অসমৰ বাওঁপন্থী শিৱিৰটোৰ এগৰাকী অক্লান্ত যোদ্ধা বোকাখাত কুৰুৱাবাহীৰ বাওঁপন্থী নেতা বলো বৰাৰ মঙলবাৰে নিজা বাসগৃহত দেহাৱসান হয়।
বিগত এমাহ ধৰি বৃক্ক আৰু যকৃতৰ ৰোগত আক্ৰান্ত হৈ চিকিৎসাধীন হৈ থকাৰ উপৰিও ২০২২ চনতে একাংগী ৰোগত আক্ৰান্ত হৈছিল প্ৰয়াত বাওঁপন্থী নেতাগৰাকী।
১৯৭২ চনৰ পৰা ১৯৭৯ চনলৈ বোকাখাতৰ কুৰুৱাবাহীত হোৱা সাত বছৰীয়া ঐতিহাসীক বান খহনীয়া বিৰোধী মৰিয়াহোলা আন্দোলনৰ বক্ষৰ পৰাই উঠি আহি বাওঁ ৰাজনীতিৰ লগত জড়িত হৈ পৰা প্ৰয়াত বলো বৰা সঁচা অৰ্থতেই আছিল এজন প্ৰকৃত কমিউনিষ্ট।
কোনো দিনেই আদৰ্শৰ লগত আপোচ নকৰা তেওঁ আছিল ভাৰতীয় কমিউনিষ্ট পাৰ্টিৰো সৰ্বক্ষণৰ কৰ্মী।
উল্লেখযোগ্য আধুনীক কুৰুৱাবাহীৰ নিৰ্মাতা প্ৰয়াত বাওঁপন্থী নেতা কমলেশ্বৰ ৰাজখোৱাৰ তেওঁ আছিল সুযোগ্য উত্তৰসূৰী।
সমগ্ৰ অসমযুৰি বিস্তাৰিত হৈ থকা কমৰেড বলো বৰাৰ কৰ্মখেত্ৰখনত ফেচিষ্ট ৰাষ্ট্ৰযন্ত্ৰই যেতিয়াই নিঃস্ব, খাটিখোৱা কৃষক-শ্ৰমিকৰ অধিকাৰ খৰ্ব কৰিছিল তেতিয়াই বলিষ্ঠ কণ্ঠৰে গৰজী উঠিছিল কমৰেড বলো বৰা।
নিজৰ জন্মস্থান কুৰুৱাবাহীৰো সৰ্বাংগীন উন্নয়ণ আৰু কৃষক শ্ৰমিকৰ অধিকাৰ প্ৰশ্নত কোনোদিনেই আপোচ নকৰিলে এইজন অক্লান্ত কমিউনিষ্ট নেতাই।
ইয়াৰ উপৰিও কুৰুৱাবাহীৰ শৈক্ষিক আন্দোলনৰ গুৰি ধৰি প্ৰতিষ্ঠা কৰিলে কুৰুৱাবাহীৰ অগ্ৰনী শিক্ষানুষ্ঠান আৰ্যভট্ট বিদ্যাপীঠ, নেতৃত্ব দিলে সমবায় আন্দোলনৰো।
ঐতিহাসীক কুৰুৱাবাহীৰ সাংস্কৃতিক ক্ষেত্ৰখনত আজিও বিৰামহীন ভাৱে কাৰ্যসূচি অব্যাহত ৰখা কুৰুৱাবাহী যুৱক সংঘৰো ১৯৭১ চনৰ পৰা ১০ বছৰ সম্পাদকৰ দায়িত্বত থাকি নেতৃত্ব দিছিল প্ৰয়াত বলো বৰাই। নিজৰ সাংস্কৃতিক যাত্ৰাত ১৯৮৪ চনৰ পৰা ১৯৬৪ চনলৈ ভাম্যমান নাট্যজগতত বলিষ্ঠ অভিনয়ৰে এগৰাকী অভিনেতা হিছাপেও পৰিচিতি লাভ কৰিছিল তেওঁ।
১৯৭৭চনৰ আধিয়াৰ আইন আন্দোলনৰো সংগ্ৰামী
এইগৰাকী অক্লান্ত বাওঁপন্থী যোদ্ধাই ১৯৮৮ চনত নিখিল ভাৰত যুৱ ফেডাৰেচনৰ ৰাজ্যিক সম্পাদক আৰু ২০১১ চনত নিখিল ভাৰত কৃষক সভাৰ ৰাজ্যিক সম্পাদকৰ দায়িত্ব গ্ৰহন কৰি নিষ্ঠাৰে কৃষক-শ্ৰমিকৰ পক্ষত থিয় দিছিল।
অসম আন্দোলনৰ সময়তো নিৰ্যাতনৰ বলি হৈছিল তথাকথিত জাতীয়তাবাদীৰ।
মঙলবাৰে বিয়লি এইজন কৃষক-শ্ৰমিক নেতাৰ কায়ীক প্ৰস্থানৰ লগে লগেই শোকস্তবদ্ধ হৈ পৰে সমগ্ৰ বোকাখাত। কুৰুৱাবাহীৰ নিজা বাসগৃহ, কুৰুৱাবাহী যুৱক সংঘ, আৰ্যভট্ট বিদ্যাপীঠ, কুৰুৱাবাহী উচ্চতৰ মাধ্যমিক বিদ্যালয়, গোপাল দেৱ নাট্যমন্দিৰ প্ৰাংগণত শোকস্তব্ধ অনুৰাগীয়ে অৰ্পন কৰে স্বতঃস্ফূৰ্ত শ্ৰদ্ধাঞ্জলি।
