চুবুৰীৰ ক্ৰিকেটত নহয়, আনকি দেশৰ ঘৰুৱা প্ৰতিযোগিতাতো নহয়, আন্তৰ্জাতিক ক্ৰিকেট খেলত এটা দল মাত্ৰ ৭ ৰানতে বল আউট হৈছে। সেইটোও এনে এখন মেচত য’ত বিপক্ষই ২০ অভাৰত ২৭১ ৰান সংগ্ৰহ কৰিছিল।
নাইজেৰিয়া-আইভৰি কোষ্টৰ মাজত খেলা এখন খেলত সংঘটিত হৈছে এই অবিশ্বাস্য ঘটনা। ২০২৬ চনৰ টি-২০ বিশ্বকাপৰ বাবে আফ্ৰিকান অঞ্চলৰ কোৱালিফায়াৰত নাইজেৰিয়াৰ বিৰুদ্ধে আইভৰি কোষ্টে মাত্ৰ ৭ ৰান সংগ্ৰহ কৰিয়েই আউট হয়। টি-২০ আন্তৰ্জাতিক মেচত এইটোৱেই সৰ্বনিম্ন স্ক’ৰ। দুমাহ পূৰ্বে ছিংগাপুৰৰ বিৰুদ্ধে মংগোলিয়াৰ ১০ ৰানত অল আউটৰ বিশ্ব অভিলেখ ভংগ হ’ল।
নাইজেৰিয়াৰ লাগোছৰ টাফাৱা বেলেৱা স্কোৱাৰ ক্ৰিকেট অভালত অনুষ্ঠিত হোৱা খেলখনত প্ৰথমে বেটিং কৰি নাইজেৰিয়াই ৪ উইকেটত ২৭১ ৰান সংগ্ৰহ কৰে। অ’পেনাৰ চেলিম চালাউৱে ৫৩টা বলত ১১২ ৰানৰ ইনিংছ খেলে। ২টা ছয় আৰু ১৩টা চাৰি মাৰি চেলিমে ‘ৰিটায়াৰ্ড হাৰ্ট’ হৈ খেলপথাৰ এৰি যায়। আন এজন অ’পেনাৰ চুলেমান ৰানচিৱিয়ে ২৯টা বলত ৫০ ৰান সংগ্ৰহ কৰে।
সেইদৰে, পাঁচ নম্বৰত নমা মিডল অৰ্ডাৰৰ বেটছমেন আইজাক অকপে ২৩টা বলত ৬টা ছয় আৰু ৩টা চাৰিৰে ৬৫ ৰান সংগ্ৰহ কৰি অপৰাজিত হৈ থাকে।
কিন্তু নাইজেৰিয়াৰ বেটছমেনে এনেকৈ ‘প্ৰহাৰ’ কৰাৰ পাছত বিপৰীত ছবিখন দেখা গ’ল, যেন আইভৰিৰ বেটাৰসকলে বেট ধৰিবই নাজানে! প্ৰথম অভাৰৰ শেষৰ বলটোত অ’পেনাৰ উত্তাৰা মহম্মদ আউট হোৱাৰ সময়ত স্ক’ৰব’ৰ্ডত আছিল ৪ ৰান। তেওঁ একেৰাহে দুটা বলত দুটা ডাবল ৰাণ লৈ আউট হয়।
সেই ৪ ৰানৰ পিছতে সমগ্ৰ বেটিং লাইনআপ ভাঙি পৰিল। আৰু বাকী ৯ জন বেটছমেনে ৩ ৰান সংগ্ৰহ কৰিয়েই এজন এজনকৈ আউট হয়। ইয়াৰে প্ৰথম আৰু দ্বিতীয় উইকেট ৪ ৰাণত, তৃতীয় আৰু চতুৰ্থ উইকেট ৫ ৰাণত, পঞ্চম, ষষ্ঠ আৰু সপ্তম উইকেট ৬ ৰাণত আৰু অষ্টম, নৱম আৰু দশম উইকেট ৭ ৰানত পতন ঘটে।
প্ৰথম বলটোতে যে কোনোবাই আউট হৈছিল এনেও নহয়। প্ৰতিজন বেটছমেনে কমেও দুটা বল খেলিছিল। অৱশ্যে ইয়াত এটা লাভ হৈছে। সৰ্বনিম্ন ৭ ৰানত অল আউট হ’লেও আইভৰি কোষ্টে আন্তৰ্জাতিক টি-২০ত আটাইতকৈ কম বলত অল আউট হোৱাৰ লাজত পৰিবলগীয়া নহ’ল। দলটোৱে ৭.৩ অভাৰ বা ৪৫ টা বল খেলিছিল, সৰ্বনিম্ন বল খেলি অল আউটৰ অভিলেখ ২০২৩ চনত নাইজেৰিয়াৰ বিৰুদ্ধে ৰুৱাণ্ডাৰ ৩৭টা বল (২৪ ৰানত অল আউট) অক্ষুন্ন আছে। যোৱা মাহত আইভৰি কোষ্টক ছিয়েৰা লিয়নে ২১ ৰানত অল আউট কৰিছিল।
আনহাতে, ২৭১ ৰানৰ বিশাল ৰানৰ পিছত ৭ ৰানত অল আউট কৰিও আটাইতকৈ বিশাল জয় লাভ কৰাৰ অভিলেখো নাইজেৰিয়াই গঢ়িব পৰা নাই। টি-২০ আন্তৰ্জাতিকত ৰানৰ হিচাপত সৰ্বাধিক জয়ৰ অভিলেখ এতিয়াও হৈছে যোৱা মাহত গাম্বিয়াৰ বিৰুদ্ধে জিম্বাবুৱেৰ ২৯০ ৰানৰ জয়। নাইজেৰিয়াৰ ২৬৪ ৰানৰ জয় এই তালিকাত তৃতীয় স্থানত আছে।
অৱশ্যে ৭ ৰানত অল আউটৰ বাবেই আইভৰি কোষ্ট আন্তৰ্জাতিক ক্ৰিকেটত চৰ্চিত হ’ব। কোনোৱে বেটিং কৰিব পাৰক বা নোৱাৰক, মাত্ৰ ৭ ৰানত অল আউট হোৱাটো নিশ্চিতভাৱে কম কথা নহয়।
