একেৰাহে আঠবাৰ ভাৰতৰ আটাইতকৈ পৰিষ্কাৰ চহৰৰ খিতাপ দখল কৰিছে। কিন্তু জনস্বাস্থ্য সেৱাৰ ক্ষেত্ৰত এক বৃহৎ বিপৰ্যয়ৰ সন্মুখীন হৈছে মধ্যপ্ৰদেশৰ বাণিজ্যিক ৰাজধানী ইন্দোৰে। দূষিত খোৱাপানী খোৱাৰ ফলত সমগ্ৰ মহানগৰীত ডায়েৰিয়াৰ ভয়াৱহ প্ৰাদুৰ্ভাৱ ঘটিছে।
প্ৰশাসনে প্ৰদান কৰা তথ্য অনুসৰি এই সংক্ৰমণৰ বাবে এতিয়ালৈকে কমেও ৯ জন লোকৰ মৃত্যু হৈছে আৰু আক্ৰান্তৰ সংখ্যাই ১৪০০ অতিক্ৰম কৰিছে।
তদন্তত ইন্দোৰৰ ভাগীৰথপুৰা অঞ্চলৰ মূল খোৱাপানী যোগান পাইপলাইনত ফুটা বা লিক হোৱাৰ বাবে পানী দূষিত হোৱা বুলি জানিব পৰা গৈছে। চাঞ্চল্যকৰ তথ্যটো হ’ল পাইপলাইন লিক হোৱা ঠাইখনৰ ঠিক ওপৰত এটা শৌচাগাৰ নিৰ্মাণ কৰা হৈছিল। ফলত শৌচাগাৰৰ পৰা ওলোৱা আৱৰ্জনাবোৰ খোৱাপানীৰ লগত পোনপটীয়াকৈ মিহলি হৈ এই ভয়াবহ পৰিস্থিতিৰ সৃষ্টি হয়। পৰীক্ষাগাৰৰ প্ৰতিবেদনতো এই পানী দূষিত হোৱাটো নিশ্চিত কৰা হৈছে।
যোৱা আঠ দিনত মুঠ ১৪১৪ জন লোক আক্ৰান্ত হৈছে। বৰ্তমান ২০১ জন ৰোগী চিকিৎসালয়ত চিকিৎসাধীন হৈ আছে, ইয়াৰে ৩২ জনৰ অৱস্থা সংকটজনক আৰু আই চি ইউত আছে। অঞ্চলটোৰ ১৭১৪টা ঘৰত স্বাস্থ্য বিভাগে এক সমীক্ষা চলাইছে। ৩৩৮ জন লোকৰ মৃদু লক্ষণ থকাৰ বাবে ঘৰতে প্ৰাথমিক চিকিৎসা প্ৰদান কৰা হৈছে।
মধ্যপ্ৰদেশৰ মুখ্যমন্ত্ৰী মোহন যাদৱে পৰিস্থিতিক ‘জৰুৰীকালীন’ বুলি অভিহিত কৰিছে। তেওঁ ব্যক্তিগতভাৱে চিকিৎসালয়সমূহ পৰিদৰ্শন কৰি ক্ষতিগ্ৰস্ত পৰিয়ালসমূহৰ সৈতে বাৰ্তালাপ কৰে। তেওঁ কয় যে এই ঘটনাৰ বাবে দায়ীসকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব।
ৰাজ্যৰ অতিৰিক্ত মুখ্য সচিব সঞ্জয় ডুবেই কয় যে ভাগীৰথপুৰাৰ সমগ্ৰ পাইপলাইন নেটৱৰ্ক পৰীক্ষা কৰা হৈছে। যদিও অঞ্চলটোত বিশুদ্ধ পানী যোগান আৰম্ভ হৈছে, তথাপিও সতৰ্কতামূলক ব্যৱস্থা হিচাপে বাসিন্দাসকলক পানী উতলাবলৈ পৰামৰ্শ দিয়া হৈছে। এই ঘটনাৰ পৰা শিক্ষা লৈ সমগ্ৰ ৰাজ্যখনৰ বাবে এক নতুন ‘ষ্টেণ্ডাৰ্ড অপাৰেটিং প্ৰচিডিউৰ’ (SOP) প্ৰস্তুত কৰা হৈছে।
ইপিনে, এই মৰ্মান্তিক ঘটনাক লৈ ৰাষ্ট্ৰীয় মানৱ অধিকাৰ আয়োগে মধ্যপ্ৰদেশ চৰকাৰলৈ জাননী প্ৰেৰণ কৰিছে। অভিযোগ উত্থাপন হৈছে যে কেইবাদিনো ধৰি ভগীৰথপুৰাৰ ৰাইজে দূষিত পানী যোগানৰ অভিযোগ উত্থাপন কৰি আহিছিল যদিও প্ৰশাসনে কোনো গুৰুত্ব দিয়া নাছিল। এই গাফিলতিৰ ফলত ইমানবোৰ লোকৰ প্ৰাণ হেৰুৱাইছে নেকি সেই বিষয়ে আয়োগে তদন্ত কৰি আছে।
‘স্মাৰ্ট চিটি’ আৰু ইন্দোৰৰ দৰে পৰিষ্কাৰ চহৰৰ এনে ঘটনাই নগৰ উন্নয়ন আৰু আন্তঃগাঁথনি ৰক্ষণাবেক্ষণৰ ওপৰত ডাঙৰ প্ৰশ্নৰ উত্থাপন কৰিছে।
