মাৰাত্মক ক’ৰ’ণা ভাইৰাছৰ ভেকচিন প্ৰস্তুত কৰাৰ ক্ষেত্ৰত ভাৰতে উল্লেখযোগ্য সফলতা লাভ কৰা বুলি দাবী কৰি আহিছে। ইণ্ডিয়ান কাউন্সিল অৱ মেডিকেল ৰিছাৰ্চে আনকি চলিত বৰ্ষৰ ১৫ আগষ্টৰ পুৰ্বে ক’ৰ’ণা ভাইৰাছৰ ভেকচিন ক’ভিটেক্স বজাৰত মুকলি কৰিব পৰা যাব বুলি কিছুদিন পুৰ্বে ঘোষণা কৰিছিল।
কিন্তু আই চি এম আৰৰ এনে ঘোষণাৰ পিছতে এই সম্পৰ্কীয় বিশেষজ্ঞ কমিটিয়ে সংসদীয় কমিটিক কোৱা কথাই এতিয়া সমগ্ৰ বিষয়টোকে অনিশ্চয়তাৰ মাজলৈ ঠেলি দিছে।
প্ৰধান মন্ত্ৰীৰ বৈজ্ঞানিক উপদেষ্টা কে বিজয় ৰাঘৱনক লৈ গঠিত বিশেষজ্ঞ কমিটিয়ে সংসদীয় কমিটিক এই বুলি কৈছে যে বিভিন্ন কাৰিকৰী কাৰণত ক’ৰ’ণা ভাইৰাছৰ ভেকচিন ২০২১ চনৰ পূৰ্বে মুকলি কৰাটো সম্ভৱ নহ’ব।
বিশেষজ্ঞ কমিটিয়ে এই প্ৰসংগত কৈছে যে ভাৰতে যদিও প্ৰায় ভাগ ৰোগৰে প্ৰায় ৬০ শতাংশ ভেকচিন প্ৰস্তুত কৰিবলৈ সক্ষম হৈছে তথাপি ক’ৰ’ণা ভাইৰাছৰ ভেকচিনৰ ক্ষেত্ৰত আৰু কিছু পৰীক্ষ-নিৰীক্ষাৰ প্ৰয়োজন আছে।
সেয়ে ২০২১ চনৰ পুৰ্বে ক’ৰ’ণাৰ ভেকচিন বজাৰত মুকলি কৰাটো সম্ভৱপৰ কথা নহব।
বিশেষজ্ঞ কমিটি খনত বায়’টেকন’ল’জি, ছায়েন্স এণ্ড ইণ্ড্ৰাস্ট্ৰিয়েল ৰিছাৰ্চ আদি বিভাগৰ বিশেষজ্ঞ আছে।
