দেওবাৰলৈকে পশ্চিমবংগত হাজাৰ হাজাৰ জনতাক সমবেত কৰি নিৰ্বাচনী ৰেলী কৰি ফুৰা কেন্দ্ৰীয় গৃহ মন্ত্ৰী অমিত শ্বাহে দিল্লীৰ চৰকাৰী বাসগৃহত উপস্থিত হৈ ক’লে কুম্ভমেলা আৰু ৰমজানত কোভিডৰ আদৰ্শ আচৰণ বিধি মানি চলা হোৱা নাই।
কেন্দ্ৰীয় গৃহ মন্ত্ৰীগৰাকীয়ে এক ব্যক্তিগত চেনেলক দিয়া সাক্ষাৎকাৰত কয় যে কুম্ভ হওক বা ৰমজানেই হওক কোভিড বিধি সঠিকভাৱে মানি চলা হোৱা নাই।
কোভিডৰ প্ৰাথমিক ঢৌৰ মোকাবিলা কৰাৰ পিছত কেন্দ্ৰই আত্মতুষ্টিত ভোগা বুলি কৰা অভিযোগো অস্বীকাৰ কৰিছে গৃহ মন্ত্ৰী অমিত শ্বাহে।
ইফালে চৰকাৰে আত্মতুষ্টিত ভোগাৰ বাবেই বৰ্তমান ঔষধ আৰু অক্সিজেন চিলিণ্ডাৰৰ অভাৱ হোৱা বুলি উঠা অভিযোগো খণ্ডন কৰিছে কেন্দ্ৰীয় গৃহমন্ত্ৰীগৰাকীয়ে।
“দ্বিতীয় ঢৌ বা তৃতীয় ঢৌ নহওক কিয়, প্ৰতিটো নতুন ঢৌৰ সংক্ৰমণৰ হাৰ দুগুণতকৈ কম নহয়। ভাইৰাছটো সম্পূৰ্ণ নতুন আৰু ই দ্ৰুতগতিত বিয়পে। অৱশ্যে দ্ৰুতভাৱে বিয়পিলেও ই যথেষ্ট কম মাৰাত্মক।” গৃহ মন্ত্ৰীগৰাকীয়ে কয়।
তেওঁ লগতে কয়, “এই মুহূৰ্তত ভাইৰাছটো যি গতিত বিয়পি আছে সেয়া প্ৰকৃততে সমস্যাজনক। অৱশ্যে মোৰ সম্পূৰ্ণ বিশ্বাস আছে যে আমি মহামাৰী বিধৰ দ্বিতীয় ঢৌতো পৰাস্ত কৰি জয়ী হ’বলৈ গৈ আছো।”
লকডাউনৰ সন্দৰ্ভত অমিত শ্বাহে কয়, এইক্ষেত্ৰত ৰাজ্যসমূহক নিজ নিজ সিদ্ধান্ত ল’বলৈ অনুমতি দিয়া হৈছে। অন্তিম তিনি মাহৰ বাবে ৰাজ্যসমূহে কোভিড পৰিস্থিতি মূল্যাংকন কৰি পালন কৰিবলগীয়া নিৰ্দেশনাসমূহ বলৱৎ কৰিব পাৰিব বুলিও গৃহ মন্ত্ৰীগৰাকীয়ে কয়।
ইফালে কুম্ভমেলা আৰু ৰমজানত কোভিড আচৰণ বিধি উলংঘন হোৱা বুলি মন্তব্য কৰা গৃহমন্ত্ৰী অমিত শ্বাহে নিজেই পশ্চিমবংগৰ বিধানসভা নিৰ্বাচনৰ প্ৰচাৰ ৰেলীসমূহ মাৰাথান গতিত অনুষ্ঠিত কৰি আহিছে।
তেনে অৱস্থাত প্ৰশ্ন উদয় হৈছে, ক্ষমতাৰ খকত হাজাৰ হাজাৰ জনতাৰ জীৱন-মৃত্যুক পৰোৱা নকৰি কোভিডৰ আদৰ্শ আচৰণ বিধি উলংঘা কৰি বিশাল নিৰ্বাচনী সভাত অংশগ্ৰহণ কৰি কুম্ভমেলা অথবা ৰমজানত গৃহমন্ত্ৰী অমিত শ্বাহে কোভিড আচৰণ বিধি সঠিকভাৱে পালন কৰা হোৱা নাই বুলি কোৱাৰ নৈতিক অধিকাৰ আছে নে?
