কংগ্ৰেছক বাদ দি দেশৰ বিভিন্ন ৰাজনৈতিক দলৰ ৯জন বিৰোধী নেতাই প্ৰধানমন্ত্ৰী নৰেন্দ্ৰ মোডীলৈ পত্ৰ লিখি অভিযোগ কৰিছে যে বিজেপিয়ে কেন্দ্ৰীয় সংস্থাসমূহৰ “অপব্যৱহাৰ” কৰিছে। মোডীলৈ লিখা এই পত্ৰখনত কে চন্দ্ৰশেখৰ ৰাও, মমতা বেনাৰ্জী, ফাৰুক আব্দুল্লাহ, শৰদ পাৱাৰ, অৰবিন্দ কেজৰিৱাল, উদ্ধৱ ঠাকৰে, ভাগৱত মান, অখিলেশ যাদৱ, তেজস্বী যাদৱে কিমানজন বিৰোধী নেতাৰ বিৰুদ্ধে তদন্ত কৰা হৈছে তাৰ প্ৰসংগ তুলি ধৰিছে।
এই পত্ৰখনত নেতাসকলে অসমৰ মুখ্যমন্ত্ৰী হিমন্ত বিশ্ব শৰ্মাৰ বিষয়টোও উত্থাপন কৰিছে। তেওঁলোকে লিখিছে, “ইডি-চিবিআইয়ে ২০১৪ আৰু ২০১৫ চনত অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে সাৰদা চিটফাণ্ড গোচৰৰ তদন্ত কৰিছিল। অৱশ্যে, তেওঁ বিজেপিত যোগদান কৰাৰ পিছত গোচৰটোত কোনো অগ্ৰগতি হোৱা নাই। তদানীন্তন টিএমচি নেতা শুভেন্দু অধিকাৰী আৰু মুকুল ৰয় নাৰদা গোচৰত ইডি-চিবিআইৰ নিৰীক্ষণৰ অধীনত আছিল। কিন্তু ২০২১-ৰ নিৰ্বাচনৰ পূৰ্বে তেওঁলোকে বিজেপিত যোগদান কৰাৰ পিছত গোচৰটোত কোনো অগ্ৰগতি হোৱা নাই।”
লগতে পঢ়ক: মহাৰাষ্ট্ৰৰ বিধায়কৰ উদ্ভট মন্তব্য-‘গৰাকী বিহীন পথৰ কুকুৰবোৰ ভক্ষণৰ বাবে অসমলৈ পঠিয়াওক’
২০১৪ চনৰ পৰা কেইবাজনো বিৰোধী নেতাৰ বিৰুদ্ধে গোচৰ ৰুজু কৰা হৈছে। বিৰোধী নেতাসকলে লালু প্ৰসাদ যাদৱ, সঞ্জয় ৰাউত, আজম খান, নৱাব মল্লিক, অনিল দেশমুখ, অভিষেক বেনাৰ্জীৰ বিষয়টোও উল্লেখ কৰিছে। বিৰোধী নেতাসকলে ধাৰণা কৰে যে যি সময়ত বা পৰিপ্ৰেক্ষিতত তেওঁলোকক মাতি পঠোৱা হয় বা জেৰা কৰা হয় সেয়া ‘ৰাজনৈতিকভাৱে উদ্দেশ্য প্ৰণোদিত’।
বিৰোধী নেতাসকলে পত্ৰখনত লিখিছে, “২০১৪ চনৰ পৰা কেন্দ্ৰীয় সংস্থাসমূহক যি ধৰণে ব্যৱহাৰ কৰা হৈছে, সেইটোৱে তেওঁলোকৰ নিৰপেক্ষতাৰ বিষয়ে প্ৰশ্ন উত্থাপন কৰে। গণতন্ত্ৰত মানুহৰ মতামত সৰ্বাধিক। মানুহৰ মতামতক সন্মান কৰা উচিত। আনকি মানুহে আপোনাৰ আদৰ্শতকৈ পৃথক দল এটাৰ সপক্ষে মতামত দিলেও গণতন্ত্ৰত সেই মতামতক সন্মান কৰা উচিত।”
মোডীলৈ লিখা পত্ৰখনত নেতাসকলে মনীষ চিছোদিয়াক গ্ৰেপ্তাৰ কৰাৰ ক্ষেত্ৰতো উদ্বেগ প্ৰকাশ কৰে। এইটোও উল্লেখ কৰা হৈছে যে অভিযুক্তসকলে বিজেপিত যোগদান কৰিলেই পৰিত্ৰাণ পায়।
লক্ষণীয়ভাৱে, এই বিৰোধী দলৰ নেতাসকলৰ মাজত কংগ্ৰেছৰ কোনো নেতা নাই, যি সামগ্ৰিকভাৱে অতি গুৰুত্বপূৰ্ণ।
উল্লেখ্য যে সাম্প্ৰতিক সময়ত কেইবাজনো বিৰোধী নেতাৰ বিৰুদ্ধে ইডি-চিবিআইৰ অভিযান চলোৱা হৈছে। বিৰোধীয়ে এই সকলোবোৰ ঘটনা ৰাজনৈতিকভাৱে উদ্দেশ্যপ্ৰণোদিত বুলি দাবী কৰিছে।
