কেম্পাছত এগৰাকী ছাত্ৰৰ আত্মহত্যাৰ ঘটনাক লৈ উত্তেজনা অব্যাহত আছে শিলচৰস্থিত ৰাষ্ট্ৰীয় প্ৰযুক্তিবিদ্যা প্ৰতিষ্ঠান (NIT)ত। এই উত্তেজনাৰ মাজতে কাৰিকৰী শিক্ষা প্ৰতিষ্ঠানটোৰ ছাত্ৰ-ছাত্ৰীসকলে ৰাষ্ট্ৰপতি দ্ৰৌপদী মুৰ্মুলৈ এক পত্ৰ প্ৰেৰণ কৰিছে।
তৃতীয় ষান্মাসিকৰ ছাত্ৰগৰাকীৰ আত্মহত্যাৰ পিছতে প্ৰতিষ্ঠানটোত ক্ৰমশ: বৃদ্ধি পোৱা উত্তেজনা আৰু হতাশাবোধৰ ফলশ্ৰুতিত এই মুকলি পত্ৰখন লিখা হৈছে বুলি উল্লেখ কৰিছে শিক্ষাৰ্থীসকলে।
পত্ৰখনত কোৱা হৈছে যে শৈক্ষিক প্ৰতিষ্ঠানটোৰ ভিতৰৰ পৰিস্থিতি এক আতংকজনক স্তৰলৈ বৃদ্ধি পাইছে, যাৰ বাবে সম্ভাৱ্য অত্যধিক ক্ষতি ৰোধ কৰিবলৈ ৰাষ্ট্ৰপতিগৰাকীৰ তাৎক্ষণিক হস্তক্ষেপৰ প্ৰয়োজন হৈছে।
লগতে প্ৰতিষ্ঠানটোৰ প্ৰশাসনিক কাৰ্যকলাপ আৰু মনোভাৱে NIT কেম্পাছটোক এক বিশৃংখল অৱস্থাত পেলাইছে আৰু ইয়াৰ ফলত ছাত্ৰ-ছাত্ৰীৰ মাজত ব্যাপক ক্ষোভৰ সৃষ্টি হৈছে বুলিও পত্ৰখনত উল্লেখ কৰা হৈছে।
ইফালে পত্ৰখনত একাডেমিক ডিনগৰাকীয়ে কাৰ্যকালৰ আৰম্ভণিৰে পৰাই ছাত্ৰ-ছাত্ৰীক হাৰাশাস্তি কৰি আহিছে বুলিও অভিযোগ কৰা হৈছে। শিক্ষাৰ্থীসকলৰ দাবী, ইয়াৰ দ্বাৰা সঞ্চালক দিলীপ কুমাৰ বৈদ্য কাৰ্যত: দুৰ্ভাগ্যজনকভাৱে ব্যৰ্থ হৈছে বুলি স্পষ্ট হৈছে।
উল্লেখ্য যে, NIT-শিলচৰৰ বৈদ্যুতিক অভিযান্ত্ৰিক বিভাগৰ তৃতীয় ষান্মাসিকৰ ছাত্ৰ অৰুণাচল প্ৰদেশৰ কোজ বুকেৰৰ আত্মহত্যাক কেন্দ্ৰ কৰি প্ৰতিষ্ঠানটোত ব্যাপক প্ৰতিবাদৰ সূচনা হৈছিল।
পৰীক্ষাত উত্তীৰ্ণ হোৱাত বিফল হোৱাৰ লগতে বেক পেপাৰ ক্লিয়াৰ কৰিব নোৱাৰাৰ বাবে তেওঁ আত্মহত্যাৰ পথ বাচি লৈছিল।বুকেৰে কলেজ কৰ্তৃপক্ষক পৰৱৰ্তী ছেমিষ্টাৰৰ বাবে পঞ্জীয়নৰ অনুমতি দিবলৈ অনুৰোধ কৰিছিল যদিও তেওঁৰ অনুৰোধ নাকচ কৰা বুলি জানিব পৰা গৈছে।
বুকাৰৰ মৃত্যুৰ পিছতে ছাত্ৰ-ছাত্ৰীসকলৰ মাজত ব্যাপক ক্ষোভৰ সৃষ্টি হয়। বুকাৰৰ প্ৰতি কলেজ প্ৰশাসনে সংবেদনহীন আচৰণ কৰা আৰু তেওঁক প্ৰয়োজনীয় সহায় আগবঢ়োৱাত ব্যৰ্থ হৈছে বুলি দাবী কৰে শিক্ষাৰ্থীসকলে।
লগতে প্ৰশাসনে নতুন নীতি-নিৰ্দেশনা প্ৰৱৰ্তন কৰাৰ অভিযোগ উত্থাপন কৰি ছাত্ৰ-ছাত্ৰীসকলে ইয়াৰ বিৰুদ্ধে সৰৱ হৈ পৰে। তদুপৰি প্ৰতিষ্ঠানটোৰ ডীনৰ পদত্যাগৰ দাবী জনাইছে ছাত্ৰ-ছাত্ৰীসকলে।
আনহাতে নিহত কোজ বুকাৰৰ পৰিয়ালক আৰ্থিক সাহায্যৰ ৰূপতে হওক বা আইনী সাহায্যৰ ৰূপতে হওক, উপযুক্ত ক্ষতিপূৰণ প্ৰদান কৰিবলৈও শিক্ষাৰ্থীসকলে NIT প্ৰশাসনক দাবী জনাইছে।
তদুপৰি প্ৰতিবাদৰ সৈতে জড়িত কোনো ছাত্ৰ-ছাত্ৰীৰ বিপক্ষে যিকোনো শাস্তিমূলক ব্যৱস্থা গ্ৰহণ তথা কোনো ধৰণৰ আইনী প্ৰক্ৰিয়াৰ যাতে সন্মুখীন হ’ব নালাগে, তাৰ বাবেও শিক্ষাৰ্থীসকলে দাবী তুলিছে।
