মাত্ৰ ২৬ ছেকেণ্ড! সম্ভৱতঃ স্বাধীন ভাৰতৰ ৰাজনৈতিক ইতিহাসৰ আটাইতকৈ চুটি নিৰ্বাচনী ইস্তাহাৰ মুকলিৰ অনুষ্ঠান। শুকুৰবাৰে পুৱা পাটনাত অবিৰত বৰষুণত এন ডি এৰ নিৰ্বাচনী ইস্তাহাৰ মুকলিৰ মঞ্চত উপস্থিত থাকে সকলো মিত্ৰজোঁটৰ অংশীদাৰৰ নেতা। জগত প্ৰকাশ নড্ডা, চিৰাগ পাছৱান, উপেন্দ্ৰ কুশৱাহা, জিতন ৰাম মাঝি আৰু ল্বয়ং নীতিশ কুমাৰ।
ইস্তাহাৰৰ পুস্তিকাখন হাতত লৈ ফটো ছেছনৰ চিৰাচৰিত পৰম্পৰাও পালন কৰা হৈছিল। সেই ফটোখনৰ জৰিয়তে মিত্ৰজোঁটৰ ঐক্যৰ বাৰ্তা প্ৰেৰণৰ এক আতুৰ প্ৰয়াস কৰা হৈছিল। কিন্তু ঐক্যটো দূৰৰ কথা! বৰঞ্চ দূৰত্বৰ আভাস দি মাত্ৰ ২৬ ছেকেণ্ডতে মঞ্চৰ পৰা নামি গ’ল নীতিশ কুমাৰ। কিছু বিমোৰত পৰা জগত প্ৰকাশ নড্ডা আৰু আন নেতাসকলেও তেওঁৰ পিছে পিছে যাবলৈ বাধ্য হ’ল।
সংবাদ মাধ্যমে স্তম্ভিত হৈ পৰাৰ বিপৰীতে বিৰোধী দলসমূহে প্ৰত্যাশিতভাৱে উল্লাসিত হৈ পৰিল।পৰিস্থিতি চম্ভালিবলৈ মঞ্চত কোনে আছিল? উপ-মুখ্যমন্ত্ৰী সম্ৰাট চৌধুৰী! তেওঁ সাংবাদিকসকলৰ প্ৰশ্নৰ উত্তৰ দিবলৈ চেষ্টা কৰিছিল। কিন্তু তেতিয়ালৈকে ইতিমধ্যে ক্ষতি হৈ গৈছিল। আচল খবৰটো হ’ল নীতিশ কুমাৰে স্পষ্টকৈ কৈছে যে তেওঁ একেবাৰেই সন্তুষ্ট নহয়। সহজ ভাষাত ক’বলৈ গ’লে এন ডি এত সকলো ঠিকেঠাকে চলা নাই!
নিৰ্বাচনী ইস্তাহাৰ প্ৰকাশৰ মূল লক্ষ্য হ’ল হেডলাইন মেনেজমেণ্ট! অৰ্থাৎ আগন্তুক পাঁচ বছৰত যিবোৰ মনমোহা প্ৰতিশ্ৰুতি দিয়া হ’ব সেইবোৰ বিষয়ে সংবাদ মাধ্যম আৰু সাধাৰণ ৰাইজৰ মাজত চৰ্চা চলিব। ইস্তাহাৰখন সন্মুখত ৰাখিয়েই মিত্ৰজোঁটৰ অংশীদাৰৰ নেতাসকলে ভাষণ দিব। বিশেষকৈ যত উপস্থিত ২০ বছৰ ধৰি ক্ষমতাত থকা মুখ্যমন্ত্রী তথাকথিত ‘সুশাসন বাবু’! নীতিশ বাবু।
কিন্তু ৰাজনৈতিক মহলে কেতিয়াও দেখা নাই যে মাত্ৰ ২৬ ছেকেণ্ডতে এটা বাক্যও উচ্চাৰণ নকৰাকৈ ইস্তাহাৰ মুকলি কৰা হৈ গৈছে। এন ডি এৰ ইস্তাহাৰত কি আছে? এক কোটি চাকৰি, যাক বিৰোধীয়ে নতুন জুমলা বুলি অভিহিত কৰিছে। কাৰণ, ২০২০ চনত বিজেপিৰ নিৰ্বাচনী ইস্তাহাৰত ১৯ লাখ চাকৰিৰ ব্যৱস্থা কৰা হ’ব বুলি কোৱা হৈছিল। ২০২৫ চনৰ ইস্তাহাৰতো কোৱা হৈছে, ১২৫ ইউনিট বিনামূলীয়া বিদ্যুৎ, ৫ লাখ টকা পৰ্যন্ত বিনামূলীয়া চিকিৎসা। ৫০ লাখ নতুন আৱাসগৃহ। মহিলাসকলক আৰ্থিক সাহায্য।
কংগ্ৰেছৰ অশোক গেহলট বা আৰজেডিৰ তেজস্বী যাদৱ বা জন সূৰজৰ প্ৰশান্ত কিশোৰে এই ইস্তাহাৰক প্ৰায় একে সুৰতে বিহাৰৰ জনসাধাৰণৰ সৈতে কেৱল প্ৰতাৰণা বুলি অভিহিত কৰিছে। তেওঁলোকে কয়, ২০ বছৰ ক্ষমতাত থকা এজন মুখ্যমন্ত্ৰীয়ে নিৰ্বাচনত কেৱল ইস্তাহাৰ প্ৰকাশ কৰিব কিয়? তেওঁ আৰু তেওঁৰ মিত্ৰজোঁটৰ চৰকাৰে বিগত ২০ বছৰত কি কৰা হৈছে তাক দেখুৱাই এখন ৰিপৰ্ট কাৰ্ড মুকলি কৰাৰহে কথা। যদি তেওঁলোকে এতিয়াও কি কৰা হ’ব তাকেই কৈ আছে, তেন্তে এইটো স্পষ্ট যে এই সকলোবোৰ প্ৰৱঞ্চনা। যদিও এই সকলোবোৰ ছপা হৈ গোটেই দিনটো বিহাৰত চৰ্চা হৈ আহিছে, তথাপিও নীতিশ কুমাৰে এটা শব্দও উচ্চাৰণ নকৰিলে কিয়? ২০২০ চনত যেতিয়া ইস্তাহাৰ প্ৰকাশ পাইছিল, তেতিয়া ঘোষণা কৰা হৈছিল যে আগন্তুক পাঁচ বছৰলৈ নীতিশ মুখ্যমন্ত্ৰী হ’ব। কিন্তু এইবাৰ তেনেকুৱা নহ’ল। এনে প্ৰশ্নৰ উত্থাপন হ’ব পাৰে বুলিয়েই এন ডি এৰ নেতাসকলে সংবাদ মাধ্যমৰ পৰা পলাই গ’ল নেকি? নে নিৰ্বাচন আৰম্ভ হোৱাৰ আগতেই নীতিশে খেল দেখুৱাবলৈ আৰম্ভ কৰিলে?
