২০১৮ বৰ্ষৰ ৫ অক্টোবৰ। প্ৰতিবন্ধীসকলৰ বাবে আছিল এটা অভিশপ্ত দিন। উক্ত দিনটোতে দিছপুৰ লাষ্টগেটত প্ৰতিবন্ধী সুৰক্ষা সংস্থা, অসমে ন্যায্য প্ৰাপ্তিৰ দাবীত তীব্ৰ আন্দোলন গঢ়ি তুলিছিল যদিও আৰক্ষীয়ে মানৱ অধিকাৰ ভংগ কৰি বৰ্বৰভাৱে দিব্যাংগসকলক লাঠীচালনা কৰি হাত ভঙাৰ লগতে কেইগৰাকীমান প্ৰতিবাদকাৰীৰ মূৰো ফালে।
আৰক্ষীৰ এই বৰ্বৰতা অতিৰিক্ত উপ-আৰক্ষী আয়ুক্ত অমিতাভ বসুমতাৰী আৰু দিছপুৰৰ সোণৰ বিস্কুটৰ কেলেংকাৰিত অভিযুক্ত নিপু কলিতাৰ নিৰ্দেশতে হৈছিল বুলি গুৰুতৰ অভিযোগ তুলিছিলি প্ৰতিবন্ধী সুৰক্ষা সংস্থা, অসমে।
বিজেপি নেতৃত্বাধীন ৰাজ্য চৰকাৰে উক্ত দিনটোত নিজৰ ব্যৰ্থতা ঢাকিবলৈ গৈ শাৰীৰিক অত্যাচাৰ চলাইছিল বুলি গুৰুতৰ অভিযোগ উত্থাপন কৰে প্ৰতিবন্ধী সুৰক্ষা সংস্থা অসমৰ সাধাৰণ সম্পাদক নৃপেন মালাকাৰে।
উক্ত দিনাখনে প্ৰতিবন্ধী সুৰক্ষা সংস্থা অসমৰ সভাপতি প্ৰসন্ন শৰ্মা আৰক্ষীৰ বৰ্বৰ লাঠিচালনাত আঘাতপ্ৰাপ্ত হৈ খোজ কাঢ়িব নোৱাৰি আজিও বিচনাত পৰি থাকিবলগীয়া অৱস্থাৰ সৃষ্টি হৈছিল।
২০১৮ বৰ্ষৰ ৮ অক্টোবৰৰ দিনাখন এই বৰ্বৰ ঘটনাৰ এক উচিত তদন্ত দাবী জনাই ৰাজ্যৰ সেই সময়ৰ মুখ্য সচিব আৰু মুখ্যমন্ত্ৰীলৈ এক স্মাৰক পত্ৰ প্ৰেৰণ কৰিছিল প্ৰতিবন্ধী সুৰক্ষা সংস্থা, অসমে।
কিন্তু মুখৰে ব্যৱস্থা গ্ৰহণ কৰা হ’ব বুলি আশ্বাস দিলে যদিও আজি পৰ্যন্ত কোনোধৰণৰ ব্যৱস্থা গ্ৰহণ নকৰিলে বা তদন্তই আৰম্ভ নকৰিলে ৰাজ্য চৰকাৰে।
উক্ত বৰ্ষৰে ১০ অক্টোবৰৰ দিনা ৰাজ্যিক মানৱ অধিকাৰ আয়োগৰ ওচৰত ২৪৩৮/১৮ নম্বৰত এক গোচৰ ৰুজু কৰিছিল নৃপেন মালাকাৰে। সেয়াও এক ভেকোভাওনাত পৰিণত হোৱা বুলি উল্লেখ কৰে মালাকাৰে। লগতে এয়া এক বৃহৎ গেম আখ্যা নৃপেন মালাকাৰৰ।
এই সমগ্ৰ ঘটনাক লৈ নেশ্যেনেল হিউমেন ৰাইটছ ডিফেণ্ডাৰ এলাৰ্ট নামৰ এটা সংস্থাই নিজাববীয়াকৈ ২৬৩/৩/৯/২০১৮ নম্বৰত এক গোচৰ ৰুজু কৰিছিল বুলি আমাৰ সাংবাদিকক জানিবলৈ দি মালাকাৰে লগতে কয় ‘সেই গোচৰৰ তদন্ত কৰিবৰ কাৰণে সেই সময়ৰ অপৰাধ শাখাৰ উপ আৰক্ষী আয়ুক্তক ২০১৯ বৰ্ষত দায়িত্ব অৰ্পন কৰিছিল। চন্দ্ৰকান্ত বড়ো নামৰ ডিএছপি এগৰাকীয়ে মোৰ জবানবন্দী লৈছিল যদিও এতিয়ালৈকে তদন্ত প্ৰক্ৰিয়াৰ কোনোধৰণৰ অগ্ৰগতি লাভ নকৰিলে।‘
সেই সময়ৰ অসমৰ প্ৰতিবন্ধী আয়ুক্ত কে জি হিল্লাৰীলৈ ঘটনাটোৰ তদন্ত কৰিবৰ বাবে কেন্দ্ৰীয় প্ৰতিবন্ধী আয়ুক্তই এক পত্ৰ প্ৰেৰণ কৰিছিল যদিও সেই পত্ৰখন তেওঁ গাপ দি ৰখা বুলি নৃপেন মালাকাৰে গুৰুতৰ অভিযোগ তোলে।
ইপিনে, এই ঘটনাৰ তদন্তৰ ক্ষেত্ৰত কোনো সুদত্তৰ নোপোৱাত প্ৰতিবন্ধীসকলৰ ২০২১ৰ বিধানসভা নিৰ্বাচনত কেনেধৰণৰ ভূমিকা হ’ব বুলি সোধাত মালাকাৰে কয় ‘এইবাৰ প্ৰতিবন্ধীয়ে ভোট বৰ্জন নকৰে প্ৰয়োজন সাপেক্ষে Nota ত ভোট দিব। আমাৰ প্ৰায় ৬ লাখ প্ৰতিবন্ধী ভোটাৰ আছে তেওঁলোকৰ পৰিয়াল মিলি ৯ লাখৰ ওচৰা-ওচৰি হ’ব। কিন্তু আমি ৰাজনৈতিক অধিকাৰ যাতে লাভ কৰিব নোৱাৰো সেইবাবেই চৰকাৰে আমাৰ ভোটাৰৰ সংখ্যাটো কমাই দেখুৱাব বিচাৰিছে। আমি সময়ত ঠিক কৰিম কাক বৰ্জন কৰিব লাগিব বা কাক ভোট দিব লাগিব?’
শান্তিপূৰ্ণভাৱে বহি প্ৰতিবাদ কৰা দিব্যাংগসকলৰ ওপৰত মানৱ অধিকাৰ ভংগ কৰি আৰক্ষীয়ে জঁপিয়াই পৰা ঘটনাই ২ বছৰ ৬ মাহ অতিক্ৰম কৰিলে। অৱশ্যে আৰক্ষী দায়ৱদ্ধতা আয়োগে সংবাদ মাধ্যমৰ পৰা লাভ কৰা বাতৰিৰ ভিত্তিত নিজাববীয়াকৈ ৩৫৬/২০১৯ নম্বৰত এক গোচৰ ৰুজু কৰি নিজাববীয়াকৈ তদন্ত আৰম্ভ কৰিছিল যদিও সেই তদন্তৰো কোনোধৰণৰ সুদত্তৰ লাভ নকৰিলে প্ৰতিবন্ধীসকলে।
