মণিপুৰৰ স্বাস্থ্য বিভাগৰ মুখপাত্ৰই সদৰি কৰা অনুসৰি মণিপুৰত এই পৰ্যন্ত কোনোধৰণৰ সামাজিক সংক্ৰমণ হোৱা নায়।
মণিপুৰৰ স্বাস্থ্য বিভাগৰ অতিৰিক্ত সঞ্চালক ডা০ খৈৰম শশীকুমাৰ মংগাঙে এক প্ৰেছ বাৰ্তাযোগে এই কথা জানিবলৈ দিয়ে।
ৰাজ্যখনৰ স্বাস্থ্য বিভাগে সদৰি কৰা অনুসৰি মণিপুৰত কিছু সংখ্যক স্থানীয় সংক্ৰমণ হৈছে যদিও এতিয়ালৈ কোনোধৰণৰ সামাজিক সংক্ৰমণ হোৱা নায়।
আনহাতে, মণিপুৰৰ ৰাজ্যিক স্বাস্থ্য বিভাগে ক’ৰ’নাৰ সংক্ৰমণক লৈ মানসিকভাৱে লোকক সহায় কৰাৰ বাবে কাউঞ্চিলিঙৰো ব্যৱস্থা কৰিছে।
এই পৰ্যন্ত স্বাস্থ্য বিভাগে মুঠ ৯২২৭ গৰাকী লোকক কাউঞ্চিলিঙ কৰিছে।
শুকুৰবাৰে মণিপুৰত নতুনকৈ ৩৭ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰে।
শুকুৰবাৰে নতুনকৈ ক’ৰ’না আক্ৰান্ত হোৱা ৩৭ গৰাকী লোকৰ সৈতে মণিপুৰত এই পৰ্যন্ত মুঠ ১৩১৬ গৰাকী লোক ক’ৰ’না আক্ৰান্ত হৈছে।
মণিপুৰত এতিয়ালৈ মুঠ ৬৩৮ গৰাকী লোক চিকিৎসাৰ অন্তত ক’ৰ’নাৰ পৰা সুস্থ হৈ উঠিছে।
বৰ্তমান ৰাজ্যখনৰ বিভিন্ন চিকিৎসালয়ত ৬৭৮ গৰাকী ৰোগী চিকিৎসাধীন হৈ আছে।