নিকোলাছ মাদুৰোৱে আমেৰিকাৰ আদালতৰ কক্ষত নিজকে ভেনিজুৱেলাৰ ৰাষ্ট্ৰপতি বুলি দাবী কৰিলে। সোমবাৰে নিউয়ৰ্কৰ ফেডাৰেল আদালতত হাজিৰ হৈ তেওঁ কয় যে, “মই নিৰ্দোষী। মোক অপহৰণ কৰা হৈছে। মই মোৰ দেশৰ ৰাষ্ট্ৰপতি।”
ন্যায়াধীশে মাজভাগতে তেওঁৰ ভাষ্য মাজতে বন্ধ কৰি দিছিল যদিও পিছলৈ আনুষ্ঠানিক অভিযোগনামাৰ সময়ত মাদুৰোৱে সকলো অভিযোগ অস্বীকাৰ কৰে।
মাজনিশাৰ নাটকীয় সামৰিক অভিযানত মাদুৰো আৰু তেওঁৰ পত্নী চিলিয়া ফ্ল’ৰেছক গ্ৰেপ্তাৰ কৰাৰ পিছত এইটোৱেই আছিল প্ৰথমবাৰৰ বাবে আদালতত ৰাজহুৱাভাৱে হাজিৰ হোৱা ঘটনা। নীলা ৰঙৰ কাৰাগাৰৰ পোছাকত স্পেনিছ অনুবাদ শুনিবলৈ হেডফোন পিন্ধি আদালতত হাজিৰ হৈছিল মাদুৰো। একে সময়তে তেওঁৰ পত্নীও আদালতৰ কক্ষত হাজিৰ হয়।
শনিবাৰে আমেৰিকাত উপস্থিত হোৱাৰ পিছৰে পৰা ব্ৰুকলিনৰ কাৰাগাৰত বন্দী হৈ আছিল মাদুৰো দম্পতী। সোমবাৰে পুৱা কটকটীয়া নিৰাপত্তাৰ অধীনত মানহাটান আদালতলৈ অনা হয়। মাদুৰো প্ৰথমে কাৰাগাৰৰ পৰা হেলিকপ্টাৰেৰে আৰু তাৰ পিছত এখন সাজসজ্জিত বাহনত আদালতত উপস্থিত হয়। এই ঘটনাৰ প্ৰতিবাদ আৰু সমৰ্থনত আদালতৰ বাহিৰত দুয়োপক্ষৰ সৰু সৰু সমাৱেশ দেখা গৈছিল।
বিশেষজ্ঞসকলৰ মতে আন্তঃৰাষ্ট্ৰীয় কূটনীতিৰ ক্ষেত্ৰত এই গোচৰটো অভূতপূৰ্ব। কাৰণ দশক দশক ধৰি বিদেশী ৰাষ্ট্ৰপতিৰ বিৰুদ্ধে আমেৰিকা চৰকাৰৰ এনে প্ৰথমটো বৃহৎ অপৰাধমূলক গোচৰ। ড’নাল্ড ট্ৰাম্প প্ৰশাসনে দাবী কৰিছে যে মাদুৰোক ক্ষমতাৰ পৰা আঁতৰাবলৈ এই পদক্ষেপ প্ৰয়োজনীয় আছিল আৰু ভেনিজুৱেলাত ‘নতুন প্ৰশাসনিক ব্যৱস্থা’ গঢ়ি তোলা সম্ভৱ হ’ব।
অৱশ্যে আইনী যুঁজখন সহজ নহয়। ইতিমধ্যে মাদুৰোৰ অধিবক্তাই ইংগিত দিছে যে তেওঁলোকে তেওঁক গ্ৰেপ্তাৰৰ বৈধতাক প্ৰত্যাহ্বান জনাব। তেওঁলোকৰ মতে মাদুৰোক সাৰ্বভৌম ৰাষ্ট্ৰপতি হিচাপে বিচাৰ কৰিব নোৱাৰি। যদিও আমেৰিকাই বিশেষকৈ ২০২৪ চনৰ বিতৰ্কিত নিৰ্বাচনৰ পিছত মাদুৰোক ভেনিজুৱেলাৰ বৈধ ৰাষ্ট্ৰপতি হিচাপে স্বীকৃতি নিদিয়ে।
ভেনিজুৱেলাৰ অন্তৱৰ্তীকালীন ৰাষ্ট্ৰপতি ডেলচি ৰড্ৰিগেজে প্ৰথমে কঠোৰ প্ৰতিক্ৰিয়া প্ৰকাশ কৰিছিল যদিও পিছত আমেৰিকাৰ সৈতে আলোচনাৰ দুৱাৰ মুকলি বুলি ইংগিত দিছে। তেওঁ মাদুৰোক অনতিপলমে দেশলৈ ঘূৰাই পঠিয়াবলৈ দাবী জনায়।
ইফালে, ট্ৰাম্পে স্পষ্ট কৰি দিছে যে আমেৰিকাৰ মনোযোগ ভেনিজুৱেলাৰ তেল আৰু খনিজ সম্পদৰ ওপৰত। সোমবাৰে তেলৰ দাম সামান্য বৃদ্ধি পালেও বিশেষজ্ঞসকলে কয় যে দীৰ্ঘম্যাদী অৱহেলাৰ বাবে ভেনিজুৱেলাৰ তেল উৎপাদন দ্ৰুতগতিত বৃদ্ধি কৰাটো সহজ নহয়।
২৫ পৃষ্ঠাৰ অভিযোগনামাত মাদুৰো আৰু তেওঁৰ সহযোগীসকলে আমেৰিকালৈ হাজাৰ হাজাৰ টন কোকেইন সৰবৰাহ কৰাৰ অভিযোগ উত্থাপন কৰা হৈছে। দোষী সাব্যস্ত হ’লে আজীৱন কাৰাদণ্ডৰ সন্মুখীন হ’ব পাৰে। অভিযোগনামাত কোৱা হৈছে যে ড্ৰাগছৰ ঋণ পৰিশোধ কৰিবলৈ অপহৰণ, প্ৰহাৰ আনকি হত্যাৰ নিৰ্দেশ দিয়া হৈছিল। মাদুৰোৰ পত্নী চেলিয়া ফ্ল’ৰেছৰ বিৰুদ্ধেও উৎকোচ লোৱাৰ অভিযোগ উত্থাপন হৈছে।
কিন্তু আমেৰিকাৰ চোৰাংচোৱাৰ প্ৰতিবেদনত কুখ্যাত ‘ট্ৰেন ডি আৰাগুয়া’ গেং আৰু ভেনিজুৱেলা চৰকাৰৰ মাজত কোনো প্ৰত্যক্ষ সম্পৰ্ক পোৱা নগ’ল। তথাপি আন্তঃৰাষ্ট্ৰীয় পৰ্যবেক্ষকসকলৰ মতে এই গোচৰটোক কেন্দ্ৰ কৰি লেটিন আমেৰিকা আৰু আমেৰিকাৰ মাজৰ সম্পৰ্ক আৰু অধিক উত্তেজনাৰ দিশে আগবাঢ়িছে।
এই গোচৰৰ ৰায়দানে কেৱল মাদুৰোৰ ভৱিষ্যতেই নহয়, ভেনিজুৱেলাৰ ৰাজনৈতিক মানচিত্ৰও পুনৰ সলনি কৰিব পাৰে – যিটো দিশলৈ এতিয়া বিশ্বই চাইছে।
