বৰপেটা জিলাৰ ঐতিহ্যমণ্ডিত মইনবড়ী সত্ৰ সন্দৰ্ভত ৰাজ্যৰ প্ৰভাৱশালী মন্ত্ৰী ড০ হিমন্ত বিশ্ব শৰ্মাৰ মন্তব্যক প্ৰত্যাহ্বান জনাই দেওবাৰে মইনবড়িত অনুষ্ঠিত হয় বিশাল ৰাজহুৱা সভা ৷ ছোচিয়েল ওৱেলফেয়াৰ ছোচাইটিৰ উদ্যোগত প্ৰয়াত সত্ৰাধিকাৰ ভগবান চন্দ্ৰ অধিকাৰী আৰু ইছাহক আলী সোৱৰণী মঞ্চত সন্ধিয়া ৫:৩০ বজাৰ পৰা আৰম্ভ হয় এই মুকলি সভা ৷
মইনবড়ী সত্ৰৰ সত্ৰাধিকাৰ পৰিয়ালৰ সু-সন্তান দশৰথ অধিকাৰীৰ সভাপতিত্বত অনুষ্ঠিত এই সভাখনত মুখ্য অতিথি হিচাপে অংশ গ্ৰহণ কৰে বৈদ্যুতিন মাধ্যম “প্ৰতিদিন টাইম”ৰ মুখ্য সম্পাদক নিতুমণি শইকীয়াই ৷ ভাষণ প্ৰসংগত শইকীয়াই কয় যে, মইনবড়িৰ সৈতে সত্ৰৰ এক সুকীয়া পৰিচয় আছে ৷ অসমত থকা সম্প্ৰীতিৰ বান্ধোনডাল অকামিলা কৰাৰ বাবে একাংশ ৰাজনৈতিক নেতাই চেষ্টা চলাইছে ৷
সমন্বয়ৰ পৰিৱৰ্তে বিভেদৰ বীজ চটিওৱাত একাংশ ৰাজনৈতিক নেতা ব্যস্ত হোৱা বুলিও তেওঁ উল্লেখ কৰে৷ মন্ত্ৰী হিমন্তই বাঘবৰ আৰু জনীয়াত গৈ কবিতা আবৃত্তি কৰিবলৈ জনোৱা প্ৰত্যাহ্বান গ্ৰহণ কৰি বাঘবৰ সমষ্টিৰ মইনবড়ীত আহি জ্যোতিপ্ৰসাদ আগৰৱালাৰ কবিতা আবৃতি কৰা বুলিও শইকীয়াই কয় ৷
বাঘবৰ আৰু জনীয়াৰ মুছলমান লোক সকল বাংলাদেশী বুলি মন্ত্ৰী হিমন্তই কোৱা কথাষাৰ সঁচা বুলি প্ৰতিপন্ন কৰাৰ বাবে মন্ত্ৰীগৰাকীক প্ৰত্যাহ্বান জনায় শইকীয়াই ৷ ক্ষমতা আৰু নিজৰ গাদী সুৰক্ষিত কৰাৰ স্বাৰ্থত মন্ত্ৰী হিমন্ত বিশ্ব শৰ্মাই বিতৰ্কিত মন্তব্য কৰি সমাজত বিশৃংখলতাৰ সৃষ্টি কৰিব বিচৰা বুলিও তেওঁ উল্লেখ কৰে ৷
ধৰ্মীয় উন্মাদনা নথকা দেশসমূহে বিজ্ঞান প্ৰযুক্তি বিদ্যাৰে উন্নতিৰ শিখৰত আৰোহন কৰা বুলি উল্লেখ কৰি ধৰ্মীয় উন্মাদনা থকা দেশসমূহত অশান্তি বিৰাজমান হোৱা বুলিও তেওঁ কয় ৷ কেন্দ্ৰীয় চৰকাৰে আমেৰিকা, চীন, জাপানক অনুসৰণ কৰাৰ পৰিবৰ্তে পাকিস্তান, আফগানিস্তানক অনুসৰণ কৰি ধৰ্মীয় উন্মাদনা সৃষ্টি কৰিব বিচৰা বুলিও শইকীয়াই তাৎপৰ্যপূৰ্ণ মন্তব্য আগবঢ়ায়৷
সভাখনত স্থানীয় বিধায়ক শ্বেৰমান আলী আহমেদ, জিলা পৰিষদৰ সদস্য নুৰুল ইছলাম, ছাত্ৰ মুক্তি সংগ্ৰাম সমিতিৰ কেন্দ্ৰীয় সভাপতি আশ্ৰাফুল ইছলামৰ লগতে কেইবাগৰাকী বিশিষ্ট ব্যক্তি আৰু পাঁচ সহস্ৰাধিক ৰাইজ উপস্থিত থাকে ৷
উল্লেখ্য যে, মহাপুৰুষ দুজনা গুৰুৰ কৃপাধন্য, স্নেহধন্য শ্ৰীশ্ৰী নাৰায়ণ দাস ঠাকুৰ আতাই ৫৫৬ বছৰ পূৰ্বে মইনবড়ীত মইনবড়ী সত্ৰখন স্থাপন কৰিছিল ৷ অঞ্চলটোত ব্ৰহ্মপুত্ৰ আৰু বেঁকীৰ গৰাখহনীয়াৰ বাবেই ২০০৫ চনৰ ২৮ অক্টোবৰত মইনবড়ী সত্ৰখন নদীৰ বুকুত চিৰদিনৰ বাবে জাহ যোৱাত এই সত্ৰখন সৰভোগলৈ স্থানান্তৰ কৰা হয় ৷