দেশৰ প্ৰেমাস্পদসকললৈ সকাহ! অহা ১৪ ফেব্ৰুৱাৰীত দেশৰ প্ৰেমিক-প্ৰেমিকাসকলে উদযাপন কৰিব পাৰিব প্ৰেমৰ দিৱস ‘ভেলেণ্টাইন ডে’। ‘পশ্চিমীয়া’ ভেলেণ্টাইন ডে’ৰ সলনি দেশত বৈদিক ‘গো আলিংগন দিৱস’ পালন কৰিবলৈ ভাৰতীয় পশু কল্যাণ ব’ৰ্ডে জাননী জাৰি কৰিছিল যদিও দেশজুৰি সৃষ্টি হোৱা প্ৰতিক্ৰিয়াৰ পাছত এই সিদ্ধান্ত বাতিল কৰা হৈছে।
আজি ভাৰতীয় পশু কল্যাণ ব’ৰ্ডে এক বিবৃতি যোগে পূৰ্বৰ সিদ্ধান্ত বাতিল কৰা হৈছে বুলি সদৰী কৰিছে। ব’ৰ্ডৰ সচিব এছ কে দত্তই এক বিবৃতিত উল্লেখ কৰা মতে, “নিৰ্দিষ্ট কৰ্তৃপক্ষ আৰু মীন পালন, পশুপালন আৰু দুগ্ধ পালন মন্ত্ৰালয়ৰ নিৰ্দেশ অনুসৰি ১৪ ফেব্ৰুৱাৰীত গো আলিঙ্গন দিৱস উদযাপনৰ বাবে ভাৰতীয় পশু কল্যাণ ব’ৰ্ডে জাৰি কৰা আবেদন প্ৰত্যাহাৰ কৰা হৈছে।”
উল্লেখ্য যে যোৱা ৬ ফেব্ৰুৱাৰীত জাৰি কৰা জাননী যোগে কেন্দ্ৰীয় মীন, পশুপালন আৰু দুগ্ধ মন্ত্ৰালয়ৰ অন্তৰ্গত ভাৰতীয় পশু কল্যাণ ব’ৰ্ডে ১৪ ফেব্ৰুৱাৰীত গো আলিংগন দিৱস পালন কৰিবলৈ আহ্বান জনাইছিল। জাননীত ব’ৰ্ডে কৈছিল যে, গৰু ভাৰতীয় সংস্কৃতি আৰু গ্ৰাম্য অৰ্থনীতিৰ মেৰুদণ্ড, আমাৰ জীৱন জীয়াই ৰাখে, গৰু সম্পদ আৰু জৈৱ বৈচিত্ৰ্যক প্ৰতিনিধিত্ব কৰে।
মাতৃৰ দৰে স্বভাৱৰ বাবেই গৰুক ‘কামধেনু’ আৰু ‘গৌমাতা’ বুলি জনা যায় বুলি ব’ৰ্ডে লগতে কৈছিল। জাননীখনত ব’ৰ্ডে লগতে গৰুক মানুহক ধনৱন্ত কৰি তোলা সকলো দ্ৰব্যৰে দাতা বুলি উল্লেখ কৰিছিল। চৰকাৰী সংস্থাটোৰ মতে, পশ্চিমীয়া সংস্কৃতিৰ মাজত বৈদিক পৰম্পৰা প্ৰায় বিলুপ্তিৰ দিশে আগবাঢ়িছে আৰু এই কাৰণতে এনে এটা দিনৰ প্ৰয়োজন।
“গৰুৰ অপৰিসীম উপকাৰৰ প্ৰতি লক্ষ্য ৰাখি গৰুৰ সৈতে আলিংগন কৰিলে আৱেগিক সমৃদ্ধি আহিব আৰু তেতিয়া আমাৰ ব্যক্তিগত আৰু সামূহিক সুখ বৃদ্ধি পাব।”- জাননীখনত ভাৰতীয় পশু কল্যাণ ব’ৰ্ডে লগতে এইদৰে উল্লেখ কৰিছিল। সেয়েহে ব’ৰ্ডৰ মতে, সকলো গৰুপ্ৰেমীয়েও ১৪ ফেব্ৰুৱাৰীক গৰু আলিংগন দিৱস হিচাপে উদযাপন কৰিব পাৰে আৰু মাতৃ গৰুৰ গুৰুত্বৰ কথা মনত ৰাখি জীৱনটো সুখী আৰু ইতিবাচক শক্তিৰে ভৰা কৰি তুলিব পাৰে।
ইফালে ব’ৰ্ডৰ এই জাননীখনে সামাজিক মাধ্যমত হাঁহিৰ খোৰাকৰো সৃষ্টি কৰে। নেটিজেনে এই বিষয়ত শ্বেয়াৰ কৰে নানা হাস্যৰসাত্মক মিম। দেশৰ প্ৰখ্যাত অধিবক্তা তথা সমাজ কৰ্মী প্ৰশান্ত ভূষণেও টুইটাৰত এক ভিডিঅ’ শ্বেয়াৰ কৰি পশু কল্যাণ ব’ৰ্ডৰ এই সিদ্ধান্তক কটাক্ষ কৰিছিল। ভিডিঅ’টোত কেইগৰাকীমান ব্যক্তিৰ সৈতে গৰুৰ কাষলৈ যোৱা এগৰাকী বিজেপি নেতাক বান্ধি থোৱা গৰুটোৱে লঠিওৱা দেখিবলৈ পোৱা গৈছে। ভিডিঅ’টোৰ কেপচনত প্ৰশান্ত ভূষণে লিখিছে, “গো আলিংগন দিৱস!”
Cow hug day! pic.twitter.com/iFRUFGgxxO
— Prashant Bhushan (@pbhushan1) February 9, 2023
উল্লেখ্য যে, ১৪ ফেব্ৰুৱাৰী দিনটোত বিশ্বত ভেলেণ্টাইন ডে’ হিচাপে পালন কৰা হয়। কিন্তু ভাৰতৰ হিন্দুত্ববাদী সংগঠনসমূহে ভেলেণ্টাইন ডে’ ভাৰতীয় সংস্কৃতি বিৰোধী বুলি উল্লেখ কৰি ভেলেণ্টাইন ডে’ উদযাপনৰ বিৰোধিতা কৰি আহিছে। কেৱল সিমানেই নহয়, ভেলেণ্টাইন ডে’ পালন কৰা প্ৰেমিক-প্ৰেমিকাসকলক সংঘ পৰিয়ালৰ অন্তৰ্ভুক্ত একাংশ হিন্দুত্ববাদী সংগঠনে হাৰাশাস্তি কৰাও বিগত সময়ত দেখিবলৈ পোৱা গৈছে।
