দীঘলীয়া ৯ বছৰ ধৰি প্ৰেম। তাৰ পিছত ধুমধামেৰে বিয়া। কিন্তু বিয়াৰ দুমাহৰ ভিতৰতে প্ৰেম আৰু সম্পৰ্কৰ কৰুণ পৰিণতি ঘটিল। উত্তৰ প্ৰদেশৰ বৰেলীত পত্নীয়ে হত্যা কৰিলে স্বামীক। মৃত যুৱকজনৰ নাম জিতেন্দ্ৰ কুমাৰ যাদৱ (৩৩)।
আৰক্ষীৰ সূত্ৰ অনুসৰি হত্যাকাণ্ডৰ পিছত জিতেন্দ্ৰৰ পত্নী জ্যোতি আৰু তেওঁৰ পৰিয়ালে সমগ্ৰ ঘটনাটোক আত্মহত্যাৰ ৰূপ দিবলৈ চেষ্টা চলাইছিল। কিন্তু শেষত তদন্তত প্ৰকৃত সত্যটো পোহৰলৈ আহিল। এই ঘটনাত আৰক্ষীয়ে জ্যোতি, পিতৃ আৰু মাতৃক গ্ৰেপ্তাৰ কৰিছে।
কি ঘটিছিল? যোৱা ২৫ নৱেম্বৰত জ্যোতিৰ সৈতে বিবাহপাশত আবদ্ধ হয় জিতেন্দ্ৰ। দুয়োজনেই কামৰ কাৰণে বৰেলীত ভাড়াঘৰত বাস কৰিছিল। যোৱা ২৬ জানুৱাৰীত জিতেন্দ্ৰৰ ওলমি থকা মৃতদেহ ঘৰৰ পৰা উদ্ধাৰ কৰা হৈছিল।
জ্যোতিৰ পৰিয়ালে দাবী কৰে যে জিতেন্দ্ৰই চিপ লৈ আত্মহত্যা কৰিছে। কিন্তু মৰণোত্তৰ পৰীক্ষাৰ পিছতহে আচল গোপন কথাটো ওলাই আহিল। ডিঙি চেপি হত্যা কৰাৰ ফলত জিতেন্দ্ৰৰ মৃত্যু হোৱা বুলি প্ৰতিবেদনত প্ৰকাশ পাইছে। ইয়াৰ পিছত আৰক্ষীৰ জেৰাৰ সময়ত জিতেন্দ্ৰৰ পত্নী জ্যোতিয়ে নিজৰ অপৰাধ স্বীকাৰ কৰে।
আৰক্ষীৰ সূত্ৰৰ মতে, বিবাহৰ কেইসপ্তাহমানৰ পিছতে দম্পতীহালৰ মাজত অশান্তি আৰম্ভ হয়। অভিযোগ অনুসৰি অনলাইন জুৱা খেলি জ্যোতিৰ ২০ হাজাৰ টকাৰ সঞ্চয় হেৰুৱাইছিল জিতেন্দ্ৰই। সেই কাৰণেই তেওঁলোকৰ মাজত কাজিয়া আৰম্ভ হৈছিল।
ঘটনাৰ দিনটোত যেতিয়া অশান্তি বাঢ়িছিল জ্যোতিয়ে পিতৃ, মাতৃ আৰু ভায়েকক ফোন কৰিছিল। অভিযোগ অনুসৰি জ্যোতিৰ ঘৰৰ মানুহে জিতেন্দ্ৰৰ হাত-ভৰি ধৰি ৰাখিছিল। ইয়াৰ পিছত জ্যোতিয়ে নিজেই জিতেন্দ্ৰক ডিঙি চেপি হত্যা কৰে।
আৰক্ষীৰ মতে, নিজৰ অপৰাধ ঢাকিবলৈ জ্যোতিয়ে জিতেন্দ্ৰক এখন মাফলাৰেৰে খিৰিকীৰ গ্ৰীলত ওলোমাই থৈছিল। যাতে সকলোৱে গোটেই ঘটনাটোক আত্মহত্যা বুলি ভাবে। অৱশ্যে জ্যোতিৰ ভাতৃ দীপক এতিয়াও পলাতক হৈ আছে। আৰক্ষীয়ে তেওঁক বিচাৰি অভিযান আৰম্ভ কৰিছে। আৰক্ষীয়ে হত্যাৰ গোচৰ ৰুজু কৰি সমগ্ৰ ঘটনাৰ তদন্ত আৰম্ভ কৰিছে।
