দাবী কৰা ধন নিদিয়া বাবেই ভোজপুৰী সম্প্ৰদায়ৰ এখন গোৱালৰ গাৱঁত টি এম পি কে (Takam Mising Porin Kebang) নামৰ মিচিং ছাত্ৰ সংগঠনটোৰ লাইমেকুৰী শাখাৰ এটা দলে আক্ৰমণ চলোৱা ঘটনাটোত এতিয়ালৈকে কাকো গ্ৰেপ্তাৰ কৰিব পৰা নাই ডিব্ৰুগড় আৰক্ষীয়ে।
ডিব্ৰুগড়ৰ অতিৰিক্ত আৰক্ষী অধীক্ষক ধ্ৰৱ বৰাই নৰ্থ-ইষ্ট নাওক জনোৱামতে নিচেই কমেও দহজন দুৰ্বৃত্তক চিনাক্ত কৰা হৈছে আৰু তেওঁলোকক ধৰিবলৈ চেষ্টা চলাই থকা হৈছে।
“আমি প্ৰায় ১০জন দুৰ্বৃত্তক চিনাক্ত কৰিছো আৰু আইন অনুসৰি ব্যৱস্থা লোৱা হ’ব। দুৰ্বৃত্তকেইজন পলাই ফুৰিছে যদিও ধৰিবলৈ চেষ্টা কৰি থকা হৈছে। পৰিস্থিতি এতিয়া নিয়ন্ত্ৰণত আছে। অঞ্চলটোত সশস্ত্ৰ বাহিনী মোতায়েন কৰা হৈছে। টি এম পি কেৰ সদস্য জড়িত হয় নে নহয়, সেইটো অনুসন্ধানৰ পিছতহে ক’ব পৰা যাব”, অতিৰিক্ত আৰক্ষী অধীক্ষক ধ্ৰৱ বৰাই কয়।
ডিব্ৰুগড় সমষ্টিৰ সাংসদ ৰামেশ্বৰ তেলীয়ে দুৰ্বৃত্তৰ আক্ৰমণত নিহত মুৰুলী যাদৱৰ পৰিয়াললৈ ৫ লাখ টকাৰ এককালীন সাহায্য ঘোষণা কৰিছে।
ইপিনে আৰক্ষীয়ে সময়ত ব্যৱস্থা লোৱা হ’লে ঘটনাটোৰ পৰা হাত সাৰিব পৰা গ’ল হেঁতেন বুলি অভিযোগ কৰিছে ভুক্তভোগী গাওঁবাসীয়ে। ধন দাবী কৰা ছাত্ৰ সংগঠনটোৰ সদস্যসকলে ভাবুকি দি যোৱাৰ পিছত গাওঁখনৰ কেইবাজন লোক গৈ জিলাৰ উপায়ুক্ত আৰু আৰক্ষী অধীক্ষকক লগ কৰিছিল আৰু বিপদৰ শংকা প্ৰকাশ কৰিছিল।
“আৰক্ষীয়ে কথাটোক গুৰুত্বসহ নল’লে। যদি তেওঁলোকে গুৰুত্ব দিলে হেঁতেন আৰু আগতীয়া ব্যৱস্থা ল’লে হেঁতেন তেতিয়া হ’লে এই ঘটনাটো প্ৰতিহত কৰিব পৰা গ’ল হেঁতেন। মই উপায়ুক্ত পল্লৱ গোপাল ঝা আৰু আৰক্ষী অধীক্ষক গৌতম বৰাক স্মাৰকপত্ৰ দিছিলো।” চাপৰি গাওঁখনৰ এজন বাসিন্দা প্ৰদীপ যাদৱে কয়।
“আমি দুখীয়া কৃষক মানুহ, কেনেকৈ তেওঁলোকক দাবী কৰা ইমান ধন দিব পাৰো?”, নিজৰ অসহায়তা প্ৰকাশ কৰি যাদৱে কয়।
অভিযোগ মতে, টি এম পি কেৰ সদস্যসকলে সংগঠনটোৰ ৪৮ সংখ্যক প্ৰতিষ্ঠা দিৱস (যোৱা ১৬ অক্টোবৰত আছিল) পাতিবৰ বাবে কেইদিন মান পূৰ্বে গাওঁখনৰ প্ৰত্যেককে ১০ হাজাৰৰ পৰা ৫০ হাজাৰ টকাকৈ ধন বৰঙনি হিচাপে দাবী কৰিছিল।
গৰু-ম’হ পুহি গাখীৰ বিক্ৰী কৰি জীৱন নিৰ্বাহ কৰা বিহাৰী লোকসকলে ইমান টকা দিবলৈ নিজৰ অসমৰ্থতা প্ৰকাশ কৰিছিল।
ধন নাপাই ক্ৰোধান্বিত হোৱা টি এম পি কেৰ সদস্যসকলে তেওঁলোকক বেয়া পৰিণামৰ সন্মুখীন হ’ব লাগিব বুলি ভাবুকি দি যায় আৰু ১৯ অক্টোবৰৰ আবেলি ২:২০ বজাত লাইমেকুৰী আঞ্চলিক সমিতিৰ সভাপতি যতীন্দ্ৰ পাদুন, সম্পাদক জয়ন্ত টায়ে, হীৰেন দলে আৰু মনেশ্বৰ পেগুৰ নেতৃত্বত প্ৰায় ২০০জনীয়া দল এটাই হাতে হাতে চোকা অস্ত্ৰ লৈ গাওঁখনৰ লোকসকলক আক্ৰমণ চলায়। তেওঁলোকে কেইবাটাও ঘৰ জ্বলাই দিয়ে।
আক্ৰমণত বেয়াকৈ আঘাতপ্ৰাপ্ত ৪জনক অসম চিকিৎসা মহাবিদ্যালয় আৰু চিকিৎসালয়লৈ নিয়া হয় আৰু তাৰে মুৰুলী যাদৱৰ চিকিৎসালয়ত মৃত্যু হয়।
আজি বিৰোধী দলপতি দেৱব্ৰত শইকীয়া, বিধায়ক ৰূপজ্যোতি কুৰ্মী, প্ৰাক্তন বিধায়ক দুৰ্গা ভূমিজ আৰু এটুৱা মুণ্ডাৰে গঠিত কংগ্ৰেছৰ এটা প্ৰতিনিধি দল ডিব্ৰুগড়লৈ যায়।
