কাষ চাপি আহিছে ২৪ৰ লোকসভা নিৰ্বাচন। দিল্লী দখলৰ লক্ষ্যৰে তৎপৰ হৈ পৰিছে শাসক-বিৰোধী। বিশেষকৈ বিজেপিক তৃতীয়বাৰৰ বাবে দিল্লীৰ মচনদ দখলত বাধা দিয়াৰ উদ্দেশ্যে বিৰোধীৰ মাজত বৃদ্ধি পাইছে তৎপৰতা।
এই উদ্দেশ্যে একজোঁট হৈ পৰিছে বিৰোধী আৰু INDIA জোঁট গঠনেৰে নামি পৰিছে নিৰ্বাচনী ৰণচালিত। মিলিত হৈছে চাৰিখনকৈ বৈঠকত। তাৰ মাজতে সূত্ৰই প্ৰকাশ কৰিছে এক গুৰুত্বপূৰ্ণ খবৰ।
সূত্ৰ অনুসৰি, ২৪ত মোদীৰ সন্মুখত নীতিশ কুমাৰ বা প্ৰিয়ংকা গান্ধী অথবা অৰবিন্দ কেজৰিৱালক থিয় কৰাবলৈ পৰিকল্পনা কৰিছে INDIAই! অৰ্থাৎ উত্তৰ প্ৰদেশৰ বাৰাণসীত মোদীক প্ৰত্যাহ্বান জনাব এই তিনিজনৰেএজনে।
লক্ষণীয়ভাৱে, ২০০৪ চনৰ বাহিৰে ১৯৯১ চনৰ পৰা প্ৰতিটো নিৰ্বাচনতে বাৰাণসী লোকসভা সমষ্টিত ধাৰাবাহিকভাৱে বিজয় সাব্যস্ত কৰি আহিছে বিজেপিয়ে। ২০১৪ আৰু ২০১৯ত বাৰাণসীৰ পৰাই লোকসভালৈ আহিছে মোদী।
দ্বিতীয়বাৰৰ কাৰ্যনিৰ্বাহত মোদীয়ে ৬০ শতাংশতকৈ অধিক সমৰ্থন লাভ কৰিছে বাৰাণসীৰ ভোটাৰৰ পৰা। এনে অৱস্থাত প্ৰধানমন্ত্ৰী মোদীক বাৰাণসীত ভেটা দিয়াটো প্ৰায় অসম্ভৱ হৈ পৰিছে INDIA মিত্ৰজোঁট।
সেয়েহে বিৰোধী গোটটোৱে বাৰাণসীৰ পৰা প্ৰস্তাৱ কৰিছে এইকেইজন হাইপ্ৰফাইল নেতাৰ নাম। ইয়াৰে বিহাৰৰ মুখ্যমন্ত্ৰী তথা জনতা দল (ইউনাইটেড)ৰ মুৰব্বী নীতিশ কুমাৰ আৰু কংগ্ৰেছৰ সাধাৰণ সম্পাদক প্ৰিয়ংকা গান্ধী ভাদ্ৰা আছে প্ৰথম পচন্দৰ তালিকাত।
বিজেপিৰ একালৰ মিত্ৰ অথচ এতিয়া অন্যতম তীব্ৰ প্ৰতিদ্বন্দ্বী আৰু INDIAৰ অন্যতম প্ৰতিষ্ঠাপক নেতা নীতিশ কুমাৰ প্ৰধানমন্ত্ৰী পদৰ সম্ভাৱ্য প্ৰাৰ্থী হিচাপে চৰ্চিত হৈছিল যদিও এই সম্ভাৱনা তেওঁ অস্বীকাৰ কৰিছে।
চলিত সপ্তাহৰ আৰম্ভণিতে কুমাৰক সম্ভাৱ্য প্ৰধানমন্ত্ৰী প্ৰাৰ্থী হিচাপে প্ৰক্ষেপ কৰি কিছু পোষ্টাৰো পাটনাত দেখা গৈছিল। অৱশ্যে এই পোষ্টাৰৰ সৈতে কোনো ধৰণৰ যোগাযোগ অস্বীকাৰ কৰে জনতা দল (ইউনাইটেড)এ।
আনহাতে মঙলবাৰেতদিল্লীত INDIA জোঁটৰ পৰা কংগ্ৰেছৰ সভাপতি মল্লিকাৰ্জুন খৰ্গেক সম্ভাৱ্য প্ৰধানমন্ত্ৰী প্ৰাৰ্থী হিচাপে প্ৰক্ষেপ কৰা হৈছিল। কিন্তু খৰ্গেইও সেই চৰ্চা নাকচ কৰি তেওঁ নিৰ্বাচনত জয়ী হোৱাৰ ওপৰত গুৰুত্ব দিব বিচাৰে বুলি মন্তব্য কৰে।
ইফালে প্ৰিয়ংকা গান্ধী ভাদ্ৰাই এইপৰ্যন্ত নিৰ্বাচনত অৱতীৰ্ণ হোৱা নাই। ২০১৯ চনত তেওঁ নিৰ্বাচনত নামিব বুলি জল্পনা-কল্পনা চলিছিল। প্ৰিয়ংকা বাৰাণসীত মোদীৰ প্ৰতিদ্বন্দী হ’ব বুলিও চৰ্চা চলিছিল যদিও মূৰকত তেনে হোৱা নাছিল।
সূত্ৰ অনুসৰি, এইবাৰ বাৰাণসীত মোদীৰ প্ৰতিদ্বন্দী হিচাপে তেওঁৰ নাম তৃণমূলৰ মুৰব্বী মমতা বেনাৰ্জীয়ে প্ৰস্তাৱ কৰে। চলিত বছৰৰ আৰম্ভণিতেও বাৰাণসীৰ পৰা প্ৰিয়ংকা গান্ধী ভাদ্ৰাক থিয় কৰোৱা হ’ব বুলি চৰ্চা চলিছিল।
আনহাতে বিৰোধী মিত্ৰজোঁটৰ তৃতীয় বিকল্প হিচাপে চৰ্চিত হৈছে আম আদমি পাৰ্টিৰ মুৰব্বী তথা দিল্লীৰ মুখ্যমন্ত্ৰী অৰবিন্দ কেজৰিৱালৰ নাম। স্মৰ্তব্য যে ইতিপূৰ্বে ২০১৪ৰ নিৰ্বাচনত বাৰাণসীত মোদীৰ বিৰুদ্ধে থিয় দিছিল কেজৰিৱালে।
প্ৰায় ২০ শতাংশ ভোট লাভ কৰি সেই নিৰ্বাচনত মোদীৰ মিছতে দ্বিতীয় স্থানত আছিল আপ মুৰব্বীগৰাকী। কিন্তু তেতিয়াৰ তুলনাত এতিয়া দেশৰ ৰাজনীতিত কিছু উত্থান ঘটিছে আম আদমী পাৰ্টিৰ।
অৱশ্যে এই সন্দৰ্ভত এতিয়ালৈকে কোনো স্পষ্ট ঘোষণা কথা নাই মিত্ৰজোঁটে। গতিকে পৰৱৰ্তী সময়ত INDIA জোঁটে প্ৰধানমন্ত্ৰী মোদীৰ প্ৰতিদ্বন্দী হিচাপে বাৰাণসীত ২৪ত কোনগৰাকী নেতাক প্ৰক্ষেপ কৰে, সেয়া হ’ব লক্ষণীয়।
