নৰেন্দ্ৰ মোদীৰ এনডিএ চৰকাৰ শাসনলৈ অহাৰ পাছৰে পৰা আন্তঃগাঁথনিৰ উন্নয়নৰ নামত অবাধ হাৰত গছ কাটিছে ৰাষ্ট্ৰীয় ঘাইপথ প্ৰাধিকৰণে। বিগত সময়চোৱাত ঘাইপথ বহল কৰাৰ নামত ৰাষ্ট্ৰীয় ঘাইপথ প্ৰাধিকৰণে অসমত কাটি পেলাইছে ৩৬০৬ জোপা গছ।
সাংবাদিক কোকিল শইকীয়াই দাখিল কৰা তথ্যৰ অধিকাৰ (আৰটিআই)ৰ উত্তৰত ২০১৫ চনৰ পৰা অসমৰ ৩১ নং ৰাষ্ট্ৰীয় ঘাইপথত উৰণীয়া সেঁতু আৰু যান-বাহনৰ আণ্ডাৰপাছ (ভি ইউ পি) নিৰ্মাণৰ বাবে কৃষ্ণচূড়া, ৰাধাচূড়া, বৰ্ষা গছকে ৭৭০ জোপা মূল্যৱান গছ কাটি পেলোৱা হৈছে বুলি জানিবলৈ দিছে ভাৰতৰ ৰাষ্ট্ৰীয় ঘাইপথ প্ৰাধিকৰণে।
তদুপৰি, গুৱাহাটীত ছয়শৰীয়া ঘাইপথত উৰণ সেঁতু নিৰ্মাণাৰ বৰাগাঁও, গড়চুক, লখৰা, আৰু বশিষ্ঠ জংচনত ২০১৫ চনৰ পৰা ২০২৪ চনলৈ মুঠ ২,২১৭ জোপা গছ কাটিছে ৰাষ্ট্ৰীয় ঘাইপথ প্ৰাধিকৰণে।
ইয়াৰ উপৰিও আন্তঃগাঁথনি নিৰ্মাণৰ নামত চাংসাৰীত ১৬২ জোপা আৰু ছ’চাইটি চ’কত ১১২ জোপা গছত কুঠাৰ মাৰিছে ৰাষ্ট্ৰীয় ঘাইপথ প্ৰাধিকৰণে।
ইফালে জাগীৰোড, ৰহা, ডিমৌ, বৰঘাট, আৰু কঠিয়াতলী জংচনত নিৰ্মাণ কৰি থকা হৈছে। এই প্ৰকল্পৰ বাবে ৩৪৫ জোপা গছ কাটি পেলোৱা হৈছে।
বাতৰি অনুসৰি গোৱালপাৰাৰ পৰা গুৱাহাটীলৈ ১৭ নং ৰাষ্ট্ৰীয় ঘাইপথ সম্প্ৰসাৰণৰ বাবে ১৫ হাজাৰৰো অধিক গছ, ধেমাজিৰ ৫১৫ নং ৰাষ্ট্ৰীয় ঘাইপথ সম্প্ৰসাৰণৰ বাবে ৩ হাজাৰতকৈ অধিক গছ কাটিছে প্ৰাধিকৰণে।
স্বাভাৱিকতে এতিয়া এই পৰিসংখ্যাই ৰাজ্যখনৰ ৰাজ্যৰ পৰিৱেশবিদ আৰু নাগৰিকসকলক শংকিত কৰি তুলিছে। কেৱল ৰাষ্ট্ৰীয় ঘাইপথ প্ৰাধিকৰণেই নহয় শেহতীয়াকৈ বিভিন্ন আন্তঃগাঁথনি নিৰ্মাণৰ নাম বন ধ্বংসৰ যজ্ঞ পাতিছে অসমৰ ৰাজ্য চৰকাৰেও।
এই উদ্বেগ বৃদ্ধি কৰি গুৱাহাটীত ২৫ মে’ত অভিলেখৰ ভিতৰত আটাইতকৈ উষ্ণ দিনটো অনুভৱ কৰা হয়, য’ত উষ্ণতা ৪০.১ ডিগ্ৰী চেলছিয়াছত উপনীত হয়, যিটো ১৯৬০ চনৰ পিছত সৰ্বোচ্চ উষ্ণতা। এই অভিলেখ ভংগকাৰী উষ্ণতা অঞ্চলটোৰ অভূতপূৰ্ব গৰমৰ ঢৌৰ মাজতে সংঘটিত হয়।
ছুইজাৰলেণ্ডৰ বায়ুৰ গুণাগুণ নিৰীক্ষণ সংস্থা আইকিউএয়াৰৰ “বিশ্ব বায়ুৰ গুণাগুণ প্ৰতিবেদন ২০২৩”ত গুৱাহাটীক বিশ্বৰ দ্বিতীয় প্ৰদূষিত চহৰ হিচাপে স্থান দিয়া হৈছে। ২০২২ চনৰ পৰা ২০২৩ চনলৈ পিএম২.৫ৰ ঘনত্ব দুগুণ বৃদ্ধি পোৱা প্ৰদূষণৰ ভয়ংকৰ বৃদ্ধিৰ সৈতে বনাঞ্চল ধ্বংসৰ সম্পৰ্ক এই প্ৰতিবেদনত উল্লেখ কৰা হৈছে।
আন্তঃগাঁথনি উন্নয়নৰ সুবিধাৰ বাবে ব্যাপকভাৱে গছ কটা ঘটনাই বৃদ্ধি পোৱা উষ্ণতা আৰু প্ৰদূষণৰ মূল কাৰণ হিচাপে চিহ্নিত হৈছে৷ নিৰ্বনানীকৰণৰ এই ঘটনাই পৰিৱেশৰ বহনক্ষমতাৰ সৈতে অগ্ৰগতিৰ মাজত পাৰিপাৰ্শ্বিকতাৰ ভাৰসাম্য ৰক্ষাৰ গুৰুত্ব আৰু প্ৰয়োজনীয়তাৰ ওপৰত আলোকপাত কৰে।
