যোৱা ১০ নৱেম্বৰত দিল্লীৰ লালকিল্লাৰ সমীপত সংঘটিত হোৱা ভয়ংকৰ গাড়ী বিস্ফোৰণে দেশৰ নিৰাপত্তা মহলত ব্যাপক আলোড়নৰ সৃষ্টি কৰিছিল। এই ঘটনাৰ তদন্তত ৰাষ্ট্ৰীয় অনুসন্ধান সংস্থাই (এন আই এ)) এক বৃহৎ অগ্ৰগতি লাভ কৰিছে।
কাশ্মীৰৰ পাম্পোৰে অঞ্চলৰ ছাম্বোৰাৰ নিবাসী আমিৰ ৰছিদ আলীক গ্ৰেপ্তাৰ কৰা হৈছে। বিস্ফোৰণত ব্যৱহৃত বগা ৰঙৰ হুণ্ডাই i20 গাড়ীখন তেওঁৰ নামত পঞ্জীয়ন কৰা আছিল। দিল্লীত ব্যাপক তালাচীৰ অন্তত তদন্তকাৰীয়ে তেওঁক গ্ৰেপ্তাৰ কৰে।
তদন্তত আমিৰ ৰছিদ আলী আত্মঘাতী বোমাৰু উমৰ উন নবিৰ ঘনিষ্ঠ সহযোগী বুলি জানিব পৰা গৈছে। দুয়োজনে একেলগে বিস্ফোৰণৰ পৰিকল্পনা কৰিছিল। গাড়ী কিনাৰ পৰা আৰম্ভ কৰি আক্ৰমণৰ পৰিকল্পনা কৰালৈকে সকলো কামতে জড়িত আছিল আমিৰ। পিছত সেই গাড়ীখনতে বিস্ফোৰক ভৰাই আক্ৰমণ সংঘটিত কৰা হয়।
উমৰ উন নবীক ফৰেনছিক পৰীক্ষাত আত্মঘাতী চালক হিচাপে চিনাক্ত কৰা হৈছে। পেছাত চিকিৎসক তথা ফৰিদাবাদৰ আল-ফালাহ বিশ্ববিদ্যালয়ৰ সহকাৰী অধ্যাপক উমৰে তেওঁৰ উগ্ৰপন্থী কাৰ্যকলাপৰ সৈতে জড়িত থকাৰ কথাই সকলোকে আচৰিত কৰি তুলিছে। তদন্তকাৰীয়ে তেওঁৰ আন এখন গাড়ীও জব্দ কৰিছে। বিস্ফোৰণত আহত সাক্ষীকে ধৰি কমেও ৭৩জন সাক্ষীকো সোধা-পোছা কৰিছে এন আই এয়ে।
এই বিস্ফোৰণত কমেও ১০ জন লোকৰ মৃত্যু হোৱা বুলি নিশ্চিত কৰা হৈছে। প্ৰথম অৱস্থাত মৃতকৰ সংখ্যাক লৈ বিভ্ৰান্তিৰ সৃষ্টি হৈছিল যদিও পিছলৈ দহজন লোকৰ মৃত্যু হোৱাৰ কথা পোহৰলৈ আহে। বহু লোক আহত হৈছিল আৰু এতিয়াও চিকিৎসাধীন হৈ আছে।
এই তদন্ত এতিয়া বহু ৰাজ্যলৈ বিয়পি পৰা বুলি NIA য়ে জানিবলৈ দিয়ে। দিল্লী, জম্মু-কাশ্মীৰ, হাৰিয়ানা, উত্তৰ প্ৰদেশকে ধৰি কেইবাখনো ৰাজ্যৰ আৰক্ষী আৰু প্ৰশাসনৰ সমন্বয়ত তদন্ত চলাই আছে। এই বিস্ফোৰণৰ আঁৰত এক বৃহৎ উগ্ৰপন্থী নেটৱৰ্ক থকাৰ কথাও তদন্তৰ পৰা জানিব পৰা গৈছে। শিক্ষিত পেছাদাৰী ব্যক্তিৰে গঠিত তথাকথিত ‘উচ্চ শিক্ষিত উগ্ৰপন্থী গোট’ জড়িত থকাৰ সন্দেহ কৰা হৈছে।
ইতিমধ্যে উমৰ উন নবিৰ পুলৱামাৰ ঘৰ ভাঙি পেলাইছে প্ৰশাসনে। বিস্ফোৰণৰ পিছৰে পৰা বিভিন্ন অঞ্চলত অভিযান, জেৰা আৰু প্ৰমাণ সংগ্ৰহ চলি আছে। তদন্তকাৰীয়ে দাবী কৰিছে যে তেওঁলোকে এই আক্ৰমণৰ আঁৰৰ সমগ্ৰ নেটৱৰ্ক উন্মোচন কৰিবলৈ দ্ৰুতগতিত আগবাঢ়িছে।
