰাণু নাৰী দেহৰ ডিম্বাণুৰ সৈতে নিষিক্ত হোৱাত আৰু অধিক সক্ৰিয় হ’ব। ইয়াৰ ফলত পুৰুষসকলে বন্ধ্যাত্বৰ সমস্যাৰ পৰা মুক্তি পাব। আনকি গৰ্ভপাত তথা জন্মগত থ্ৰুটীৰ ক্ষেত্ৰতো ই গুৰুত্বপূৰ্ণ ভূমিকা গ্ৰহণ কৰিব।
ছেন্ট্ৰ’লটিৰ এই নতুন গতিৰ নাম হৈছে ‘অপটিক্যেল ছেন্ট্ৰিঅ’ল’।
গুৰুত্বপূৰ্ণ কথা হ’ল শুক্ৰাণুৰ মূৰ আৰু নেজ যদি একেই গতিত লৰচৰ নকৰে তেতিয়া সেইটো উৰ্বৰ ডিম্বাণুৰ কাষত সঠিক সময়ত গৈ পাব নোৱাৰে। সেইক্ষেত্ৰত ছেন্ট্ৰ’লটি ত্ৰুটীপূৰ্ণ হয়। সেই ছেন্ট্ৰ’লটিকে কৃত্ৰিমভাৱে গতি দিবলৈ সক্ষম হৈছে বিজ্ঞানীসকলে।
শুক্ৰাণুৰ এই যি অক্ষমতাৰ কাৰণে পুৰুষ বন্ধ্যাত্ব দেখা যায় তাত বিজ্ঞানীসকলৰ এই নতুন আৱিষ্কাৰে পুৰুষৰ দীৰ্ঘদিনীয়া সমস্যাৰ সমাধান আনিব বুলি আশা কৰা হৈছে। বিজ্ঞানীসকলৰ এই নতুন আৱিষ্কাৰে আধুনিক বিশ্বক নতুন পথৰ সন্ধান দিব বুলি কোৱা হৈছে।
