বিয়াৰ আনন্দ মাৰ নাযাওঁতেই বিহাৰৰ আৰাহ অঞ্চলত সংঘটিত হৈছে এক মৰ্মান্তিক ঘটনা। বিয়াৰ মাত্ৰ চাৰিদিন পিছতে এগৰাকী ২৩ বছৰীয়া নৱবিবাহিত কইনাক হত্যা কৰা হৈছে। এই দুৰ্ভগীয়া কইনাগৰাকীৰ নাম সঞ্জু কুমাৰী। অভিযোগ অনুসৰি, কেৱল এটা সোণৰ চেইনৰ দাবী পূৰণ নকৰাৰ বাবেই তেওঁক যৌতুকৰ বলি সজোৱা হ’ল। ঘটনাৰ পিছৰে পৰা সঞ্জুৰ স্বামীকে ধৰি শহুৰেকৰ ঘৰৰ আন লোকসকল পলাই গৈছে যদিও আৰক্ষীয়ে ইতিমধ্যে শাহুৱেকক গ্ৰেপ্তাৰ কৰিবলৈ সক্ষম হৈছে। এই ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
যোৱা ৭ মে’ তাৰিখে সঞ্জুৰ বিয়া বিনোদ পাল নামৰ এজন যুৱকৰ লগত হৈছিল। বিয়াত সঞ্জুৰ পৰিয়ালে নিজৰ সামৰ্থ্য অনুসৰি যথেষ্ট যৌতুক দিছিল। নগদ চাৰি লাখ টকা, এখন মটৰ চাইকেল, ফ্ৰীজ, প্ৰেচাৰ কুকাৰ, প্ৰয়োজনীয় আচবাব আৰু সোণ-ৰূপৰ অলংকাৰ আদি সকলোবোৰ বস্তুৱেই তেওঁলোকে দিছিল। কিন্তু ইমানবোৰ বস্তু পোৱাৰ পিছতো বিনোদ আৰু তেওঁৰ পৰিয়াল সন্তুষ্ট হোৱা নাছিল। মাত্ৰ এটা নিৰ্দিষ্ট সোণৰ চেইনৰ বাবে বিয়াৰ পিছদিনাৰ পৰাই সঞ্জুৰ ওপৰত আৰম্ভ হৈছিল অকথ্য নিৰ্যাতন। স্বামী বিনোদে তাইক শাৰীৰিকভাৱে প্ৰহাৰ কৰাৰ লগতে পৰিয়ালৰ আন সদস্যসকলে মানসিকভাৱে হাৰাশাস্তি আৰু ঠাট্টা-মস্কৰা কৰিবলৈ আৰম্ভ কৰিছিল।
সঞ্জুৰ ককায়েক শিৱম পালে চকুলো টুকি সংবাদ মাধ্যমৰ আগত কয় যে তেওঁলোকে সকলো বস্তু দিছিল, কেৱল সেই সোণৰ চেইনটোহে দিবলৈ বাকী আছিল। বিয়াৰ দিনাই দৰাঘৰীয়াই এই চেইনটোৰ দাবী কৰিছিল আৰু পিছত দিয়া হ’ব বুলি সঞ্জুৰ পৰিয়ালে কথা দিছিল। কিন্তু শহুৰেকৰ ঘৰৰ মানুহে ধৈৰ্য্য ধৰিবলৈ টান পালে। তেওঁলোকে সঞ্জুক অহৰহ ইতিকিং কৰি কৈছিল যে তাইৰ পৰিয়ালে বিয়াত ইমানবোৰ মানুহক নিমন্ত্ৰণ কৰি খুৱাব পাৰিলে, অথচ এটা সোণৰ চেইন দিব নোৱাৰিলে।
নিয়ম অনুসৰি ১৩ মে’ তাৰিখে সঞ্জু নিজৰ পিতৃগৃহলৈ যোৱাৰ কথা আছিল। কিন্তু তাৰ দুদিন আগতেই, অৰ্থাৎ ১১ মে’ তাৰিখে তাইক হত্যা কৰা হয়। শিৱমে জনোৱা মতে, সঞ্জুক ঘৰৰ মানুহৰ লগত কথা পাতিবলৈ বাধা দিয়া হৈছিল। কেনেবাকৈ সুযোগ পাই তাই ককায়েকক ফোন কৰি কান্দি কান্দি কৈছিল যে তাইক তাত ভয়ংকৰভাৱে অত্যাচাৰ কৰিছে আৰু তাই তাত অলপো সুখী নহয়। কথাখিনি কোৱাৰ লগে লগেই শাহুৱেকে তাইৰ হাতৰ পৰা ফোনটো কাঢ়ি লয়। শাহুৱেকে শিৱমক ভাবুকি দি কয় যে তেওঁৰ ভনীয়েক আৰু জীয়াই নাথাকে, এইবাৰ কেৱল তাইৰ মৃতদেহটোহে ঘৰলৈ যাব। তাৰ কিছু সময় পিছতেই ফোনটোত এটা ভয়ংকৰ চিঞৰ শুনা গৈছিল আৰু লাইনটো কাটি গৈছিল।
এই কথা শুনাৰ পিছত শিৱম আৰু পৰিয়ালৰ আন মানুহ লৰালৰিকৈ সঞ্জুৰ শহুৰেকৰ ঘৰলৈ যায়। কিন্তু তালৈ গৈ তেওঁলোকে দেখে যে ঘৰটোত তলা ওলমি আছে আৰু সকলো অভিযুক্ত পলাইছে। তাতোকৈ মৰ্মান্তিক কথাটো হ’ল, তেওঁলোক যোৱাৰ আগতেই সঞ্জুৰ মৃতদেহটো দাহ কৰা হৈছিল। উপায়হীন হৈ পৰিয়ালটোৱে আৰক্ষীৰ ওচৰত এখন এজাহাৰ দাখিল কৰে। আৰক্ষীয়ে শাহুৱেকক গ্ৰেপ্তাৰ কৰিছে আৰু দাহ কৰা মৃতদেহটোৰ অৱশিষ্ট ফৰেনছিক পৰীক্ষাৰ বাবে পঠিয়াইছে। বাকী পলাতক অপৰাধীসকলক বিচাৰি আৰক্ষীৰ অভিযান অব্যাহত আছে।
