নিৰাপত্তাহীনতাত ভূগি বাংলাদেশৰ পৰা গোপনে দেশলৈ উভতি আহিছে ৯ জন ভাৰতীয় অভিযন্তা। বাংলাদেশৰ বাগেৰহাটত ৰামপাল বিদ্যুৎ কেন্দ্ৰ নিৰ্মাণৰ কামত জড়িত হৈ আছিল তেওঁলোক।
ভাৰত চৰকাৰে বাংলাদেশক বিদ্যুৎ কেন্দ্ৰ নিৰ্মাণৰ বাবে আৰ্থিক আৰু কাৰিকৰী সাহায্য আগবঢ়াইছে। বাংলাদেশ-ইণ্ডিয়া ফ্ৰেণ্ডশ্বিপ পাৱাৰ কোম্পানী লিমিটেডে নিৰ্মাণ কৰি আছে বিদ্যুৎ কেন্দ্ৰটো।
প্লাণ্ট কৰ্তৃপক্ষই জানিবলৈ দিয়া মতে, শনিবাৰে পুৱা ব্ৰেকফাষ্ট টেবুলত সেই ৯ জন ভাৰতীয় অভিযন্তাক দেখা নাপাই বিচাৰ-খোচাৰ আৰম্ভ কৰে। তেওঁলোকৰ বাসগৃহলৈ গৈ ঘৰ বাহিৰৰ পৰা তলা লগোৱা দেখে। পিছত গম পোৱা গ’ল যে এই ৯ জন অভিযন্তা বাংলাদেশৰ পৰা ভোমৰা স্থলবন্দৰেৰে ভাৰতলৈ উভতি আহিছে।
ৰামপাল তাপ বিদ্যুৎ কেন্দ্ৰৰ উপ-মহা প্ৰবন্ধক (জনসংযোগ) আনোৱাৰুল আজিমে কয় যে তেওঁলোকে কেতিয়াও কৰ্তৃপক্ষৰ আগত নিজৰ সুৰক্ষাৰ ওপৰত কোনো সন্দেহ প্ৰকাশ কৰা নাছিল। বিদ্যুৎ কেন্দ্ৰটোত চাৰিটা স্তৰৰ নিৰাপত্তা ব্যৱস্থা আছে। বাংলাদেশ শক্তি উন্নয়ন নিগমে ভাৰতীয় অভিযন্তাসকলে দেশ এৰি যোৱাৰ বিষয়টোক লৈ উচ্চ পৰ্যায়ৰ তদন্ত কৰা হ’ব বুলি অৱগত কৰিছে।
এই বিষয়টো যেতিয়া প্ৰকল্প সঞ্চালক ৰমানাথ পূজাৰীক জনোৱা হয় তেতিয়া তেওঁ সংশ্লিষ্ট অভিযন্তাসকলৰ সৈতে যোগাযোগ কৰে। পূজাৰীয়ে বাংলাদেশ কৰ্তৃপক্ষক জনোৱা মতে, নিৰাপত্তাজনিত কাৰণত ৯জন অভিযন্তা দেশলৈ উভতি আহিছে। ইয়াৰ পূৰ্বে ভাৰত চৰকাৰে বাংলাদেশত কৰ্তব্যৰত ভাৰতীয় কূটনীতিবিদৰ পৰিয়ালৰ সদস্যক ঘৰলৈ উভতি আহিবলৈ কৈছিল। তেওঁলোকে পৰ্যায়ক্ৰমে বাংলাদেশ এৰিছে।
ভাৰত চৰকাৰে এই সিদ্ধান্ত আনুষ্ঠানিকভাৱে ঘোষণা কৰা নাই যদিও নিৰ্বাচনৰ সময় ওচৰ চাপি অহাৰ লগে লগে বাংলাদেশত ভাৰতীয়সকলৰ বাবে নিৰাপত্তাৰ বিপদ বৃদ্ধি পাব বুলি বিভিন্ন সূত্ৰই প্ৰকাশ কৰিছে। যিহেতু আৱামী লীগ নিৰ্বাচনত নাই, গতিকে সকলো দলেই ভাৰত বিৰোধিতাক অস্ত্ৰ হিচাপে লৈছে। ইয়াৰ প্ৰভাৱ সমাজৰ সকলো স্তৰতে পৰিছে। ফলত ভাৰতীয় হিচাপে স্বতন্ত্ৰভাৱে কাম কৰাটো অতি কঠিন হৈ পৰিব পাৰে বুলি ধাৰণা কৰিয়েই কূটনীতিবিদসকলৰ আত্মীয়ক উভতি আহিবলৈ কোৱা হৈছে।
সূত্ৰ অনুসৰি বাংলাদেশৰ পৰা গোপনে দেশলৈ উভতি অহা অভিযন্তা কেইজন হ’ল প্ৰতিম বৰ্মন, বিশ্বজিৎ মণ্ডল, ৰাষ্ট্ৰীয় তাপ পাৰমাণৱিক শক্তি নিগমৰ এটা প্ৰকল্পৰ জেনেৰেল মেনেজাৰ এন সূৰ্য্য প্ৰকাশ ৰায়, সহকাৰী মহাপ্ৰবন্ধক এম কেছাবা পালাকী, উপ-মহাপ্ৰবন্ধক সূৰ্য্যকান্ত মণ্ডেকাৰ, সঞ্চালক প্ৰধান এম সুৰেন্দ্ৰ লাম্বা, এজিএম এম পাপ্পু লাল মীনা, সঞ্চালক প্ৰধান অৰ্ণিবন সাহা আৰু মুখ্য বিত্তীয় বিষয়া ইমানুৱেল পনৰাজ দেৱৰাজ।
